上愛食ê果子

作者:李玉鳳


Kā逐家講進前,hōo逐家臆一个謎猜——伊生做圓圓,外口是青色--ê,內底有tsiok濟粒子;形體若是細粒--ê,就kap我ê拳頭拇差不多平大;iah若是khah大粒--ê,就有我三个拳頭拇hiah-nī大粒。Án-ne lín臆--著--未?就是菝仔--lah!菝仔就是我上愛食ê果子!


Ē記得細漢ê時,我蹛tī阿媽兜,阿媽ē挽家己厝--裡種ê菝仔hōo我食。Hit-tang時仔我iáu細漢,喙齒發無幾齒,阿媽就ē kā菝仔中ng ê心khau掉,了後用湯匙仔khau菝仔hōo我食。坐tī毛蟹車ê我,食kah不止仔雄,跤一直踢,手koh一直pué,目睭金金看阿媽手頭內ê菝仔;阿媽講我是「食碗內,看碗外」——喙內iáu未吞--落,手就beh一直來sa,根本bē赴khau hōo我食。


阿爸阿母講,khah早若厝--裡人客來,菝仔koh ē-sái送--人,ke ê額就提來做一寡鹹酸甜。自我開始ē-hiáu食菝仔了後,逐工照三頓討beh食菝仔,阿公、阿媽疼孫,厝內家己種ê菝仔suah lóng m̄甘提來曝乾,正港是親像人講--ê:「生食to無夠,哪有thang曝乾」。Hit-tang時仔,厝邊頭尾lóng笑我是用牛奶粉kap菝仔飼大漢--ê,莫怪人lóng叫我菝仔王!


Khah大漢了後,我就ē tuè阿公、阿媽去菜園,看我上愛食ê菝仔。In講,菝仔beh好食,tio̍h-ài用心照顧。阿公、阿媽為著hōo我食無tsuānn農藥ê菝仔,特別去研究種菝仔ê撇步。阿媽巡菝仔樹開花ê情形,阿公就提大鉸刀鉸葉仔,講是kā菝仔樹剃頭,án-ne菝仔tsiah ē khah gâu生、食--起-來khah ē koh甜koh脆。M̄-nā án-né,等到菝仔生--出-來,in koh ài khah緊kā菝仔包--起-來,講是kā菝仔穿衫,tsiah bē hōo蟲食了了。人講:「一粒米,百粒汗」,種菝仔mā是仝款無簡單。


細漢時tsūn,我上愛阿媽切一大盤ê菝仔,hām in坐tī椅liâu,做伙食菝仔,搵一寡梅仔粉,酸甜仔酸甜,我就kap阿公開始唸:「食菝仔放銃子、食柚仔放蝦米、食龍眼放木耳!」我上愛食ê果子是菝仔,因為菝仔tsit款水果,有阿公、阿媽對我ê疼惜kap付出。 




#演講稿 專欄,本文使用教育部推薦漢字kap臺灣閩南語羅馬字拼音方案。
台文通訊BONG報332期,2021年11月出刊。






歡迎捐款贊助 #李江却台語文教基金會 

(捐款可抵稅,匯款後請通知02-23112199)



郵政劃撥:19021486
戶名:財團法人李江却台語文教基金會

電匯:123-20-050514-2
華南銀行士林分行活儲
戶名:財團法人李江却台語文教基金會



李江却台語文教基金會需要你ê定期捐款,逐個月捐助NT$200以上,lán做伙來推動復振台灣語文ê事工,歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。

◎逐個月贊助本會(台文通訊BONG報發行單位)NT$200(iah是逐冬NT$2,400)以上,做伙支持基金會事工kap雜誌編印發行費用。歡迎利用郵局劃撥、信用卡(寫捐款單)、線頂捐款、現金贊助、銀行/ATM轉帳(轉帳了後請通知)、支票、郵局戶頭自動轉帳扣繳(寫授權書),捐款收據ē-tàng做『列舉扣除額』抵稅ê用途。