作者：陳煒翰
Ē記得細漢ê時，hit年拄好是舊曆正月15，阿公阿媽lóng ē講 :「元宵圓、來團圓，鼓仔燈閃爍ngiâ好年。」印象猶原停踮頭擺kap厝--裡ê序大人去看鼓仔燈ê畫面，hit當時hōo人抱tī手內，目睭直直看頭殼頂五花十色ê燈火，每一粒lóng有特殊ê性命，用無仝ê元素leh彩繪故事。
阮兜tiānn-tiānn去四聯境普濟殿參拜池府王爺，算是台南中西區tsiânn靈siànn ê廟宇之一。每冬ê後半年，有一陣普濟文史協會ê志工同仁，ē備辦普濟燈會，已經傳承beh 12冬ê歲月，每一冬除了配合生siùnn做主題，mā ē邀請民眾來參與畫鼓仔燈比賽，同齊激頭腦來完成一件幸福ê趣味代。
「Lán kám beh鬥陣去報名？」有一擺，我kap同窗拄好tī網路頂看著報名ê資訊，聽伊leh講，「Tsit个活動是tsiok搶市，手tsíng頭仔tio̍h-ài kap人拚速度、網路tio̍h-ài通，若無，明年ê元宵可能就無lán ê作品--ah！」
提著一粒空白ê鼓仔燈，心內充滿無法度形容ê期待。2024年ê生siùnn拄好是「虎」，兩个人就互相討論主題，beh用啥mih款ê配色？啥mih款ê色水khah符合？Hit兩個月ê時間，阮直直leh討論hit粒燈ê呈現。Sannh心鼓仔燈ē-sái kā兩人祝福情湠--出-去，粒積世間ê緣份。
「完成，乾杯！」總算tī時間內趕工完成，一人一罐麥仔酒慶祝，uì空白ê外表漸漸用色水染出生動活骨ê虎，雖bóng拄開始淡薄仔sa無tsáng，m̄-koh透過濟擺ê構圖，落尾手揣著方向。
普濟燈會ê開幕儀式，暗時7點準時tī廟埕點燈，濟濟ê信眾kap攝影師lóng來等待燈火tshia-iānn ê光彩，1,800粒ê鼓仔燈，看--起-來ná像是一phiàn燈海，攑頭欣賞，有無仝年歲ê圖款，創造出對虎年ê ǹg望。一粒koh一粒，行徙tī府城ê街仔路頂，風微微仔吹--來，徛tī鼓仔燈跤，勾出有夢ê記持。
「阿媽，你看！Tsit粒花燈是阮畫--ê。」行到巷仔尾，總算看著阮親手畫ê hit粒。看阿媽ê喙角leh笑，就知影伊真愛家己ê孫仔為地方來貢獻。
愛kap幸福，在我看--來m̄是kan-ta一句話語án-ne niā-niā，lán mā ē-sái用行動來表現，現場真濟大人囡仔手牽手，tī廟埕聽南管音樂會、體驗做手工ê鼓仔燈……媽孫仔ê聲sueh、一家和樂ê氣氛，hōo人感動！我想，每冬燈會ê主題，lóng展現池府王爺對人間ê寄望——「孝心」kap「希望」。
連suà十年ê燈會，每冬多元ê特色，已經沓沓仔刻入府城人ê印象中。普濟燈會，m̄-nā是燈海飄tī半空中ê suí，koh有濟濟人情味kap講bē煞ê回憶。鼓仔燈ê暗暝，為lán府城妝thānn浪漫ê氣氛。
