主講／吳俊瑩
記錄／林麗津、賴昭男
本文是2024/3/13「台語sa攏有」講座ê摘要記錄，吳俊瑩是國史館修纂處協修。
台語sa攏有 - YouTube 頻道
長輩tiānn-tiānn講：「二二八、白色恐怖kap戒嚴，你m̄-thang bē記--得--ooh！」M̄-koh國史館修纂處協修吳俊瑩研究員講，tsit-má ê少年人對tsia-ê事件無印象mā無記持，因為受難者kap in活tī無仝世界，親像是圍牆兩爿ê人。因為知ê代誌少，少就無感情。根據促進轉型正義委員會報告ê推估，台灣tī威權時期政治案件當事人約兩萬兩千人，對規个台灣來講算是少數，若是無去了解，就ē無啥mih感覺kap體會，就bē想beh了解別人是按怎受難--ê。
吳俊瑩說明，二二八事件ê起因是1947年2月27暗時發生緝薰血案，民眾火to̍h，28 tuì台北車頭遊行到長官公署（tsit-má ê行政院，陳儀政府所在地）請願ê時，hōo衛兵開銃掃射，濟人傷亡，引發全島衝突。海外ê台灣人是透過美國副領事葛超智（George H. Kerr）寫ê《被出賣的台灣》，tsiah知影tsit件代誌。二二八事件kap白色恐怖無仝，白色恐怖hōo人刊tī報紙宣傳，m̄-koh二二八事件hōo國民黨am-khàm 40年。
白色恐怖ê暴力形式
1950年代ê綠島是亞洲上大ê思想改造營區（名叫做「新生訓導處」），監囚tī內底m̄是hông關--起-來niâ，是早起做思想改造，下晡做勞動。落尾綠島koh起一間監獄，名真好聽，叫做綠洲山莊，正式ê名叫做綠島感訓監獄。1970年，台東監獄發生一場有組織ê武裝台獨行動——泰源事件，政府就kā掠--著ê人關tī綠島。Tsit-má lán去看，iáu-koh ē-tàng看著綠島感訓監獄內底，有真濟hit个時tsūn留--落-來ê標語，譬論講：『台獨就是台毒，共產就是共慘。』監獄內底台獨ê人士khah濟，kap訓導處左派kap共產人士比例khah kuân ê情形無仝。
台北市公館hit搭ê水源地，khah早是一个刑場，附近koh有國防醫學院，刑場無人認ê死體，就ē hông人送去醫學院做大體，所以hia-ê醫學生解剖--ê有可能是家己ê同學，有人因為án-ne tsua̋nn精神失常。1952年左右，國防部有發公文hōo台北市ê衛生院，講in 2月29早起6點ē tī水源路刑場銃決犯人，請in去收屍——tsit張公文ē-tàng tsiânn做水源路以早做刑場ê證據。
白色恐怖hông銃決ê人，死體若是無人來領，iah是厝內ê人m̄敢來領、無錢來領，衛生院就委託一間外省人經營ê「極樂殯儀館」處理，有ê火化囥tī靈骨塔，有ê埋tī台北市崇德街ê墓仔埔。Tsit-má政府有leh保留tsit个遺址，m̄-koh並m̄是保留kah真好。
二二八事件ê暴力形式
戰後上大ê國家暴力就是二二八事件，tse是受著壓迫tsiah起來抵抗，m̄是事先計畫好--ê，m̄-koh做台灣省行政長官ê陳儀suah kā看做是「奸黨」、「奸偽」ê行動，講是有共產黨leh使弄。Hit个時tsūn，台灣ê共產黨員tsiah 70个人niā-niā，m̄-koh二二八事件是全島ê事件，包括台東mā有。其中嘉義ê衝突上kài大，台中甚至組織二七部隊。
Tsit改事件原底是beh要求政府處理2月27 ê緝薰血案，尾--à suah tsiânn做人民追求民主、自治kap基本人權ê事件。參加ê人都市kap田庄lóng有。事件發生ê時，全島lóng tī無法律ê狀態當中，蔣介石派去台灣ê兵仔報復性掠人、刣人，koh tī短時間內一戶一戶搜查。
二二八事件了，各地開始「清鄉」，hit時有一个「台灣省各縣市國民身分證發給辦法」，若是奸偽、奸黨iah是逃亡ê人就無beh發身分證hōo--你，意思是若無身分證ê人就有問題。1949年5月19，省主席兼警備總司令陳誠發佈《台灣省戒嚴令》，其中一條是無論tī厝--裡iah是出外lóng ài紮身分證，若無，一律逮捕。
台北處理委員會為著beh維持治安，成立一个「忠義服務隊」，hōo許德輝tshuā頭，m̄-koh其實伊是陳儀派--來--ê，tī內底做反奸ê khang-khuè。伊lóng tī報告內底烏白講，歹代誌總賴hōo忠義服務隊。政府為著beh操作輿論，中央社就報講：忠義服務隊kap青年學生，三暝三日leh tshiau外省人ê住宅，連陳儀in小弟ê住宅mā hōo in tshiau。Tse是政府beh揣kā台灣人鎮壓ê理由，所以新聞報導無一定是事實，有可能是寫倒píng。
二二八事件ê頭尾
檔案中有一張蔣中正發hōo陳儀ê資料，內容講著伊ē派步兵一團kap憲兵一營tuì上海出發，按3月初7出發、兩日到台灣，也就是初9到。M̄-koh tuì福州派--過-來ê兵力，已經tī 初8 tuì基隆登陸；hit時，基隆要塞ê司令已經下令規个街仔路lóng ài處理kah清清氣氣。初9，海面上就發現有浮屍。檔案中，基隆仁愛區死傷地點有巿場、海面、派出所、車站頭前、街仔路頂，各行各業lóng有。有ê甚至tī派出所頭前銃決，mā有人tī厝--裡hōo流彈tuānn--著。
基隆是tī援兵到位ê時tsūn開始掃射，tī高雄，是要塞ê軍隊3月初6就tuì壽山開--落-來，一路去市政府、一路去火車頭。軍隊到市政府，先kiat手榴彈落--去，真濟參議員tsua̋nn慘死tī巿政府。Tī火車頭，市民bih tī地下道，兵仔對地下道掃射，致使市民死傷慘重。陳儀政府本底beh等援軍到了後tsiah beh通盤思考按怎做，想bē到要塞軍隊已經動手--ah。事後，蔣介石講軍隊是『先發制人』，kā高雄控制--落-來，尾--à軍隊就開去台南。
3--月是屠殺ê月份，國大代表林連宗、律師林桂端hōo憲兵掠--去（陳儀下令）。3月初9、初10，國軍陸續開到台灣，國民黨台灣省黨部建議趁tsit个時tsūn掠人，就kā名冊送去警備總部，hōo軍隊照名冊掠人，連台大文學院院長林茂生mā hōo人掠--去——國民黨beh趁tsit个機會來清除台灣ê智識份子。
Tsia-ê代誌lóng是資料內底看ē著ê事實，m̄-koh台灣有一寡人一直m̄相信有tsit款代誌發生。
白色恐怖ê頭尾
蔣介石3月初1 ê日記講著頂禮拜台灣人仇殺外省人，暴動擴大，可能是軍隊調離ê緣故。3月初7，日記講著台灣人『畏威而不懷德』。3月13，日記講著台灣自軍隊到了後，事件大部份已經收煞，m̄-koh無根本上ê解決，m̄-tsiah ē感覺新收--入-來ê土地ài靠兵力維持。
白色恐怖是tuì 1949年ê「四六事件」開始，台大kap師大ê學生hông掠--去。Hit年ê 5月20頒佈《台灣省戒嚴令》、6月21頒佈《懲治叛亂條例》，一直到1992年修正《刑法》100條了，白色恐怖tsiah結束。1950年韓戰爆發，政府就轉向另外一个戰場，tī台灣發動「清肅匪諜」活動，hit-tang-tsūn有102萬外省人kap軍隊徙來台灣，大部份是統治階層。國民黨政府開始進行體制性ê加害，hit-tsūn外省人tsiah占台灣人口14、15%左右，m̄-koh tī白色恐怖受害者ê比例是約45%，所以tsit个體制性ê加害是無分族群--ê。
1945～1995年ê政治案件，是1950年代上濟，到1955年就無--ah，一直到1984～1985年因為「一清專案」人數tsiah-koh tshìng--起-來。死傷上慘重--ê是1950年代，受難者tī台南、高雄上濟，hông判死刑--ê有1,153人次（占13％ ）、無期徒刑169人次、15年以上--ê有425人次，koh有ài參加感訓教育--ê。hông判刑--ê上少年11歲，上老84歲，平均33歲。
本底是國民黨kap共產黨leh sio刣，規个台灣人suah hōo絞絞--入-去。Hit个時tsūn hōo人屠殺--ê，m̄-nā是智識份子，真濟是技術工人kap農民、漁民，作家、軍警mā lóng有。尾--à，台獨案件愈來愈濟，1960年體制內改革ê案件有雷震案、1964年彭明敏師生ê〈台灣人民自救宣言〉、1961年ê蘇東啟案kap 1970年ê泰源事件，koh有「回溯匪嫌案」。
法律暴力
Hit-tsūn國家ê法律暴力主要展現tī《刑法》100條：『意圖破壞國體、竊據國土，或以非法之方式變更國憲、顛覆政府，而著手實行者，處七年以上有期徒刑；首謀者處無期徒刑』，一直到1992年《刑法》100條修改，改做若是無用暴力iah是威脅ê手段實行--ê，就無判罪。二二八kap白色恐怖比較：二二八是無因無端kā你擬罪，烏白掠烏白刣，無證無據；m̄-koh白色恐怖有真--ê有假--ê，形式上有審判koh ài交代細節。
另外一个法律暴力是《懲治叛亂條例》：2條1，犯《刑法》100條--ê，判唯一死刑；第4條，包庇kap藏叛徒mā是有罪；第5條，參加叛亂組織iah是集會判十年以上iah是無期徒刑；第7條，替叛徒宣傳ê人，判七年以上；第8條，犯--著ê人沒收全部財產。1950年ê《戡亂時期檢肅匪諜條例》鼓勵人檢舉，檢舉koh有獎金，真濟問題就出tī tsia。
Hit-tsūn ê軍法起訴kap審判，總統府、國防部kap警備總部lóng有參與，tann beh追究責任mā m̄知影beh tuì佗位追究。
蔣介石kā人賜死
軍法審判ê核覆權是講，判決無適當iah是違背法令ê時，就ài發回覆議，bē-tàng直接改變判決ê結果。M̄-koh，lán tī檔案內底suah發現真濟直接改變判決ê情形，比如講以下ê例，lóng是hōo蔣介石賜死--ê：黃溫恭原本判15年，suah直接改死刑；陳心菉原判十年，尾--à mā改死刑；徐會之原判五年，總統府參軍長劉士毅有提出照「預備顛覆政府罪」改處15年，蔣介石suah批『應即槍決可也』。類似ê案件koh有bē少。
Tsit个審判ê過程，蔣介石扮演重要角色。有人統計經過蔣介石手頭ê案件，刑期加重--ê有47％。Tī 1,152个判死刑ê人當中，有274人原判m̄是死刑，18人原判是「感化教育」，5人原判「無罪」。274件改判死刑ê案件，蔣介石經手259件，有160件是呈hōo蔣介石進前就已經hōo國防部kap總統府加重，其中就有99件是蔣介石親手批示kā人賜死--ê。
