王昭華
今年徛秋--來，想bē到雨水tsiah厚。Tse若是tī淡水，tsiâⁿ正常，就是一tsūn雨來一tsūn冷，準備beh tshu落去寒天--ah。M̄-koh，tsín是tī下港。今年熱天tī屏東kap西北雨重逢，tsiah hō͘我發現一个心適ê事實：Tī淡水生活tsiah濟冬，熱--人、寒--人，雨koh-khah按怎落，從來bē去想著tsit味──炒螺仔肉；想bē到轉來屏東，大雨一tsūn落，收煞了後，tī tâm濕濕ê空氣內底，suah ē ná親像鼻著九層塔落鼎khiàn芳ê味，bē輸『幻聞』ê症頭，開始思念tsiok久m̄-bat思念ê炒露螺。
平平是落雨，平平是tâm-lok-lok，為啥mi̍h tī淡水bē去想著炒露螺tī屏東ē？我teh想in是到底差tī佗。原來，tī我無意識ê記憶體內底，並m̄是落雨就ē link tuì露螺，濕空氣當中koh ài包括真濟其他ê元素，tse其中上主要ê元素是田塗，田塗ê塗氣。Tī打馬膠kap紅毛塗khōng kah tīng-khong-khong ê城市，落雨，露螺已經hō͘我放bē記。Tsiah濟年來tī都市tn̄g著伊，lóng是透過「快炒」店冰箱ê玻璃，看伊結規包凍tī hia，ia̍h無就是已經退冰，tī盤仔kap九層塔hiam椒仔配了好看樣，排beh等人客點。Tsîng做囡仔，一直感覺炒螺仔肉ê螺仔，hit型有sîng『拿破崙』ê帽仔，一大堆超級細頂ê『拿破崙』ê帽仔，哺著脆脆，tsiok好食！M̄-koh，he「一頂一頂」帽仔lóng是非常費氣tsiah食有--ê。
因為徛家tī鎮內街--裡，我從來m̄-bat去園--裡khioh過露螺，lóng是看大人khioh--轉-來，規口灶開始無閒：hám，hám 螺仔殼；剁，腹內剁hiak-ka̍k；洗，用礬ia̍h是火hu kā siûⁿ洗清氣，tsiok oh洗。落雨tap滴ê天氣，看大人剁露螺、洗露螺，愛食m̄驚厚工，舞規晡，逐个lóng tsiok期待暗頓ê炒螺仔肉……tsit-má已經罕得有tsit款「性命教育」ê機會--ah，踮厝看大人tī phòng-phuh仔跤剁露螺，「死亡」實實在在在眼前，刀下隨看ē著生物ê「內在」(腹內)，kap刣雞割喉無仝，露螺完全bē出聲，mā bē流血。
一直到頂個月，有一工出大日頭，tī朋友農舍大門一入--來ê空地仔，看見一堆細細粒、ná綠豆
蒜ê黃豆仔──拄開始，懷疑是『BB彈』，m̄-koh想講哪ē hiah細粒？為啥mi̍h hō͘人hiat tī tsia？……ni一粒起來摸看māi，suah小出力就破，原來是有殼ê卵，是講，鳥仔卵哪有可能hiah細粒？……半都市sông，從來m̄-bat看--過，mā想bē到，he是露螺ê卵，而且，就是細漢愛食ê「非洲大露螺」ê卵。
我感覺露螺卵ê色緻，「黃」了無kài自然，ná囡仔tshit-thô-mi̍h ê黃、塑膠ê黃，大自然kám也有tsiah-nī hiáⁿ ê黃？但是我隨想著金寶螺ê卵，想起第一擺看著金寶螺卵ê感覺。Hit tang-tsūn小學四年，隔壁班一个tiāⁿ做伙sńg ê朋友kā我講，伊kap in弟弟有公家飼金寶螺喔，我若beh看ē-tàng去in兜。Hit站仔金寶螺拄引進台灣無外久，ná像真希罕，我mā幻想，一定是像「金寶」án-ne金sih-sih ê螺，tsiah ē hō͘人號做「金寶螺」。
一个拜六ê e晡，我真正tuè伊轉去厝。透天ê販厝，一樓空空，in主要活動lóng tī二樓。「In」，kan-ta伊、in媽媽、in弟弟，我聽講in爸爸行船，走遠洋--ê，kài少tī厝。一跤塑膠桶仔內，桶仔邊黏幾仔隻烏lu烏lu無啥tín動ê「金寶螺」，tse就是「金寶螺」？完全拍破我對「金寶」ê幻想。桶仔內，除了金寶螺kap菜葉仔，koh有一phû一phû紅紅--ê……一粒一粒，m̄知是啥貨。朋友講，he就是金寶螺ê卵──金寶螺ê卵ê紅，超過我ê幻想，hō͘做囡仔ê我心內產生強烈ê「不可思議」ê感受──為啥mi̍h，烏lu烏lu koh lio̍h仔臭羶臭羶ê金寶螺，ē有ná像「霓虹」色ê卵？(若用『王樣』水彩，可能ài用玫瑰紅koh加朱紅)Hit款紅，是我進前tī自然中m̄-bat看--過-ê，按怎看to感覺假假，脆弱ê卵，用tsiah-nī tsha̍k目ê色，kám妥當？但是我ê朋友無騙--我，he真正是金寶螺ê卵。第一擺看著金寶螺ê時，伊iáu-koh hō͘逐家非常寶惜，是為逐家帶來希望ê生物。
Siáng.想ē到，無外久，台灣一sì-kè ê田，lóng看ē著朱紅帶霓虹ê金寶螺卵黏tī稻身，害死作穡人beh哭無目屎。
「先住民」非洲大露螺kap「新住民」金寶螺仝款，lóng是因為有人有美夢，tsiah ē移民來台灣。非洲大露螺本來tī非洲活了好好，無人tshap無人管，1930年代，法國殖民統治非洲，去hō͘法國人發現非洲大露螺，料理做法國菜，風味絕佳，非洲大露螺自án-ne開始「過番」，湠到南洋。日本政府鼻著大露螺ê「商機」，想講掠幾隻仔來台灣試飼看māi，1933年下條九馬一tuì新加坡引進台灣，價siàu一粒日票一圓(tng當時中層ê公務人員月俸tsiah三十圓)，beh飼ê民眾tio̍h-ài提出申請，申請通過tsiah照分配--ê…。
大露螺照理來講，應該bē kā卵生tī直接曝日ê紅毛塗埕。Hit幾工，隔壁ê敏豆仔園洗藥仔，我想，有身ê露螺可能是tī逃亡ê路--裡，將卵吐tī tsia。朋友ê農舍四邊，是hit附近難得無洗藥仔ê地，非洲大露螺愈來愈濟，我有感覺in ná像是聽著消息相招逃來難民營仝款。火金姑ē食露螺ê幼嬰，m̄-koh，大露螺難民營--裡，我kan-ta看過一隻火金姑，tī天全暗ê園仔半空中浮--一-下、浮--一-下，teh揣伴ia̍h teh揣食？一種「浩劫餘生」後m̄知是人燈ia̍h是鬼火ê錯覺。
公路邊『收購蝸牛』ê kha̋ng-páng，見擺經過lóng無看人tī hia，可能是ài khà手機仔去聯絡ê款。「炒螺肉」、「炒豬腳筋」、「炒山河」，「身土不二」ê鄉土料理，就是tsia--ê-ah。我想起tī淡水ê『康是美』，結帳ê時看著櫃檯邊--a ê主推產品『蝸牛黏液面膜』──Aih，查某人真正起痟--ah，無--喔，應該是－－beh趁查某人ê錢ê人起痟--ah。
『蝸牛黏液』，『黏液』應該就是台語講--ê、siûⁿ-siûⁿ ê「siûⁿ」。目前是聽講，南美洲智利ê螺仔露螺tsiah有tsit款魔幻ê效力。Tī時風水輪流轉，tio̍h到台灣ê非洲大露螺出頭天--哩？落雨天，閒閒無代誌，khioh露螺來tsim面(m̄是Rolex)……有啥mi̍h是無可能--ê？
今年徛秋--來，想bē到雨水tsiah厚。Tse若是tī淡水，tsiâⁿ正常，就是一tsūn雨來一tsūn冷，準備beh tshu落去寒天--ah。M̄-koh，tsín是tī下港。今年熱天tī屏東kap西北雨重逢，tsiah hō͘我發現一个心適ê事實：Tī淡水生活tsiah濟冬，熱--人、寒--人，雨koh-khah按怎落，從來bē去想著tsit味──炒螺仔肉；想bē到轉來屏東，大雨一tsūn落，收煞了後，tī tâm濕濕ê空氣內底，suah ē ná親像鼻著九層塔落鼎khiàn芳ê味，bē輸『幻聞』ê症頭，開始思念tsiok久m̄-bat思念ê炒露螺。
平平是落雨，平平是tâm-lok-lok，為啥mi̍h tī淡水bē去想著炒露螺tī屏東ē？我teh想in是到底差tī佗。原來，tī我無意識ê記憶體內底，並m̄是落雨就ē link tuì露螺，濕空氣當中koh ài包括真濟其他ê元素，tse其中上主要ê元素是田塗，田塗ê塗氣。Tī打馬膠kap紅毛塗khōng kah tīng-khong-khong ê城市，落雨，露螺已經hō͘我放bē記。Tsiah濟年來tī都市tn̄g著伊，lóng是透過「快炒」店冰箱ê玻璃，看伊結規包凍tī hia，ia̍h無就是已經退冰，tī盤仔kap九層塔hiam椒仔配了好看樣，排beh等人客點。Tsîng做囡仔，一直感覺炒螺仔肉ê螺仔，hit型有sîng『拿破崙』ê帽仔，一大堆超級細頂ê『拿破崙』ê帽仔，哺著脆脆，tsiok好食！M̄-koh，he「一頂一頂」帽仔lóng是非常費氣tsiah食有--ê。
因為徛家tī鎮內街--裡，我從來m̄-bat去園--裡khioh過露螺，lóng是看大人khioh--轉-來，規口灶開始無閒：hám，hám 螺仔殼；剁，腹內剁hiak-ka̍k；洗，用礬ia̍h是火hu kā siûⁿ洗清氣，tsiok oh洗。落雨tap滴ê天氣，看大人剁露螺、洗露螺，愛食m̄驚厚工，舞規晡，逐个lóng tsiok期待暗頓ê炒螺仔肉……tsit-má已經罕得有tsit款「性命教育」ê機會--ah，踮厝看大人tī phòng-phuh仔跤剁露螺，「死亡」實實在在在眼前，刀下隨看ē著生物ê「內在」(腹內)，kap刣雞割喉無仝，露螺完全bē出聲，mā bē流血。
一直到頂個月，有一工出大日頭，tī朋友農舍大門一入--來ê空地仔，看見一堆細細粒、ná綠豆
蒜ê黃豆仔──拄開始，懷疑是『BB彈』，m̄-koh想講哪ē hiah細粒？為啥mi̍h hō͘人hiat tī tsia？……ni一粒起來摸看māi，suah小出力就破，原來是有殼ê卵，是講，鳥仔卵哪有可能hiah細粒？……半都市sông，從來m̄-bat看--過，mā想bē到，he是露螺ê卵，而且，就是細漢愛食ê「非洲大露螺」ê卵。
我感覺露螺卵ê色緻，「黃」了無kài自然，ná囡仔tshit-thô-mi̍h ê黃、塑膠ê黃，大自然kám也有tsiah-nī hiáⁿ ê黃？但是我隨想著金寶螺ê卵，想起第一擺看著金寶螺卵ê感覺。Hit tang-tsūn小學四年，隔壁班一个tiāⁿ做伙sńg ê朋友kā我講，伊kap in弟弟有公家飼金寶螺喔，我若beh看ē-tàng去in兜。Hit站仔金寶螺拄引進台灣無外久，ná像真希罕，我mā幻想，一定是像「金寶」án-ne金sih-sih ê螺，tsiah ē hō͘人號做「金寶螺」。
一个拜六ê e晡，我真正tuè伊轉去厝。透天ê販厝，一樓空空，in主要活動lóng tī二樓。「In」，kan-ta伊、in媽媽、in弟弟，我聽講in爸爸行船，走遠洋--ê，kài少tī厝。一跤塑膠桶仔內，桶仔邊黏幾仔隻烏lu烏lu無啥tín動ê「金寶螺」，tse就是「金寶螺」？完全拍破我對「金寶」ê幻想。桶仔內，除了金寶螺kap菜葉仔，koh有一phû一phû紅紅--ê……一粒一粒，m̄知是啥貨。朋友講，he就是金寶螺ê卵──金寶螺ê卵ê紅，超過我ê幻想，hō͘做囡仔ê我心內產生強烈ê「不可思議」ê感受──為啥mi̍h，烏lu烏lu koh lio̍h仔臭羶臭羶ê金寶螺，ē有ná像「霓虹」色ê卵？(若用『王樣』水彩，可能ài用玫瑰紅koh加朱紅)Hit款紅，是我進前tī自然中m̄-bat看--過-ê，按怎看to感覺假假，脆弱ê卵，用tsiah-nī tsha̍k目ê色，kám妥當？但是我ê朋友無騙--我，he真正是金寶螺ê卵。第一擺看著金寶螺ê時，伊iáu-koh hō͘逐家非常寶惜，是為逐家帶來希望ê生物。
Siáng.想ē到，無外久，台灣一sì-kè ê田，lóng看ē著朱紅帶霓虹ê金寶螺卵黏tī稻身，害死作穡人beh哭無目屎。
「先住民」非洲大露螺kap「新住民」金寶螺仝款，lóng是因為有人有美夢，tsiah ē移民來台灣。非洲大露螺本來tī非洲活了好好，無人tshap無人管，1930年代，法國殖民統治非洲，去hō͘法國人發現非洲大露螺，料理做法國菜，風味絕佳，非洲大露螺自án-ne開始「過番」，湠到南洋。日本政府鼻著大露螺ê「商機」，想講掠幾隻仔來台灣試飼看māi，1933年下條九馬一tuì新加坡引進台灣，價siàu一粒日票一圓(tng當時中層ê公務人員月俸tsiah三十圓)，beh飼ê民眾tio̍h-ài提出申請，申請通過tsiah照分配--ê…。
大露螺照理來講，應該bē kā卵生tī直接曝日ê紅毛塗埕。Hit幾工，隔壁ê敏豆仔園洗藥仔，我想，有身ê露螺可能是tī逃亡ê路--裡，將卵吐tī tsia。朋友ê農舍四邊，是hit附近難得無洗藥仔ê地，非洲大露螺愈來愈濟，我有感覺in ná像是聽著消息相招逃來難民營仝款。火金姑ē食露螺ê幼嬰，m̄-koh，大露螺難民營--裡，我kan-ta看過一隻火金姑，tī天全暗ê園仔半空中浮--一-下、浮--一-下，teh揣伴ia̍h teh揣食？一種「浩劫餘生」後m̄知是人燈ia̍h是鬼火ê錯覺。
公路邊『收購蝸牛』ê kha̋ng-páng，見擺經過lóng無看人tī hia，可能是ài khà手機仔去聯絡ê款。「炒螺肉」、「炒豬腳筋」、「炒山河」，「身土不二」ê鄉土料理，就是tsia--ê-ah。我想起tī淡水ê『康是美』，結帳ê時看著櫃檯邊--a ê主推產品『蝸牛黏液面膜』──Aih，查某人真正起痟--ah，無--喔，應該是－－beh趁查某人ê錢ê人起痟--ah。
『蝸牛黏液』，『黏液』應該就是台語講--ê、siûⁿ-siûⁿ ê「siûⁿ」。目前是聽講，南美洲智利ê螺仔露螺tsiah有tsit款魔幻ê效力。Tī時風水輪流轉，tio̍h到台灣ê非洲大露螺出頭天--哩？落雨天，閒閒無代誌，khioh露螺來tsim面(m̄是Rolex)……有啥mi̍h是無可能--ê？
