作者：顏毓黛
我是tī一个傳統ê家庭大漢ê囡仔，台語是我第一个使用ê語言。細漢ê時chūn，我lóng kap阿媽鬥陣看電視，逐工下晡6點半，我就hām阿媽做伙看楊麗花ê歌仔戲，chit時ê我，kan-na ē-hiáu講台語。讀冊了後，tī學校ài講「國語」，tńg去厝內ài講台語。有tang時仔ē bē記得轉換：tī學校講台語，ē hō͘老師罰錢；tī厝內講「國語」，阿媽ē kā我講伊聽無--lah，我就緊用台語koh講--一-遍。
對tī厝內ài講台語chit件代誌，我並無真要意。一直到有一kái全家伙仔鬥陣食暗頓，我ná食ná講學校趣味ê代誌，阿爸雄雄大聲hoah：「講台語！」我hō͘阿爸無歡喜ê口氣驚一tiô。因為án-ne，我chiah提醒家己，tī厝內ài講台語。雖bóng我m̄知阿爸是按怎受氣，m̄-koh，我真感謝--伊。
阿爸對台語有莫名ê堅持，伊是一个虔誠ê佛教徒，伊ē用台語讀經，雖然，我無了解經文ê意思，m̄-koh我真享受伊朗讀ê音韻。到我tī成功大學讀冊ê時chūn，阿爸ē叫我kap伊做伙聽師父講經。師父用文雅ê台語解soeh經文，hō͘我真正欽佩！可能因為阿爸ê堅持，我對台語有正確ê看法，無kā當做粗俗ê語言看待，mā hō͘我對台語有興趣。
一直到taⁿ，我iáu是ē鼓勵家己ê囡仔，ài tiāⁿ-tiāⁿ講台語，因為語言ê thn̂g湠，家庭是上基礎ê生活教育，學校是koh-khah深ê湠根kap推廣。真好運我有chit兩款身份，我願意為chit个súi koh好ê語言付出上大ê心力，hō͘ koh-khah濟人用chit个言語，體會台語文化ê內涵。
做一个「國文」老師，我tiāⁿ-tiāⁿ ē用台語上課，mā bat hō͘家長抗議，認為台語siūⁿ過粗俗，無kah意囡仔學台語。雖然當時我嚴肅kā反駁，語文ê雅俗是由使用者來決定。Chit件代誌hō͘我真大ê衝擊，m̄-koh我無因為án-ne就改變做法，加上現此時ê「國文」教材，有bē少台灣文學作品，若ē-tàng用台語來解soeh，文意就ē-tàng koh-khah完整表達。另外，古詩文若用台語來讀，音韻ē koh-khah有味。所以，我tiāⁿ-tiāⁿ用台語朗讀古詩文，m̄-koh不時讀bē順。
自án-ne，我決定加入研讀台語chit條路。初初入去成大台語公費班ê時，真正是「鴨仔聽雷」，尤其是金花老師ê台語課，kan-na八聲調就hō͘我一粒頭兩粒大，書寫、拼音，是koh-khah大ê挑戰。但是非常感謝金花老師ê熱情kap用心，lóng真有耐心chhōa逐家練習，hō͘阮一步一步向前行。所以，我相信「一枝草，一點露」，只要我意志堅定，一步一跤印，我ê台語能力一定ē有進步。Ǹg望家己ē-tàng通過台語認證，chiâⁿ做一个台語老師，為台語教育ê thn̂g湠盡一份心力。
