作者：遊子
Lán Formosa ê環島公路建設沓沓仔展開，蘇花改快速道路、南迴公路等完成後，只賰一段有保留上原始生態ê所在，有山有海，景緻真suí，是環島公路上suí ê khih角——琅嶠卑南古道（Langgao Putin’s Ancient Trail），位tī省道26號ê尾仔段，是當地達仁鄉安朔部落ê舊名稱，後來tsiah叫做阿朗壹古道。早期是原住民拍獵kap學者研究探索ê路線。
阿朗壹古道有台東達仁鄉ê南田kap屏東牡丹鄉ê旭海雙个出入口，遊客需要tī八工到30工前tsiūnn網申請入山許可證，逐工開放名額tī南田有50个，tī旭海有250个，總共是300位。團體活動每15个人需要申請配置一位在地原住民ê導覽解說員帶領進入，參加者一定ài紮身份證，bē-tàng hōo別人代替őo！
阮有聘請三位導覽解說員，逐家準時集合，出發前先聽導覽員做重點說明，suà--落起步行--looh！天公伯--à真幫贊，青天白雲微微仔涼風；聽領隊講前一擺是9月份來，有夠hip熱，hit一工，有三个遊客siunn熱擋bē tiâu，放棄--lah！
先行過台東屏東ê隔界標誌，隨拄著檢查站，每一个人lóng核對身份證，無法度走閃。沿海墘遠遠看--去，是青藍ê太平洋海面，跤踏--ê是規海墘圓kùn-kùn ê大細粒石頭，叫做『北礫石灘』。等--一-下經過『硬漢坡』也有一段『南礫石灘』，親像禽類ê卵，一般叫伊『鵝卵石』。導覽員提醒逐家講：「M̄-thang看著suí卵石就隨便khioh--tńg-去，iah無，是ē罰三萬箍őo！」水漲ê時tshiâng來真濟水流柴，長短、外形無仝，也兼一寡仔廢棄ê討海人家私、魚網仔等等。
Suà--落是硬táu ê peh崎路，算是『硬漢坡』，沿途tshìng-kuân khiú粗索仔，一个tuè一个，有紮peh山柺仔--ê ke減有幫助，到半山腰看著海陸ê美景，Uah！真正suí--lah！Peh到上頂--à ê瞭望平台ê時，看著koh-khah闊、koh-khah遠ê景色koh-khah讚！
行到一爿是岩盤壁、一爿是一波一波海湧ê所在，導覽員分做三个點，因為開始水漲--looh！頂真huan咐每一个遊客ài聽號令：huah行跳隨行跳，huah暫停一定ài隨停，iah無，khah輕--ê是褲跤濕--去，khah嚴重ē hōo海湧拖去海--裡，驚出現意外--ooh！
海湧一波koh一波，m̄-koh也是有規律，一波大湧接兩波小湧，大湧衝--來阮一定暫停，大湧退ê時隨開始跳落去岩盤墘，有水、ē小可仔滑，ài細膩m̄-thang跋倒。Suà--落兩波小湧，後壁ê人繼續行跳，等大湧beh到koh ài暫停；規陣人就án-ne一个一个盤--過-去。對面ê遊客ài等tsit爿ê團隊過完，tsiah換in過--來。最後mā是有人褲跤濕--去，無嚴重事故上佳哉。
尾仔段路邊有椰子樹，以大海kap沙灘做背景，親像tī東南亞ê感覺！沿途mā有親像行入熱帶樹林ê感覺，beh方便ê時，查埔查某分兩區，ba̍t-ba̍t ê樹林thang遮掩，天地間由在你揣所在。
Beh入去達仁鄉ê安朔部落ê時，有「行完證明」做證據kap紀念。
阮全程用四點鐘半完成 ，算是緊kap順利--lah！領隊起行進前有交代逐个人紮2,000 cc ê水，差不多mā lóng lim kah空空空--looh。Pùn-sò mā隨手提落山，維護環境清氣。
一生ē-tàng來行一擺「環島公路上suí ê khih角」，真正歡喜福氣--lah！
