作者：楊晉淵（作者是基進台語讀寫基礎班結業學員、「台語冷智識」YouTuber）
講--起-來tsiânn見笑，iáu未上台文課進前，我一直叫是家己ê台語程度真正好。因為以我tsit沿--ê來講，生活中beh揣一个ē-sái kap我完全用台語開講ê朋友，確實tsiok稀罕--ê，尤其是我koh蹛tī所謂ê「天龍國」。
佳哉pn̄g我拄出世囡仔ê福氣，我開始一步一步踏入台語文ê世界。代先，我為著beh教囡仔精確ê台語，決定報名台文班，希望ē-tàng透過認bat「羅馬拼音」，糾正家己一寡無確定iah是走精--去ê發音，但是就tī開始上課了後，我tsiah正港體會著台語ê深以及台語ê suí，tsiah知影除了基本ê拼音、發音以外，koh有hiah-nī濟規則，hiah-nī濟ài學ê mi̍h件，mā tsiah了解家己講台語ê欠點是luā-nī仔濟。
非常感謝豐惠老師長久以來對台語ê奉獻，開台文讀寫班hōo逐个學員lóng學tsiok濟mi̍h件tńg--去，雖bóng kan-na短短ê 36點鐘，iáu-koh有tsiok濟iáu未學--著--ê，但是ē-tàng有機會接觸著hiah-nī濟有關台語ê智識，對愛台語ê我來講，絕對是一件上歡喜ê代誌。
若beh繼續我ê台語路，suà--落-來koh有tsiânn濟計畫需要來執行，包括繼續講台語、寫台文、寫台語歌、考認證，甚至規劃拍影片做台語YouTuber，用台語教音樂教guitar⋯⋯等等。橫直，tsiânn感謝老師ê教示，希望家己ē-tàng繼續堅持拍拚，有機會hām所有先輩做伙來推sak 台語，做伙改變tsit个環境。
心內話專欄，本文使用教育部推薦漢字kap臺灣閩南語羅馬字拼音方案。
台文通訊BONG報301期，2019年4月出刊。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
