〈斯卡羅〉欠一味

作者:石牧民  (作者是台灣師範大學、靜宜大學台文系兼任助理教授)


最近,連續劇〈斯卡羅〉真tshia-iānn。濟濟觀眾注目teh看。眾人有teh關心,自然ē開講。自開始播出到前一站仔收煞,有人褒有人tshoh。講〈斯卡羅〉tsit齣攝影suí-khuì,人物ê穿插、所講ê話考證了tsiânn頂真,koh引tshuā觀眾認bat khah早hông am-khàm ê歷史;tsia-ê功勞,值得lán來疼惜。Mā有人講伊故事講了無精彩。本底無啥精彩tsit款ê評論有khah細聲。總--是,到第11集、12集,規齣teh-beh煞鼓hit-tsūn,逐个人看kah小可仔gông-ngia̍h;尤其女主角「蝶妹」hông銃殺ê時,「eh,怪怪ê款ōo……。」

〈斯卡羅〉是uì陳耀昌ê小說《傀儡花》來改編,講1860年代美國船「羅妹號」(Rover)搧著風颱尾,漂流到恆春hit所在,船頂ê人去hōo原住民刣--死,落尾斯卡羅原住民「大股頭」(頭人)kap美國外交人員簽「南岬盟約」ê故事。Tsit齣戲ê根頭是文學(小說)。論真,伊ē hông議論講無好看,「感覺怪怪」,底蒂mā是文學。

人呵咾〈斯卡羅〉是台灣歷史「大河劇」。實際上,日本NHK電視台製作ê大河劇一下放送lóng mā透年--ê。〈斯卡羅〉規齣12集,khîng實khah接近iáu一種日本齣;ē-sái講是日本八點檔,in號做「トレンディドラマ」(trendy drama)hit款連續劇。Tsit款日本齣tī 1990年代kài tshìng。台灣人mā真愛看。Lán giàn看hit款日本齣,m̄-nā人講『哈日』niā-niā,koh-khah因為伊有祕訣hōo觀眾「tiâu--leh」。

Hit个秘訣ē-sái講是保證好看ê「枋模」(template)。照hit个枋模結構一齣戲,觀眾ê目神、情緒tsua̋nn hōo你牽leh行,終其尾感覺好看。連續劇一集一點鐘。廣告時間掠外,量其約45分鐘。Tse 45分鐘切三份。起鼓15分鐘,hōo角色拄著一層代(iah是狀況);逃閃也好,面對也好,hit層代總是需要解決。中ng 15分鐘,hōo角色tī hit个狀況內底滾絞,bē輸hiânn水,最後beh hōo tshiâng-tshiâng滾。煞鼓15分鐘,beh kā「mooh leh燒」ê蓋掀--開,解決hit个艱難ê狀況,hōo壓力得著tháu放。標準日本齣ê手路是tī中ng 15分鐘beh收煞ê時放送主題曲,hōo主角走赴火車iah是任何赴ē著代誌就解決ê齣頭。緊張緊張緊張,總--是落尾準定赴ē著;觀眾吐大khuì,「啊,tsiok好看。」

Tsit个枋模是文學ê枋模。源起頭就是希臘哲學家Aristotle(『亞里斯多德』)teh講:「“希臘悲劇”(tragedy)就是一个有起鼓、有中ng、有收煞ê故事。」讀者貴君拍算ē抗議:「Tse m̄就ke講--ê!」若kā Aristotle ê意思分拆hōo khah幼路,起鼓就是leh鋪排tsáng頭,號做「觸發」;中ng是放tsáng頭sio咬,製造矛盾kap困難,號做「衝突」;收煞部份是做一擺解決頭前ê衝突,hōo代誌好勢,號做「解決」。Uì Aristotle開始千外冬,lán人lóng用tsit个枋模講故事,製造「娛樂tı̍k」ê效果。

一集連續劇是án-ne。規齣12集,猶原án-ne;頭四集用來鋪排大tsáng頭,中ng四集製造各種衝突,落尾四集漸漸hōo代誌得著hua̍t-lo̍h,hōo jû亂得著控制。

Lán好膽講,〈斯卡羅〉ē hōo人感覺怪怪,看了礙虐仔礙虐,就是欠tsit味。原著《傀儡花》是小說,連續劇〈斯卡羅〉是戲劇。Lán tio̍h知,he m̄是「歷史」;是出tī歷史bat有ê代誌,根據歷史來想像ê作品。In上主要所要意--ê,lóng m̄是「真實」。觀眾感覺怪怪,其實m̄是伊無真實,是「無合理」。見若符合在來講古ê道理,就bē奇怪。




#文學káng「台」  專欄,本文使用教育部推薦漢字kap臺灣閩南語羅馬字拼音方案。
#台文通訊BONG報 331期,2021年10月出刊。





--------------------------------------------

歡迎捐款贊助 #李江却台語文教基金會 

(捐款可抵稅,匯款後請通知02-23112199)



郵政劃撥:19021486
戶名:財團法人李江却台語文教基金會

電匯:123-20-050514-2
華南銀行士林分行活儲
戶名:財團法人李江却台語文教基金會



李江却台語文教基金會需要你ê定期捐款,逐個月捐助NT$200以上,lán做伙來推動復振台灣語文ê事工,歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。

◎逐個月贊助本會(台文通訊BONG報發行單位)NT$200(iah是逐冬NT$2,400)以上,做伙支持基金會事工kap雜誌編印發行費用。歡迎利用郵局劃撥、信用卡(寫捐款單)、線頂捐款、現金贊助、銀行/ATM轉帳(轉帳了後請通知)、支票、郵局戶頭自動轉帳扣繳(寫授權書),捐款收據ē-tàng做『列舉扣除額』抵稅ê用途。