作者：林榮淑
新北市萬里區野柳漁村東北thóng--出-來ê海鼻，m̄-nā是世界上tsiânn罕見ê海蝕地景，mā ē-sái講是天地送hōo台灣ê超級大禮物。1964年，政府kā伊闢建做地質公園，tsia奇巧ê風景區，m̄-nā是tshit-thô、歇睏ê好所在，當做教育場所mā tsiânn tio̍h味。M̄-koh，觀光客上kah意ê地質景緻，就是頂港有名聲、下港上出名ê「女王頭」。
幾若千萬年前，造山運動硩、sak、徙，kap東北季風tshuā--來ê海湧侵蝕。地質作用piak空產生tsiânn明顯ê節理巡跡，突出ê岩石親像頭殼型。規年thàng天，無眠無日，海水suà落去侵蝕，頷頸mā thóng--出-來--ah。時間ê跤步無歇睏，tsîng初一早到二九暝，頭到尾風化，巡跡愈來愈大，mā愈來愈深；頷頸愈來愈長，頭殼頂順節理piak--開，kan-na賰一半，就是án-ne生，天地創作一个奇巧、kánn-ná真--ê、夭壽suí、人人舂破額beh去看ê野柳女王頭。
聽人leh講「suí人無suí命」。規欉好好，無錯！美人遲暮，夕陽無限好，只是近黃昏。4,000外歲ê女王頭是一个活跳跳ê性命，到tann mā koh leh繼續發展變化。2006年ê時，伊ê頷頸箍一輾是144公分。每一年以0.2～0.5公分ê速度勼水，專家提出「斷頭」警告--ah。若是拄著陣風七級以上，iah是碰著地動規模超過三，就有斷頭ê可能性。就算無人為--ê、有--ê無--ê因素破壞，有專家推算免超過五年，ná來ná細箍ê頷頸，恐驚無法度tsih載對伊來講是超重ê頭殼，斷頭ê威脅是愈來愈厚！
好佳哉，『觀光局北海岸及觀音山風景區管理處』，提出「搶救女王頭補強計畫」。台灣大學團隊提出在地風化ê細沙仔實驗，發現thūn沙補強度抵抗風化無問題。M̄-koh，地質參環境教育學者認為：天然--ê上suí。女王頭ê出世kap斷頸，親像萬物ê生參死，lóng是天地ê意思，kánn-ná石頭mā有生老病死。奈米技術kan-na表面補強，藥劑是m̄是ē產生副作用--leh？用人工方式添壽命，仿--ê永遠無可能變成真--ê。
