作者：藍春瑞
雨一下落久，sì-kè有塗肉ê所在lóng leh積水，閒時藏kah無看見影ê露螺、水蜈蜞，一隻一隻tuì塗跤總趖出來見--人，in lóng beh揣khah kuân、khah ta，bē hōo水kā駐--死ê壁頂、樹ue、石頭空kah竹篙尾去bih，溫室leh種菜ê na̋i-lóng網仔平thánn、好爬、通風koh bē kâm水，tsiah是濟kah ē驚--人。
論真講，烏sian烏sian koh siûnn-siûnn、軟軟ê露螺，kan-na看就kiōng-beh起雞母皮，連我to驚kah m̄敢去kha̍p--伊，註死m̄死有一工我去雞tiâu仔巡水、囥飼料ê時tsūn，tī圍籬內無張持踏破一粒露螺，to iáu未kā番麥角倒入去飼料槽仔內底，孤孤是「po̍k」一聲niâ，規陣雞thûn仔lóng三hua̍h做兩hua̍h tsông倚來跤邊，啄hit塊碎糊糊ê露螺肉，三兩輾手就無看見身屍去--ah。我tsiah知影若kah飼料來比phīng，雞仔顛倒khah興tsit味，m̄-koh ài先kā tīng-khok-khok ê外殼hám hōo破，in tsiah啄ē著內底ê肉。
Tsit聲雞thûn仔有食福--ah，若無thui kah kénn胿兼tsi̍h舌，我死to m̄信。Tuì園仔頭巡到園仔尾，khioh規袋重khuâinn-khuâinn ê露螺囝露螺孫，差不多兩百thóng粒hit跤兜，我刁工穿靴管kuānn來到雞tiâu仔前，tsiah伸手kā門sak--開niâ，是m̄是in lóng食了知滋味，規陣kōo tiô--ê總圍來跤邊，目睭掠透明ê塑膠袋仔nih-nih看，kánn-ná tsiânn hah ê款，我kā袋仔喙sa倒頭栽，khi-khi-kho̍k-kho̍k輾落來塗跤ê時tsūn，我mā同齊伸跤ná tiô ná tsàm，雞仔驚bē赴thang食，lóng無leh斟酌是m̄是ē hōo靴管lap--著，親像飢荒án-ne tsông來tsông去搶kah ko̍k-ko̍k叫。扯勻來算，一隻食八粒，hiah-nī仔細ê雞胿一聲就tīnn--ah，khah-ke我kuānn暗頓ê番麥角入--去ê時tsūn，in lóng無hit款iau-sà-sà ê架勢，mā無khînn倚來跤邊纏bē煞。
雞仔上驚沃著雨，毛若拍tâm ē隨寒--著，khah傷重--ê凡勢ē khiau--去，熱--人khah tsia̍p leh落ê西北雨lóng落bē久，一下仔就出日--ah，對雞仔來講顛倒無敗害。M̄-koh風雨ná像孝男án-ne落bē煞，in無法度出去tshíng塗沙、揣蟲thuā，就lóng tsinn-tsinn做一伙kheh燒niâ，mā揣無啥mih齣頭thang pìnn，拄tn̄g làng雨縫ê時tsūn，我就去khioh露螺tńg--來，hōo in有tshenn-tshau thang做點心，iáu khah ti̍t-tia̍p仔。
（Tsit篇文章bat刊tī教育部電子報，漢羅用字有調整，原文網址：https://reurl.cc/893GYM）
