Phàichû
民國一百年十一月尾，tī〈賽德克．巴萊〉tsit齣電影iáu-koh算時行ê期間，我注意著另外一齣記錄片搬演ê消息，m̄-nā是網路頂頭buē少人teh討論，好朋友mā鼓舞我ài揣時間去看。He是拍〈無米樂〉ê莊導演kap顏導演khai五年ê時間koh再完成ê新作品，號做〈牽阮的手〉，有人講看tsit齣電影ê時tsūn ē ná哭ná笑，到底tse是啥mih款ê感覺，我真好奇，就án-ne興tshih-tshih 一直要求guán翁陪我去看。
真無簡單，兩禮拜後ê十二月初，guán tsiah掠著無閒ê空縫beh上網買票，想buē到嘉義無teh搬，我kan-ta ē-tàng就近去台中ia̍h是台南看，而且每日只有兩个播送ê時段。Tī商業利益做前行ê現代社會，我想應該真緊就ē落檔，所以，無顧遠路決定專工走一tsuā台中，表示對本土影片ê支持。另外一方面，我也用期尾考加分ê方式鼓勵學生去看，ǹg望ē得為票房盡淡薄仔心力。
Ē記得電影開始iáu未五分鐘，我ê目屎就liàn--落-來，真怨嘆家己siuⁿ過han-bān，無法度講出為啥mi̍h。Tī過程中也時常hō͘主角天真、浪漫ê個性弄kah笑hai-hai，總算體會著ná哭ná笑ê感覺。Tse有影是一齣真有時代意義ê影片，透過相差十六歲ê男女主角堅持beh牽手過一生ê愛情故事，記錄in性命中所接觸--著ê濟濟為台灣土地奮鬥、犧牲ê人物。表現的手法真幼路，台灣民主運動當中ê重要事件做tsiâⁿ清楚ê交代kap呈現，親像美麗島事件、林義雄住宅血案、鄭南榕自焚tsia-ê大代誌，凡勢tsit-má ê大學生大部份lóng m̄知半項。
電影演出差不多有個外月ê時間，顏導演tī〈蘭權的一封信〉內面án-ne講：「台灣民主運動、社會運動悲壯ê歷史，猶原無法度按頂一代ê手中流傳到下一代ê心中……Guán只有寄望所有受著感動ê朋友，ē-tàng傳承hō͘ koh-khah濟kah咱共生共存tī tsit塊土地ê少年人……」。我問提票根beh來討分數ê學生看了有啥mih感想？有人講伊自頭到尾一直拭目屎；有人講伊對緊張koh驚惶ê畫面印象真深；有人感受著田醫師無hō͘人掠去關ê無奈kah心疼；有人講伊看了kiōng-beh改變支持ê政黨；當然mā有學生講影片lóng講台語，伊看無啥有……。我回應學生講：鼓勵恁去看--ê m̄-nā是愛情、歷史，政治議題更加m̄是我ê出發點，上重要--ê是「台灣」。
最近國際上引起逐家討論--ê，就是北韓ê統治者過身ê消息。看著電視報導北韓全國戒備、人民沿路哭ê畫面，hō͘我想起阿母bat kā我講--過ê代誌，伊講khah早蔣介石往生ê時，全台灣mā是án-ne ê氣氛。Tsit-má咱ē-tàng享受著言論、行動kap傳播各方面ê自由，kám講m̄是影片內底hia-ê人付出血淚、性命所換--來-ê？若無tsit齣電影，少年家仔teh享受民主成果ê時，kám有法度知影？Kám有意願去瞭解？
我相信兩位導演tī tsia ê用心kah苦心，逐家lóng看現現，因為看過電影ê人，應該ē-tàng體會著in ê貢獻不止是牽咱ê手，所牽--起-來--ê，是每一个台灣人ê心。
民國一百年十一月尾，tī〈賽德克．巴萊〉tsit齣電影iáu-koh算時行ê期間，我注意著另外一齣記錄片搬演ê消息，m̄-nā是網路頂頭buē少人teh討論，好朋友mā鼓舞我ài揣時間去看。He是拍〈無米樂〉ê莊導演kap顏導演khai五年ê時間koh再完成ê新作品，號做〈牽阮的手〉，有人講看tsit齣電影ê時tsūn ē ná哭ná笑，到底tse是啥mih款ê感覺，我真好奇，就án-ne興tshih-tshih 一直要求guán翁陪我去看。
真無簡單，兩禮拜後ê十二月初，guán tsiah掠著無閒ê空縫beh上網買票，想buē到嘉義無teh搬，我kan-ta ē-tàng就近去台中ia̍h是台南看，而且每日只有兩个播送ê時段。Tī商業利益做前行ê現代社會，我想應該真緊就ē落檔，所以，無顧遠路決定專工走一tsuā台中，表示對本土影片ê支持。另外一方面，我也用期尾考加分ê方式鼓勵學生去看，ǹg望ē得為票房盡淡薄仔心力。
Ē記得電影開始iáu未五分鐘，我ê目屎就liàn--落-來，真怨嘆家己siuⁿ過han-bān，無法度講出為啥mi̍h。Tī過程中也時常hō͘主角天真、浪漫ê個性弄kah笑hai-hai，總算體會著ná哭ná笑ê感覺。Tse有影是一齣真有時代意義ê影片，透過相差十六歲ê男女主角堅持beh牽手過一生ê愛情故事，記錄in性命中所接觸--著ê濟濟為台灣土地奮鬥、犧牲ê人物。表現的手法真幼路，台灣民主運動當中ê重要事件做tsiâⁿ清楚ê交代kap呈現，親像美麗島事件、林義雄住宅血案、鄭南榕自焚tsia-ê大代誌，凡勢tsit-má ê大學生大部份lóng m̄知半項。
電影演出差不多有個外月ê時間，顏導演tī〈蘭權的一封信〉內面án-ne講：「台灣民主運動、社會運動悲壯ê歷史，猶原無法度按頂一代ê手中流傳到下一代ê心中……Guán只有寄望所有受著感動ê朋友，ē-tàng傳承hō͘ koh-khah濟kah咱共生共存tī tsit塊土地ê少年人……」。我問提票根beh來討分數ê學生看了有啥mih感想？有人講伊自頭到尾一直拭目屎；有人講伊對緊張koh驚惶ê畫面印象真深；有人感受著田醫師無hō͘人掠去關ê無奈kah心疼；有人講伊看了kiōng-beh改變支持ê政黨；當然mā有學生講影片lóng講台語，伊看無啥有……。我回應學生講：鼓勵恁去看--ê m̄-nā是愛情、歷史，政治議題更加m̄是我ê出發點，上重要--ê是「台灣」。
最近國際上引起逐家討論--ê，就是北韓ê統治者過身ê消息。看著電視報導北韓全國戒備、人民沿路哭ê畫面，hō͘我想起阿母bat kā我講--過ê代誌，伊講khah早蔣介石往生ê時，全台灣mā是án-ne ê氣氛。Tsit-má咱ē-tàng享受著言論、行動kap傳播各方面ê自由，kám講m̄是影片內底hia-ê人付出血淚、性命所換--來-ê？若無tsit齣電影，少年家仔teh享受民主成果ê時，kám有法度知影？Kám有意願去瞭解？
我相信兩位導演tī tsia ê用心kah苦心，逐家lóng看現現，因為看過電影ê人，應該ē-tàng體會著in ê貢獻不止是牽咱ê手，所牽--起-來--ê，是每一个台灣人ê心。
( 註：〈牽阮的手〉DVD即時起接受預訂，請揣陳小姐0975-222-819、2011hands@gmail.com。)
