Huibi
我問阿爸：「咱兜到底是飼幾冬豬？」阿爸想想--咧講：「毋知--咧！飼有夠久--ê--neh！」
較早Guán兜有飼豬，飼豬ê工課大部分是阿爸--ê。Tuì揀豬母開始，阿爸講豬母愛揀體型長、身體勇、奶pha整齊--ê，上重要是眼神看--起-來愛溫馴得人疼，毋通像彼鷹仔目，豬母若歹，生囝ê時，無人敢倚近，囝會予伊踏踏--死。
阮兜ê豬母成乖，欲生進前，阿爸會先鋪稻草做產床，稻草軟軟 ，豬仔囝生--出-來較安全，kiann-lâng嘛較袂kō著塗跤。Teh生ê時，愛一隻一隻勻勻仔抱--起-來，bē-sái無注意去予豬母teh著。若生sionn濟，奶pha無夠，就愛輪流suh奶，這隻suh兩喙換彼隻。過幾禮拜，豬仔囝漸漸大漢，才開始食豬菜、嚙豆箍。
阿母普通時á攏咧 kāng做工，若無工通做，tō去khau豬菜，烏甜仔菜、豬母奶、蕃薯藤 ……，tuì 庄頭khau kah庄尾，閣 khau過庄去；sionn遠ê所在，阿母tō招厝邊阿嬸做伙，時間節hōo好，阿爸阿叔下班才騎車去載--in。
若無出門，阿母會踮埕--裡絪柴，kā曝焦ê甘蔗葉 頭仔尾仔tān-tān拗拗--咧，中央縛一ê結， 挈這來起火；紲落去閣phāinn布袋去米絞put粗糠；我和阿姐嘛愛去學校khioh樹枝、掃麻黃gím-á轉來相添 。
豬菜斬斬剁剁--咧，囥佇一ê大鼎煮，番仔火劃--一-下，甘蔗絪點著，tsinn入去灶空內，然後用樹枝、麻黃gím-á、粗糠繼續燃。添柴顧火ê工作是囡仔--ê，我常在像新婦仔，hōng派佇灶前罰徛。不知是灶老矣，抑是煙筒that--起-來，特別若透tuè一勢風ê時，灶空內ê火攏會pōng出來，囡仔人袂曉閃避，粗糠pōng kah規頭規面， 目睭tàng--咧一直juê， 驚講妖魔鬼怪毋知會tng等這個烏天暗地ê時陣，來kā囡仔掠去未?
阿爸講kan-na食豬菜，胃腸袂勘得，gâu落屎，所以豬菜內底愛lām蕃薯簽、樹薯粉。樹薯粉是用賒--ê，賣樹薯彼個好額ê毋愛人欠siàu，踮樹薯粉內底摻塗沙粉仔，秤著較重，豬菜煮--落-去，鼎底一 tîng沙才知影，就算你逐遍月給領著抑是豬仔賣去，隨去還錢，也是仝款，散赤人只好恬恬仔忍耐。
毋過厝內有飼豬ê人，攏有一項歡喜ê記持，就是閹豬仔lān-hu̍t彼工，雖然豬仔可能成無爽快，但是這家伙仔就會鼻著一陣麻油芳，就有一頓讚--ê。
豬仔一日飼二頓。阿爸佇小學教冊，彼當陣，小學生中晝愛排隊轉去厝--裡食飯，阿母若無佇--咧，阿爸愛款飯予guán食， 閣愛飼豬，記憶中上深ê一件代誌就是佇這趕狂的時陣發生--ê。阿爸一khok一khok khat予豬食，小弟佇遐peh起peh落，準備等--一-下欲hām阿爸去學校，想袂到無張持予一支掃梳kê著，跋一倒，目睭尾kho̍k著磚仔角，阿爸聽著小弟ai一聲血流出來，豬無khuà飼，囝仔載--咧，去揣伊ê朋友齒科藤仔。 齒科藤仔kā小弟注麻射thīnn 三針，阿爸看針tu̍h lueh，家己tsông-á起烏暗眩，面色轉白 ，藤仔in某看著，趕緊斟一杯燒茶予啉lueh，才較好勢。每一kài阿爸阿母若想起過去的艱苦代，tō會講著這項，講這就是爸母心，彼針kán-ná鑿佇爸母ê心肝。
豬仔予人ê感覺是貪食閣腌臢--ê，不過我真罕得鼻著guán兜ê豬牢有啥物怪味，阿爸隨時會kā豬屎清掉，用hóo-suh幫豬仔洗身軀，kā塗跤沖kah清氣tam-tam。而且豬仔若好喙斗，圍佇豬槽邊食kah咂咂叫，我看阿爸攏是一ê成滿足輕鬆ê表情。
豬若gâu食閣gâu睏，幾個月後，就變真大隻，掠豬ê人tō來矣！掠豬--ê提一把黃麻皮來guán兜編索仔，彼索仔是準備欲捆豬--ê，in kā黃麻皮拍一ê活結，套蹛正跤ê大頭拇，然後像查某囡仔pa̍k毛尾仔按呢編--起-來，一面講笑。我問阿爸in是按怎毋kā索仔編好才來？阿爸講，彼是刁工來咧監督，無欲予人賣豬進前飼豬，豬飼愈重，in愛付愈濟錢。
掠豬ê過程成殘忍，阿爸阿母叫囡仔閃一邊，無愛予guán看，kan-na聽著吱吱叫ê聲 。
Gún爸母常在咧講，gún ê註冊費是豬仔幫guán納--ê，賣一tsuí豬，繳一遍註冊費拄拄好。爸母落落長飼豬ê生涯，終於佇大兄大學卒業，出來食頭路了後結束啦！Guán kā豬牢拆掉，起一間新灶跤，阿爸阿母減一項工課，好不容易會當較清閒矣 ！
