母奶kah配方奶

作者:林杏佳  (作者是台大病院雲林分院醫師)


最近阮第二个囝出世--ah,蹛院期間hām兩年前生大漢囝ê時tsūn上無仝--ê,就是無koh堅持母仔囝仝室kah飼母奶。


母奶是人類嬰仔天然ê食mi̍h,配方奶是模仿母奶人工做--出-來--ê。雖然人lóng講天然--ê上好,m̄-koh古早時tsūn好額人兜ê千金大小姐bē giàn飼母奶,lóng tshiànn奶母飼囝,莫怪配方奶hōo人發明了後,有tsiok久一段時間,逐家lóng飼配方奶。Lán細漢ê時,大部份mā是食配方奶大漢--ê。


一直到最近十幾年來,食母奶tsiah變做一个tsiok tshìng ê議題。有學術研究講,飼母奶對嬰仔有tsiânn濟好處:嬰仔ê胃腸吸收ē khah好、免疫力khah強,而且母奶免錢,出外mā免tshuân牛奶粉。


所致,推廣母奶ê團體sì-kè宣傳,政府mā kā「全飼母奶」kah「母仔囝仝室」tsit兩條寫tī病院評鑑ê條文內底,拚勢beh提kuân嬰仔食母奶ê比例。病院為著beh通過評鑑,就ài配合tshui-sak,kā各種方法用kah盡磅,希望達成目標。最近食母奶ê嬰仔確實有khah濟--ah,但是,有ê母奶推廣團體bē輸宗教,ē講「阿母無奶,百面是無夠拍拚」。有ê嬰仔明明就iau kah mà-mà-háu,體重直直lak,阿母上頭幾若工一點仔奶to無,koh講kah ná像食配方奶是啥mih款天大ê罪過仝款。病院為著beh推廣母奶,提kuân全母奶ê比例,ē刁難想beh飼配方奶ê家庭,叫in bē-sái用奶喙仔飼,理由是驚嬰仔suh奶siunn輕可,就ē無愛suh阿母ê奶房。


飼母奶無可能是完全好--ê,mā絕對m̄是免錢--ê。擠奶ê時間、設備、擠kah手疼ê醫藥費、té母奶ê袋仔lóng是錢,無一定phīng買配方奶khah ē和。若是阿母beh tńg去做khang-khuè,三、四點鐘就ài固定去擠奶,koh ài揣冰箱囥,真正是tsiok費氣--ê。有ê阿母先天ê體質就是無奶,看著嬰仔háu kah,目屎直直流,為著飼奶,kā本底快樂ê代誌舞kah tsiok鬱卒。


Tsit胎beh生進前,阮翁仔某就決定,嬰仔出世以後hōo伊大部份ê時間lóng蹛tī嬰仔室,配方奶tshuân便便,mài為著無母奶ê代誌操煩。每一个人才調無仝,ài按怎飼奶,本tsiânn就應該ài尊重家長,尤其是阿母ê意思。好佳哉,tsit站仔病院ê規定mā放khah līng--ah,三工ê時間,逐家lóng tsiânn滿意,快樂出院。 



「小小心室-先天性心臟病」

#醫學台文 專欄,本文使用教育部推薦漢字kap臺灣閩南語羅馬字拼音方案。
台文通訊BONG報332期,2021年11月出刊。








歡迎捐款贊助 #李江却台語文教基金會 

(捐款可抵稅,匯款後請通知02-23112199)



郵政劃撥:19021486
戶名:財團法人李江却台語文教基金會

電匯:123-20-050514-2
華南銀行士林分行活儲
戶名:財團法人李江却台語文教基金會



李江却台語文教基金會需要你ê定期捐款,逐個月捐助NT$200以上,lán做伙來推動復振台灣語文ê事工,歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。

◎逐個月贊助本會(台文通訊BONG報發行單位)NT$200(iah是逐冬NT$2,400)以上,做伙支持基金會事工kap雜誌編印發行費用。歡迎利用郵局劃撥、信用卡(寫捐款單)、線頂捐款、現金贊助、銀行/ATM轉帳(轉帳了後請通知)、支票、郵局戶頭自動轉帳扣繳(寫授權書),捐款收據ē-tàng做『列舉扣除額』抵稅ê用途。