黃昏美夢

Hông-hun Bí-bāng


作者:陳雷


(本文是漢羅合用kap全羅馬字一段一段對照)


Lán人逐暝做夢,m̄-kú khah常是精神就bē記得了了。最近一个夢,精神了,夢--裡ê代誌、對話、景緻……前前後後清清楚楚、實實在在,bē輸是tú-chiah ùi hit个現實ê世界tńg來chit个現實,m̄是做夢。

Lán lâng ta̍k mê chò-bāng, m̄-kú khah-siông sī cheng-sîn tō bē-kì-tit liáu-liáu. Chòe-kīn 1 ê bāng, cheng-sîn liáu, bāng--nih ê tāi-chì, tùi-ōe, kéng-tì.... chêng-chêng-āu-āu, chheng-chheng-chhó-chhó, si̍t-si̍t-chāi-chāi, bē-su sī tú-chiah ùi hit ê hiān-si̍t ê sè-kài tńg-lâi chit ê hiān-si̍t, m̄ sī chò-bāng.


我行來到一欉大樹跤。大枝樹oe下面吊一幅圖,差不多普通ê電視hiah大面,彩色粉筆畫--ê,真súi koh真熟sāi。Kā看,原來是台灣南部hit个草地小所在麻豆ê景緻——我ê故鄉ê田園。熱--人ê黃昏,一大phiàn金色ê稻仔。遠遠一chōa糖廠ê小火車teh走,一chat一chat,甘蔗囤tīⁿ-tīⁿ。詳細kā看,上下面角角仔一chōa幼字,霧霧讀無。可能是chit張圖ê名,或者畫ê人名,看--起-來真成我ê朋友林心智先生ê形體。

Góa kiâⁿ-lâi kàu 1 châng tōa-chhiū-kha. Tōa ki chhiū-oe ē-bīn tiàu 1 pak tô͘, chha-put-to phó͘-thong ê tiān-sī hiah tōa bīn, chhái-sek hún-pit ōe--ê, chin súi koh chin se̍k-sāi. Kā khòaⁿ, goân-lâi sī Tâi-oân lâm-pō͘ hit ê chháu-tē sió só͘-chāi Môa-tāu ê kéng-tì – góa ê kò͘-hiong ê chhân-hn̂g. Joa̍h--lâng ê hông-hun, 1 tōa phiàn kim-sek ê tiū-á. Hn̄g-hn̄g 1 chōa thn̂g-chhiúⁿ ê sió-hóe-chhia teh cháu, 1 chat 1 chat, kam-chià tún-tīⁿ-tīⁿ. Siông-sè kā khòaⁿ, siōng ē-bīn kak-kak-á 1 chōa iù jī, bū-bū tha̍k-bô. Khó-lêng sī chit tiuⁿ tô͘ ê miâ, he̍k-chiá ōe ê lâng-miâ, khòaⁿ--khí-lâi chin sêng góa ê pêng-iú Lîm Sim-tì sian-siⁿ ê hêng-thé. 


愈看愈愛,chiah-nī溫暖親切。心內想,chit張圖若是我ê,逐日陪我做伴,kám m̄是真好?拄好一个查埔人行--倚-來,30 thóng歲,做工人hit款。伊講chit幅圖是lán麻豆一个畫家,專工畫hō͘ lán麻豆一个台獨運動ê先輩。伊比大樹koh過--去hit間大厝,三層樓,綠色ê厝殼,講:「Chit幅圖本來是chit間美術博物館--ê,chit-má是我ê。」我看hit間大厝,就是我以前tī加拿大蹛ê厝,哪ē變做美術博物館?伊講chit張圖伊beh賣,開價美金42,000箍。

Jú khòaⁿ jú ài, chiah-nī un-loán chhin-chhiat. Sim-lāi siūⁿ, chit tiuⁿ tô͘ nā-sī góa ê, ta̍k-ji̍t pôe góa chò-phōaⁿ, kám m̄ sī chin hó? Tú-hó 1 ê cha-po͘-lâng kiâⁿ--óa-lâi, 30 thóng hòe, chò-kang-lâng hit khoán. I kóng chit pak tô͘ sī lán Môa-tāu 1 ê ōe-ka, choan-kang ōe hō͘ lán Môa-tāu 1 ê Tâi-to̍k ūn-tōng ê sian-pòe. I pí tōa-chhiū koh kòe--khì hit keng tōa-chhù, 3 chàn lâu, le̍k-sek ê chhù-khak, kóng: “Chit pak tô͘ pún-lâi sī chit keng bí-su̍t phok-bu̍t-koán--ê, chit-má sī góa ê.” Góa khòaⁿ hit keng tōa-chhù, tō sī góa í-chêng tī Ka-ná-tāi tòa ê chhù, ná ē piàn-chò bí-su̍t phok-bu̍t-koán? I kóng chit tiuⁿ tô͘ beh bē, khui-kè Bí-kim 42,000 kho͘.


可惜bē赴kā買就精神--ah。醒--起-來透早3點30分。一時soah bē-hiáu分,iáu tī夢--裡,iah是tńg來tī另外一个現實。Tī我人生ê黃昏,真福氣夢chit个夢。我ê兩个故鄉——台灣kap加拿大——夢做一伙。看著chit幅súi圖,永遠記tī頭殼內。Kám是ùi另外一个平行ê宇宙(parallel  universe)送--來ê信號?或者是親像阮麻豆ê鄉親文夏先生唱ê歌——黃昏ê故鄉teh叫我--leh?

Khó-sioh bē-hù kā bé tō cheng-sîn--ah. Chhéⁿ--khí-lâi thàu-chá 3 tiám 30 hun. Chi̍t-sî soah bē-hiáu hun, iáu tī bāng--nih, iah-sī tńg-lâi tī lēng-gōa 1 ê hiān-si̍t. Tī góa jîn-seng ê hông-hun, chin hok-khì bāng chit ê bāng. Góa ê 2 ê kò͘-hiong – Tâi-oân kap Ka-ná-tāi – bāng chò chi̍t-hóe. Khòaⁿ-tio̍h chit pak súi tô͘, éng-oán kì tī thâu-khak-lāi. Kám sī ùi lēng-gōa 1 ê pēng-hêng ê ú-tiū (parallel universe) sàng--lâi ê sìn-hō? He̍k-chiá sī chhin-chhiūⁿ goán Môa-tāu ê hiong-chhin Bûn-hē sian-siⁿ chhiò ê koa – hông-hun ê kò͘-hiong teh kiò--góa--leh? 








#寫hō͘學生朋友ê代誌 專欄,本文使用教育部推薦漢字kap傳統白話字。

#台文通訊BONG報 347期,2023年2月出刊。

歡迎捐款贊助 #李江却台語文教基金會 

(捐款可抵稅,匯款後請通知02-23112199)



郵政劃撥:19021486
戶名:財團法人李江却台語文教基金會

電匯:123-20-050514-2
華南銀行士林分行活儲
戶名:財團法人李江却台語文教基金會


#李江却台語文教基金會 需要你ê定期捐款,逐年贊助本會(台文通訊BONG報發行單位)NT$2,400,lán做伙復振台灣語文ê事工kap雜誌編印發行費用,捐款thang抵稅。