作者：簡櫻汝
深山惡地pha荒區
傳統塗kat紅瓦厝
近兩百年平民居（ku）
呂--家古厝寫歷史
古厝起造用心思
風格結構真特殊
吸引齊柏林大師
「看見台灣」一明珠
樸實多樣磚門窗
七包三向西坐東
九十二間古味藏
囝孫興旺真濟房
刻苦耐勞作穡人
事事項項照起工
散赤子弟知輕重
各行各業出gâu人
文學作家呂自揚老師，tī 2024年12月18邀請阮三个（高雄高級工業職業學校賴老師、陳--先-生kah我）做伙去田寮月世界附近ê南勢湖參觀in呂--家古厝kah伊以前ê徛家。原本烏寒ê天，早仔iáu是有淡薄仔冷，想bē到，到阮9點半約束集合進前，日頭竟然探頭--出-來--ah，真是溫暖適合行踏ê好日子！
呂老師是一位親切、gâu講koh tsiok有文學素養ê大作家，80歲ê伊，好記持加上難得ê文獻資料，替阮導覽、做tsiok詳細ê紹介，hōo我tsiok歡喜。
呂老師講，古厝建材是挖附近ê塗做塗kat kih牆，下堵是khioh溪石疊--ê；用在地ê胭脂樹、龍眼樹kah刺竹做厝梁；壁是抹有tshiau稻草、牛屎ê塗漿，頂面tsiah-koh抹白石灰；鋪石頭ê巷仔長長長，看--起-來iáu真粗勇。古厝窗仔門是塗水師隨人設計無仝形體ê柴窗、磚窗，koh用雙喜字kah各種圖案等做妝thānn。
呂--家古厝是高雄目前規模上大、風格樸實、厝身完整ê傳統人家厝，莫怪tī深山林內ê古厝，iáu ē用得siânn攝影師齊柏林ê注目。呂--家古厝是「七包三」（後落正身七間，前落門廳三間）ê大厝。古厝四邊整齊，結構完整，房間lóng總有92間，是台灣清國時代留--落-來面積上大、房間上濟ê塗kat紅瓦厝。
年久月深、beh 200冬ê古厝，雖然有ê部份已經牆倒厝歪，有ê已經翻新，m̄-koh iáu保留當初起造ê外觀kah規模。古厝se̍h一輾，磚門窗邊--a lak石灰ê稻草壁看現現，iáu有百子千孫ê門聯、甕仔、石磨仔、磨刀石……，有幾間厝iáu有人蹛，阮行入去其中一間，有阿婆tī大灶前用柴leh hiânn燒水，伊講兩支thàng厝頂ê煙筒歹一支，換鐵筒ê hit支ē燙--人，無好用。
燒lō ê日頭光照tī長長ê巷仔、古物、破厝……，經過呂老師一个一个說明，逐項lóng有味，逐項lóng tsiânn suí！
倚晝ê時，到古厝附近、呂老師以前ê徛家內面參觀兼食晝，倚近欣賞竹仔梁柱、眠床，iáu有珍貴ê古早日常用品。飯後阮iáu有去附近月世界ê「太陽谷」，uì hia遠遠看呂--家紅瓦古厝。
Tsit tsuā去呂--家古厝行踏，增加tsiok濟智識，收成滿滿。真歡喜有tsiah難得ê機緣，mā tsiok感謝呂老師ê牽成！
