早齋

作者:陳文仲

(作者是永和小小書房台文讀寫班結業學員)

我是一个記持tsiânn bái ê人,幾若冬前ê代誌tiānn-tiānn無啥ē記--得,尤其是國校仔二年進前ê代誌,無一層有淡薄仔記憶tī我ê頭殼內。我幼囡仔ê時tsūn是蹛tī姑丈in兜,姑丈是外省仔,規家伙仔lóng講華語,in lóng叫我『傻瓜』。M̄免我ke講啥,逐家就知影我細漢有偌gōng--ah。

是按怎我細漢ē tsiah gōng neh?凡勢是因為三歲ê時,頭殼燒歹--去。三歲ê時tsūn,我去致著日本腦炎,hit當時,若去致著日本腦炎,是無啥mih藥仔thang醫,ia̍h就是講差不多穩死--ê。聽阿母講,我不時就燒kah tsiânn kuân,大筒--ê吊規工,若khah燒退,無一時仔,隨koh烘kuân。無幾工就ài抽龍骨髓來檢查病菌ê數量,hit-tang-tsūn ê技術無tsit-má tsiah好,龍骨髓抽了後ē昏昏死死--去,ài tsiok久tsiah ē精神。

仝一間病房,兩三工就有囡仔過身,我ê身體愈來愈lám,阿母mā愈來愈煩惱。醫生苦勸阮阿母mài koh醫--ah,伊講若有機會好--起-來,tshenn-mê、é-káu iah是臭耳聾,有--ê無--ê,lóng歹講。做人老母哪有可能ē放棄家己ê囡仔--leh?就án-ne,我ê病一工拖過一工,lóng無khah好。

有一工,醫生kā阿母講,最近病院有進一款新ê藥仔,注--落若有效,m̄免偌久就ē精神,若是無效,mā有可能liam-mi過身,問阿母beh試看māi--無?阿母mā無啥mih法度--ah,姑不而將答應醫生試看māi--leh。Hit暗,阿母跪tī病房外口kā天公伯仔求規暝,講若hōo我好--起來,阿母就beh一世人食早齋。凡勢天公伯--à去hōo阮阿母感動--著,隔tńg工透早,我就精神--ah,身體mā沓沓仔好--ah。阿母mā逐工食早齋到tsit-má。


#心內話 專欄,本文使用教育部推薦漢字kap臺灣閩南語羅馬字拼音方案。
台文通訊BONG報329期,2021年8月出刊。


歡迎捐款贊助 #李江却台語文教基金會 

(捐款可抵稅,匯款後請通知02-23112199)



郵政劃撥:19021486
戶名:財團法人李江却台語文教基金會

電匯:123-20-050514-2
華南銀行士林分行活儲
戶名:財團法人李江却台語文教基金會



李江却台語文教基金會需要你ê定期捐款,逐個月捐助NT$200以上,lán做伙來推動復振台灣語文ê事工,歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。

◎逐個月贊助本會(台文通訊BONG報發行單位)NT$200(iah是逐冬NT$2,400)以上,做伙支持基金會事工kap雜誌編印發行費用。歡迎利用郵局劃撥、信用卡(寫捐款單)、線頂捐款、現金贊助、銀行/ATM轉帳(轉帳了後請通知)、支票、郵局戶頭自動轉帳扣繳(寫授權書),捐款收據ē-tàng做『列舉扣除額』抵稅ê用途。