感恩陳雷
社會組 第三名
/ 吳雅雯
認bat陳雷是ùi《鄉史補記》chit本冊開始。Chhím頭拄讀ê時是hō͘伊驚--著，真正是紅狗蟻，有夠厲害！有才調用八个家族歷史，以平埔族ê主體來重建台灣歷史。Ùi內容感受伊對台灣kap家己族群厚厚厚ê情感，內底豐富、súi-khùi ê台語詞彙ē-tàng看出陳雷ê文學工夫。有真濟詞彙是我頭擺接觸，我就bē輸一个iau過頭koh tng-leh大ê囡仔，直直吸收phong-phài ê台語文字，mā直直感受台語ê súi。以chit本冊做基礎，拍開我認bat陳雷文選chit條路。本chiâⁿ我想講是leh讀一本小說niā-niā，落尾chiah知影，我讀--ê m̄是kan-na作品，是一條認bat台灣、認bat台語，mā認bat家己ê路。
我心內有一个願望，就是有一工ē-tàng參加陳雷ê演講iah是營隊活動。原本想講iáu有機會親身聽伊講課、tng面請伊簽名。想bē到，舊年（2025年）就聽著伊過身ê消息，心內真m̄甘、真哀傷。無機會上陳雷ê課，chit部份ê遺憾只好更加拚勢讀伊ê作品，愈讀愈深深認同陳雷是一位chiok出tioh ê頭人。伊ê文字幼路koh有內才，用台語ê羅馬字來描述情景比漢字koh-khah tàu-tah，讀--著ná看--著。Tiāⁿ-tiāⁿ一段文字就hō͘我停--落-來，翻頭koh讀幾若擺。
陳雷講故事真有步，每一个故事lóng ē藏機關tī內面，hō͘你讀ê時chūn bē無聊，對故事劇情充滿期待。故事主角是生活tī台灣ê普通老百姓，有時故事是悲傷koh無奈，伊ē摻一寡仔調味，hō͘悲傷程度小可仔降低，沓沓仔來講--出，對人物描寫，你ē-tàng感受伊對台灣人ê疼惜kap感情。Che是陳雷ê個性反映tī作品內，我m̄ bat參伊chih接--過，m̄-koh我ùi作品ē-tàng感受伊是一位感情飽tīⁿ ê人。
陳雷是一位攑筆ê戰士，透過作品kā二二八、白色恐怖chia-ê歷史記持寫--落-來，hō͘後代bē放bē記--得，beh實現公平正義。我發現歷史m̄是kan-na課本內底ê年代kap事件，koh是chiâⁿ濟家庭真實ê性命故事，mā m̄是kan-na發生tī過去，是hō͘ lán有向前行ê勇氣kap責任。
拄開始我一直認為台語kan-na是生活ê語言，透過閱讀陳雷作品chiah知影台語mā ē-tàng是文學ê語言。翻頭發現原來台語m̄-nā是日常講ê話，mā ē-tàng hiah-nī súi、hiah-nī有力量，ē-tàng承載lán chit塊土地ê歷史、記持kap情感。陳雷留hō͘--我--ê，m̄是一本一本ê作品，是一條一條用台語認bat台灣、認bat家己ê路。Chit條路到taⁿ iáu未行煞。我ē跟tòe伊ê跤步繼續讀、繼續寫，繼續用台語倚近chit塊土地。因為對我來講，陳雷m̄ bat親身教我一門課，m̄-koh伊ê作品，soah是我學台語、攑筆寫台文引我入門ê師父。
我心內有一个願望，就是有一工ē-tàng參加陳雷ê演講iah是營隊活動。原本想講iáu有機會親身聽伊講課、tng面請伊簽名。想bē到，舊年（2025年）就聽著伊過身ê消息，心內真m̄甘、真哀傷。無機會上陳雷ê課，chit部份ê遺憾只好更加拚勢讀伊ê作品，愈讀愈深深認同陳雷是一位chiok出tioh ê頭人。伊ê文字幼路koh有內才，用台語ê羅馬字來描述情景比漢字koh-khah tàu-tah，讀--著ná看--著。Tiāⁿ-tiāⁿ一段文字就hō͘我停--落-來，翻頭koh讀幾若擺。
陳雷講故事真有步，每一个故事lóng ē藏機關tī內面，hō͘你讀ê時chūn bē無聊，對故事劇情充滿期待。故事主角是生活tī台灣ê普通老百姓，有時故事是悲傷koh無奈，伊ē摻一寡仔調味，hō͘悲傷程度小可仔降低，沓沓仔來講--出，對人物描寫，你ē-tàng感受伊對台灣人ê疼惜kap感情。Che是陳雷ê個性反映tī作品內，我m̄ bat參伊chih接--過，m̄-koh我ùi作品ē-tàng感受伊是一位感情飽tīⁿ ê人。
陳雷是一位攑筆ê戰士，透過作品kā二二八、白色恐怖chia-ê歷史記持寫--落-來，hō͘後代bē放bē記--得，beh實現公平正義。我發現歷史m̄是kan-na課本內底ê年代kap事件，koh是chiâⁿ濟家庭真實ê性命故事，mā m̄是kan-na發生tī過去，是hō͘ lán有向前行ê勇氣kap責任。
拄開始我一直認為台語kan-na是生活ê語言，透過閱讀陳雷作品chiah知影台語mā ē-tàng是文學ê語言。翻頭發現原來台語m̄-nā是日常講ê話，mā ē-tàng hiah-nī súi、hiah-nī有力量，ē-tàng承載lán chit塊土地ê歷史、記持kap情感。陳雷留hō͘--我--ê，m̄是一本一本ê作品，是一條一條用台語認bat台灣、認bat家己ê路。Chit條路到taⁿ iáu未行煞。我ē跟tòe伊ê跤步繼續讀、繼續寫，繼續用台語倚近chit塊土地。因為對我來講，陳雷m̄ bat親身教我一門課，m̄-koh伊ê作品，soah是我學台語、攑筆寫台文引我入門ê師父。
