記錄：張翠硯
.jpg)
話頭
二二一世界母語日
捷運新詞愛講台語
要求國家語言平等
肯定高捷改進提升
高雄捷運環狀輕鐵1--月通車，車內ê台語廣播suah用華語『輕軌』發音，引起爭議。台師大台文系代先tī 2/19發聲明稿（看雜誌第6頁）呼籲應該ài改用台語放送。落尾高捷2/20回應講ē改用台語「輕鐵」放送。李江却台語文教基金會對高捷ê做法表示肯定，tī 2/21世界母語日發佈新聞稿（看雜誌第2頁），koh招各關心tsit个議題ê民間團體做伙開記者會詳細說明阮ê立場。下面是記者會ê簡要記錄。
李江却台語文教基金會執行長 陳豐惠
徛tī長久leh關心台語復振ê角度，希望公共場所、大眾運輸ê語言放送，lóng應該ài照lán在地多語言ê事實來執行，落實逐種國家語言ê平等。
高捷相關單位可能感覺「輕鐵」是新詞，m̄-koh實際上，台鐵tī高雄ê廣播就有用著「輕鐵」。Koh-khah早進前，淡水ê『淡海輕軌』台語放送mā是講「輕鐵」。Án-ne講--來，應當無算新詞--ah。就算對tsiânn濟人來講tse iáu是一个無熟ê新詞，lán iáu是ài看重一个語言ê主體性，也就是講，lán應該有權利用任何一个語言來表達任何代誌。
Tī今仔日二二一世界母語日，呼籲各級政府ài來清查公共場所、大眾運輸ê台語放送。有關台灣地名ê發音，有教育部委託台大地理系執行「以本土語言標注臺灣地名計畫」ê資料thang參考，看台語放送是m̄是有照各地ê名稱來正確發音，是落實《國家語言發展法》tsiânn基本ê要求。
蠻野心足生態協會主任 楊士慧
講著大眾運輸ê台語放送無正確ê問題，我mā有tsit款經驗，公車逐擺若到「羅斯福路」台語放送lóng是講「Lô-si-hok-lōo」，實際上應該是「Lô-su-hok-lōo」tsiah tio̍h。Suà--落--來，阮beh來kā逐家講為啥mı̍h環保團體beh關心母語議題。
台語是lán台灣本土文化kap社會總合形成ê複雜在地語言。用環保ê角度來看，一个beh滅絕ê野生動物，伊ê棲地ē愈來愈破碎，語言mā是仝款。半世紀進前，國民黨ê「國語政策」tsiânn成功，hōo爸母lóng對後一代講華語。棲地有分做『垂直斷裂』kap『水平斷裂』，比論做母語，就是爸母對後一代無leh講（『垂直斷裂』），iah是仝沿--ê tī日常生活lóng無leh講（『水平斷裂』），án-ne就有滅絕ê危機。
野生動物ê特有亞種ài特別保育，母語mā是仝款，所以阮tuì 2019年開始，有辦60幾場環境相關ê台語講座，koh tī「白海豬仔媽祖宮」（編註：環保團體ê工作站）辦40幾場「鹿港學」講座，tse是阮為母語拍拚ê跤跡。
台灣台語路協會理事 李孟珊
阮是一陣對囡仔講台語ê少年爸母組成ê團體。對阮來講，tshuā囡仔用台語講世事、認bat台灣ê一切，是tsiok自然ê代誌。Beh對囡仔講台語，當然mā ē拄著bē-hiáu講、甚至ài lām華語ê時tsūn。但是，阮知影講，一个語言本底就ài ē-tàng tuè生活leh改變，ē-tàng創造新ê語詞，án-ne tsit个語言tsiah是活--ê、有性命--ê。阮tsit擺參與記者會是想beh支持台語新ê語詞tī公共空間使用ê機會。希望政府mài因為驚人無聽--過、可能無法度理解，就無愛用新語詞。一个新語詞若愈濟人講，就ē引起討論，甚至形成新ê共識。Án-ne公共空間使用台語ê機會kap權利就ē改善，對阮ê囡仔來講mā是tsiok好ê示範。
公民參與協會副理事長 許慧盈
借高捷tsit擺事件，hōo逐家知影講，任何一个語言lóng ē-tàng有新詞，先kā發明--出-來，經過一段時間就thang變做普遍ê用法，就是一个語言有活力ê證明。阮協會一向主張台灣人民lóng ē-tàng參與社會政策ê議題。Tsit擺阮肯定高捷隨願意改進，m̄-koh mā呼籲講，其他大眾運輸ê台語放送，應該koh-khah積極改進。Lán逐家mā ē-tàng做伙繼續來關心tsit个議題，做伙為台語復振盡一份力量。
主辦單位：財團法人李江却台語文教基金會
協辦單位：台灣公民參與協會／台灣蠻野心足生態協會／台灣台語路協會／台灣南社
