田螺，只不過大頭拇大，kan-ta一粒，哪有可能煮九碗公湯neh！因此，講人「一粒田螺煮九碗公湯」，是leh講人講話，iah是做代誌真譀古、真hau-siâu ê意思。
M̄-koh，有hit種話，就有hit種人，mā ē 發生hit種代誌。
2007年媒體報導：美國華府行政法官皮爾森，一條西裝褲去hō͘「保證顧客滿意」ê韓僑洗衫店拍無--去，無打緊，koh烏白提別人ê褲hō͘--伊。
洗衫店違約1200工。皮爾森決定告官，伊算算--leh，in一家三口遭受褲無--去ê精神損失，總--à共--ā 6700萬美金。
消息一傳--出-去，網路論壇、電視脫口秀相爭恥笑，皮爾森落軟，主動降價變5400萬美金。雖然án-ne，網友iáu批評講「夭壽骨，5400萬ē-tàng買hit條800 kho͘ ê褲84115領neh！美國有線電視講為報導tsit層新聞，in mā受著tsiâⁿ大ê精神損失，mā ài告皮爾森，要求賠償。
Tsit號「一粒田螺煮九碗公湯」ê官司，法官最後做--出ê判決：消保法雖然維護顧客權益，不過，任何人bē-sái提保護人ê法律，lām-sám告--人。洗衫店頭家並無犯消保法條，所以免賠半角；而且起訴費用1000 kho͘美金，由原告負擔。
宣判了，原告、被告lóng mà-mà-háu。
哈哈，天跤下，真是無奇不有。一粒田螺煮九碗公湯tsit號代誌，譬喻譬喻ē-sái，化做行動，真正是ē笑破人ê喙。
(作者是屏東縣里港國小學校長退休)
