做伙tsiūnn火星 ——Lán想beh hōo國中生啥mih款ê台語教學?

主講/王崇憲   

記錄/張翠硯

本文是2022/1/12 ê講座摘要記錄,主講者王崇憲是高雄市五福國中老師。


話頭


新年第一場salon講座邀請高雄五福國中王崇憲老師來主講。伊講家己ê台語教學路,實際上就是一路kap台語教育tī台灣ê發展同齊行。伊1996年uì台師大國文系畢業,初初來台北讀冊ê時,伊kap一寡仝款uì南部來ê同學互相lóng講台語。M̄-koh,hit-tang-tsūn tī台北,大部份ê人lóng講華語。Tse hōo伊tsit个下港來ê囡仔,tī畢業了beh教學生ê時,mā變kah khah無自信。2001年,趁台語教育beh進入國校仔ê時機,王老師去參加「台語認證研習」。落尾koh決定碩士論文ê主題beh來研究台語文化。Tse對「國文老師」tsit个身份來講,lóng是khah特殊ê選擇。M̄-koh,tse lóng是伊心肝底真正想beh做--ê。




萬事起頭難ê台語路


王老師目前是國中台語社團ê老師。除了教學生,伊mā是本土語言輔導團ê成員。Bat家己編冊hōo老師做伙來讀,來精進教學能力。一開始編教材ê時,因為無前例thang tuè,只好揣幾个老師做伙來激頭腦,ná做ná改,編寫有高雄在地特色ê教材。落尾tsiah有出版社beh來出版,m̄-koh,因為hit-tsūn台語課tī國中iáu算「彈性課程」mā無一定lóng有開課。有教材了後,王老師就tī校內開始培訓師資,beh引tshuā學生mā ài有好ê師傅tsiah ē-sái--得。


教學路ê變化kap現況


Uì今年(2022年)開始,根據《國家語言發展法》,全台灣ê國中kap高中,lóng ài有一禮拜一節台語課。過渡時期ê師資是透過上學分班、第二專長課程來補。Suà--lueh就ē要求一定ài是本科出身、受過完整師培訓練ê老師來教。


「鄉土教育」一路代先有「鄉土教學課程」,koh來tsiah有『認識台灣』系列教材,上尾tsiah是「本土語文課程」。過程中kā「鄉土」改做「本土」,是因為「本土」tsit个概念相對來講代表ê範圍khah闊。


現場聽眾有一位台語囡仔ê爸爸,講伊發現查某囝ê課本iáu leh教上簡單ê「阿公阿媽gâu早」,伊感覺應該ài有生活應用ê內容,比如「珍珠牛奶茶」tsit款詞。針對課本內容ê「現代化」,王老師認為語言是活--ê,當然ài教新詞。M̄-koh,新詞就ài先有夠濟人leh用,逐家對用法有一个khah普遍ê共識,tsiah收入去課本khah妥當。像『臉書』號做「面冊」、『滑鼠』號做「niáu鼠仔」,tsit款ê詞就應該ē-sái收。


王老師mā tī家己ê課程內底實踐「現代化」ê目標。伊用台語教「好奇號tsiūnn火星」tsit个主題。引tshuā學生讀短文、看影片、設計學習單hōo逐家畫圖、配對等等,學生感覺真趣味mā tsiânn認真學。上課ê時透過分組,hōo逐个學生lóng有爭取好成績ê動機,就ē自然beh參與課程活動。除了hōo in吸收智識以外,mā ē教in唱《望春風》、《一枝小雨傘》,借tsit个機會認bat台灣歌謠。唱歌、唸謠tsit類--ê,連平常時對課本內容無啥有興趣ê囡仔,mā tuè leh學kah真歡喜。透過無仝ê課程安排,hōo學生聽、講、讀、寫ê能力lóng有thang練習、發揮。


討論kap結尾


講座上尾討論著「未來國高中生ê台語程度好bái差真濟,教學方式beh按怎處理?」ê問題。王老師講,伊上課ē先照學生自認ê台語程度拍散分組,hōo程度、各種能力無仝ê人做伙討論、互相tàu-sann-kāng。逐節課有組長,m̄-koh ē替換,mā m̄是kan-na組長ài tsiūnn台發表,逐个lóng有機會。若án-ne,khah bē-hiáu ê囡仔mā ē kā人請教,盡力表現。


現場聽眾內底有外國tńg--來ê查某囡仔,講伊自細漢就ē-hiáu講台語,伊感覺未來ê「雙語政策」應該是台語kap英語tsiah tio̍h。查某囡仔ê爸爸補充講,以早in拄出國ê時,感覺lán大部份ê人認同家己是中國人,m̄-koh,tsit-tsūn lán認同家己是台灣人,tse是tsiok大ê轉變。


王老師講,tsit-má伊mā ē-tàng真大方承認家己是下港來--ê、大聲講台語,bē koh歹勢、躊躇。伊ǹg望未來ê社會環境ē-tàng hōo逐家感覺使用母語是真光榮ê代誌。語言ê使用mā ē-tàng愈來愈現代化、科技化,上kài重要--ê是,hōo koh-khah濟人來學tsit个語言,thang hōo代代生湠--落-去。 





線頂看影片

台語sa攏有 - YouTube 頻道

https://reurl.cc/exDAex







#台語sa攏有講座 專欄,本文使用教育部推薦漢字kap臺灣閩南語羅馬字拼音方案。

#台文通訊BONG報 335期,2022年2月出刊。

歡迎捐款贊助 #李江却台語文教基金會 

(捐款可抵稅,匯款後請通知02-23112199)



郵政劃撥:19021486
戶名:財團法人李江却台語文教基金會

電匯:123-20-050514-2
華南銀行士林分行活儲
戶名:財團法人李江却台語文教基金會


#李江却台語文教基金會 需要你ê定期捐款,逐年贊助本會(台文通訊BONG報發行單位)NT$2,400,lán做伙復振台灣語文ê事工kap雜誌編印發行費用,捐款thang抵稅。