台文通訊BONG報: 偷夯鼓井趁大錢 ——淺談不當黨產hām轉型正義

主講／許有為

記錄／張翠硯

「轉型正義kap不當黨產」台語講座是由不當黨產處理委員會主辦、李江却台語文教基金會承辦ê系列講座。

本文是2023/10/22講座ê摘要記錄，許有為是不當黨產處理委員會專任委員、東吳大學政治系兼任助理教授。

偷夯鼓井趁大錢

——淺談不當黨產hām轉型正義

黨國無分，以黨領政

講座一開始，許有為先tshuā逐家看兩段古早ê報紙新聞。Tī蔣介石過身、蔣經國beh辭行政院長ê時kap蔣經國過身、應當hōo李登輝接任ê時，根據報導，lán lóng ē-tàng看著hit-tang-tsūn無照法制程序行，實際上是「以黨領政」ê證據。另外，m̄管是「三七五減租」ê政策決議，iah是立法院院長、行政院院長ê職務決議，mā lóng是黨leh決定，憲政機關tsua̋nn失去伊本來ê角色kap地位。雖然組織本底就是仝一个黨，m̄-koh，應當ài照憲法行，至少行政kap立法ài分開。

修改《出版法》

本底相關ê代誌tī黨內ê會議記錄lóng寫『密不錄由』，也就是講內容siunn過機密，連內部記錄to無，直接簽核通過。落尾透過其他相關資料tsiah知影，是beh限制報紙出版。戒嚴期間，報紙kan-na三張，因為bē-tàng hōo媒體烏白講。若是報紙寫ê內容違背黨意，執照就ē hông取消。

不當黨產按怎來？

以不動產來講，通常是先占--leh，koh來用借--ê，為著beh ē-tàng修繕tsiah kā租kap買。第一个例是國民黨黨部，in頭起先kā占用，等想beh擴編ê時，發見是國有財產，向財政部申請擴建，因為以早lóng m̄ bat交租金，財政部一開始並無同意。上尾答應ê條件是「將來若空間無beh用ê時，ài kā修理--過--ê、ke起--ê，連原本ê所在lóng無償還--tńg-來」。

第二个例是婦聯美齡樓，mā是無leh交租金就kâng占用。等有一工監察院leh查，原本ê地主國防部tsiah知影代誌大條，beh協調kā厝賣hōo婦聯會（婦女聯合會），tshiâu kah上尾婦聯會suah講無錢thang買厝，竟然變做國防部出錢kā厝送hōo婦聯會。不動產tsua̋nn uì國有財產變做黨產。

除了不動產以外，koh有別類--ê，像以早有真濟起工廠ê需求，tiānn-tiānn lóng ē hōo政府以汙染iah是有新ê都市計畫等理由kā人拒絕，m̄-koh，若是hām政府關係khah好--ê，就ē-tàng保留。另外，koh有台火（『台灣火柴股份有限公司』）ê總經理去hông誣賴伊是匪諜，公司ê股份tsua̋nn hông動跤手變做黨產。就算上尾證明清白，伊mā無法度kā全部ê資產提倒tńg--來。

軍友社（軍人之友社）kap婦聯會beh tsông起厝ê經費，去揣進口貿易商tàu-sann-kāng，ài in kā hām外國交易趁--ê，固定捐幾pha出--來。國民黨中央常務委員會揣進口貿易商kap警備總司令部做伙來開會決議，就算捐款已經達到目標金額，mā迫人ài繼續捐。中央電影公司（tsit-má ê中影公司）過去一直了錢suah thang經營--落-去，是因為tse是國民黨掌握政權所得--著ê資產，若是in放手放棄，就提bē tńg--來--ah，所以黨內決議beh繼續kā飼，中影tsiah有特權繼續生存。

黨內有人提議改變

黨內ê考核委員吳嵩慶bat提出「財務改進分組報告書」講，長久以來lán lóng kā黨內需要ê經費直接編入政府預算內底來使用，án-ne實在是m̄-tio̍h--ê，應該ài來發展黨營事業飼lán家己。落尾吳嵩慶就無koh升官--ah。

結語

不當黨產按怎來？國民黨ê權力超過憲政機關，用黨來kā指揮。Koh用黨內ê人來編政府預算，用國家ê錢來tshiânn黨。黨營事業就靠特權、優勢活--落-去。轉型正義是「新ê民主力量為著beh kā過去威權統治做m̄-tio̍h ê所在改正--過--來所做ê行動」，今仔日探討ê「追討不當黨產」mā是其中tsiok要緊ê一項。