作者:李江却台語文教基金會
肯定高雄捷運新詞即時用台語發音
落實國家語言發展法語言主體精神
針對高雄捷運2/20表示ē配合修改『輕軌』用台語發音,阮表示肯定,也進一步呼籲各縣市ê大眾運輸需要全面檢討,使用正確ê台語地名讀音。
高雄捷運ê環狀輕鐵tī今年(2024年)1--月拄通車ê時,到站ê台語廣播,『輕軌』tsit个詞用華語發音,高雄捷運工程局本來表示tsit个詞是外來語,若用台語放送驚民眾誤解,堅持beh用華語發音。經過濟濟民眾寫批投訴,tī 2/20高雄捷運表示ē配合民意、修改做用台語發音。阮表示肯定。比較頂擺高雄捷運公司(高捷)tī 2008年紅線通車時ê「巨蛋」發音,到2021年tsiah改做華、台、客語來放送,高捷tsit擺ê回應速度ē-sái講ke tsiânn緊,確實已經hōo lán看著進步。
但是針對高捷工程局進前所講ê「外來語用台語放送驚民眾誤解」ê講法,lán mā是ài koh討論,避免未來koh再發生。代先講「輕鐵」tsit个詞,本來就m̄是新詞。Tī 2018年12月23通車ê淡海輕鐵,tsîng通車就是用台語詞「輕鐵」來放送;甚至連目前台鐵tī高雄ê台語廣播就是講「輕鐵」,就án-ne,「驚民眾誤解」tsit種講法是對台語ê錯誤觀念。
Koh來就算講真正面對新詞,每一種語言lóng有面對新事物創新詞ê機會。Tse是語言性命力ê展現。若有新詞,就是ài先創造,koh來普及,m̄是用華語準--過就好。有新詞,tse就是台語主體性ê展現。Tse是各級政府應該ài有ê態度kap觀念。
李江却台語文教基金會長期推廣台語文發展,對各項台語相關議題lóng有leh關心。針對tsit擺事件,阮mā beh提出訴求。《國家語言發展法》tī 2018年12月25三讀通過,明確指出「促進國家語言(台語、客語等)ê傳承、復振kap發展」ê要緊。教育部mā tī 2019年委託台大地理系執行「以本土語言標注臺灣地名計畫」,研訂lán國台鐵、高鐵kap捷運等常用站名正確發音ê標音kap語音檔,站名相關ê資料ē-sái講是便便thang用。
趁世界母語日ê時機,基金會呼籲中央kap各級政府tio̍h遵循國家法律。除了tī大眾交通工具ê廣播包含新詞有全台語放送,mā ài重視教育部地名資料,全面性落實各站名台語ê正確發音。另外一方面,全國各級政府mā應該發揮功能,提升對台語ê觀念kap態度,無應該繼續獨尊華語,重視台客語等國家語言ê權利,tsiah是符合《國家語言發展法》精神ê進步社會。
具體訴求:
1、要求各級政府落實國家語言發展法,tī大眾交通工具ê廣播包含新詞有全台語放送。
2、要求各級政府落實各站名台語ê正確發音,站名相關資料應當參考教育部「以本土語言標注臺灣地名計畫」。
3、要求各級政府提升對台語ê觀念kap態度,無應該繼續獨尊華語。
4、呼籲全國各縣市政府清查無ha̍h《國家語言發展法》ê大眾運輸廣播語言,重新錄音。