總編輯廖瑞銘教授在兩份歷史悠久的文學雜誌合刊第一期，寫下了他的回顧及展望，不管你是台語文的老朋友，還是剛到的新朋友，亦或你只是偶然路過，我們都歡迎你透過《台文通訊BONG報》，進入台語文學的美麗世界。
廖瑞銘
因為是讀歷史出身--ê，我對任何事工lóng習慣性ài做歷史回顧，來檢討行--過ê路，koh uì檢討中思考suà--落-來ê路beh按怎行。《台文通訊》創刊二十週年、《台文BONG報》創刊十五週年，tī台語文運動中lóng算是長歲壽ê刊物，有資格thang做歷史回顧--ah。
廖瑞銘
因為是讀歷史出身--ê，我對任何事工lóng習慣性ài做歷史回顧，來檢討行--過ê路，koh uì檢討中思考suà--落-來ê路beh按怎行。《台文通訊》創刊二十週年、《台文BONG報》創刊十五週年，tī台語文運動中lóng算是長歲壽ê刊物，有資格thang做歷史回顧--ah。
《台文通訊》是tī海外編輯發行ê台語文運動刊物（註），伊ê宗旨是beh實踐「喙講台語，手寫台文」ê理念，所以，初期刊--出ê文章khah偏重運動性，說理--ê、報導--ê佔大部份，文學作品只是「副刊」性質。《台文BONG報》是tī台灣創刊發行，而且koh自開始就定位tī「台語文學專門雜誌」，運動性ê文章無beh刊，消息報導是附帶ê服務。《台文通訊》頭五年ài容納海內外所有ê台文作品，有《台文BONG報》了後，兩个刊物tsiah照創刊時ê宗旨量約仔做編輯分工。2006年，台灣ê李江却台語文教基金會決定接手《台文通訊》總發行工作，《台文通訊》kap《台文BONG報》兩爿編輯ê溝通更加密切，實際上已經有合刊ê粗坯--ah。Gún透過意見調查kap濟濟ê支持者討論真久，到舊年（2011）底tsiah做最後ê決定beh合刊。
《台文通訊》kap《台文BONG報》tsit兩份刊物tī tsit-tsūn合刊發行，顯示三項歷史意義：
第一、海內外台語文運動力量ê結合：台語文運動uì海外湠轉來台灣，已經成熟釘根，穩定發展。
第二、「漢羅lām寫」書寫形式ê成熟：Tsit兩刊所用ê「漢羅lām寫」書寫形式，已經tsiâⁿ做社會普遍tik ē-tàng接受ê台語文字系統。
第三、語文主體性理想ê期待：台語文運動所追求ê「母語權」，是beh用台語表達生活ê一切，建立咱ê「語文主體性」，兩刊合刊發行，期待uì台語文學出發，刊載koh-khah濟領域分類ê台語文，完成語文主體性ê理想。
「通訊」kap「BONG報」lóng是運動性質定位ê刊物名稱，iáu停留tī推（tshui）廣、鼓吹人來看ê階段，希望咱繼續拍拚，當「講台語」、「寫台文」，無需要解說、無需要勉強，成做咱生活ê自然，到hit-tsūn，咱就ē需要一份呈現台語文化生活ê綜合媒體。
咱tsit-tsūn ê合刊是beh迎接hit一日ē khah早臨到。
（註：Tī北美負責十二冬發行工作--ê是聰美姊紀念基金會，tī台灣頭一冬負責發行工作--ê是前衛出版社，真感謝in ê熱情kap奉獻。）
（作者是本雜誌ê發行人兼總編輯，mā是中山醫學大學台語系系主任）
