作者：林榮淑
Lán台灣人上愛kā家己比喻是番薯。
番薯tī世界各地普遍lóng看ē著，tī台灣規年thàng天sì-kè lóng ē-sái種作。散赤年代，是民眾食粗飽上主要ê作物。民間時常聽著祖先留落來tsiânn濟參番薯有關係，充滿智慧、詼諧ê俗語話。夭壽趣味！客家俗語：「嫁妹莫嫁竹頭背，毋係番藷就係豬菜」、「無命好食番薯湯」、「食番薯毋知米價」、「會算毋會除，偷米換番薯」；台語諺語：「時到時擔當，無米tsiah煮番薯箍湯」、「番薯m̄驚落塗爛，只求枝葉代代湠」。
現代科學報告，番薯消化緊，營養多元豐富，算是「大碗koh滿墘」ê健康食物。自án-ne，番薯翻身--ah。愛suí ê人食伊減肥，求長歲壽ê人食伊防癌。看著燒hut-hut、芳、甜koh鬆ê pû番薯，人人喙瀾是tsha̍p-tsha̍p滴。
庄跤，稻仔iah是薰草拄收割完ê田地，sì-kè lóng揣ē著大細粒ê塗丸仔，是起pû番薯ê塗窯仔上好ê材料。疊窯kánn-ná起厝仝款，地基ài穩定堅固。過程充滿挑戰，需要智慧kap耐心tsiah ē成功。
首先，囥khah大粒ê塗丸仔圍一个細ê箍仔，留一个空隙做燒柴使用。塗丸仔勻勻仔疊kuân，一直到上頂面beh完成ê時，留一个ē-tàng囥食mi̍h用ê空。有ê人kan-na疊一半就崩--落-來，無意無意；有ê人明明kan-na欠上尾一粒塗丸仔就疊好勢，歡喜過頭，一時大意，「hóng」一聲全部崩--落-來，氣kah tsàm跤頓蹄；ài tuì頭koh開始，beh háu無目屎。Suà--落-去，khioh便ê ta柴，搧風起火，煙霧沓沓仔散--去，火舌閃爍，直衝窯頂，量其約40分鐘，燒到塗丸仔變烏變tīng。Kā番薯tàn--入-去，koh掖寡塗kā khàm--leh。煞尾，kā窯sak倒khàm hōo tiâu，提柴箍kā塗丸仔摃hōo碎，一直到飽tīnn無空縫為止，窯中ng插一枝細枝樹葉仔iah是草仔，刺探食mi̍h ê熟度。樹葉若lian--去，表示窯內底ê食mi̍h已經熟、ē-sái食--ah。
番薯好食，踮野地用塗丸仔pû ê番薯更加好滋味，家己起窯親手pû番薯有成就感，夭壽心適，hōo人一世人難忘。Tse是農業社會上suí ê童年記憶。
