作者：施玉鳳
阮同學逐家sio招坐高鐵落南到嘉義tshit-thô。Tī高鐵盤車，去嘉義火車站附近ê旅館歇暗，行李囥好勢，就se̍h去圓環食mi̍h件。
下晝阮來到『檜意森活村』，tsia是日本時代發展阿里山林業所起ê日本宿舍，建材lóng是用阿里山ê hi-nóo-khih。木造建築物有29棟，見證台灣百年林業ê歷史，算是台灣有留--落-來、khah大型ê日式建築。Hia有木造ê玻璃thuah門、紙門、tha-thá-mih、椅tsū仔、走馬廊，iáu有nî-tsînn跤ê椅liâu。牆圍仔頂一tshok一tshok紅phà-phà suan藤ê刺仔花，iáu有日式庭園設計ê水池、花草、樹木、山石。來tsia親像來到日本，koh有真濟人租日本衫來穿，順suà遊園參觀。
阮同學逐家想想--leh，去kā日本衫租來過giàn。本來in歹勢穿，但是tsit-tsūn若是m̄敢，以後koh-khah免講，就做伙助膽kà趣味。真正好佳哉阮有去體驗看māi，遊園賞花、泡茶hip相，人看--阮、阮看--人——同學講lán若bē歹勢，歹勢--ê就是別人——下晡就án-ne過--去--ah。暗--ah當然se̍h夜市上鮮，食食看看--leh，沙鍋魚頭 、雞肉飯、豆花滿滿是，人kheh人，熱鬧滾滾。
第二工早頓煞，阮行到嘉義火車頭，beh坐9點阿里山森林鐵路ê火車。五个車廂有百thóng个車位，tī嘉義車頭入口正uat ê月台等待，往北門ê方向。阮今仔日是beh坐到多林車站。Tsit條阿里山森林鐵路沿路有停北門、鹿麻產、竹崎、奮起湖（Pùn-ki-ôo）。目前通車到十字路站，其中Tiffany藍ê木造竹崎站真出名，真濟人tī tsia追beh看火車。
到kah樟腦寮543公尺ê所在，火車開始順山勢親像拍干樂leh peh崎，iáu有人直線peh獨立山lip火車。若是中途喙ta，koh ē-tàng tī鐵枝路邊買ò-giô sut--一-碗。火車ê速度無緊，iáu ē鼻著火車ê氣味；火車leh peh山ê時tsūn，看ē著台灣壯觀美麗ê風景。
一tsat車廂座位20外位，阮tsit个車廂有一半是uì美國tńg來台灣開同學會ê oo-jí-sáng，in一陣人beh去奮起湖遊覽。阮tsit陣人是beh去多林車站，tsit站是踮奮起湖hām十字路口站ê中ng。同學驚講到多林車站中晝無mi̍h件食，想beh叫Foodpanda——想siunn濟--啊！
結果也是真hàm，阮決定khà電話去奮起湖站訂便當，到站落車提著便當，tsiah繼續tsiūnn車到多林。結果到奮起湖站，三位同學tsông落去提便當，叫阮留tī車頂ê人ài擋火車，m̄-thang hōo駛走--去，真是「目睭金金人傷重」，當做阮是天仙美女，beh按怎擋火車？佳哉gōng人有gōng福，拄好有一大陣香港旅行團ê人tsiūnn車，beh坐去十字路站，kā時間小延tshiân，同學tsiah提著便當順利tsiūnn車。
Tuì奮起湖到多林車站，沿路是杉林、竹林。Beh到站ê時tsūn，lán ē先看著青翠ê竹林，koh來就是Tsou（『鄒』）族斜糕形彩畫ê舊車站，tsit个時tsūn lán ē lió著大凍山。踮多林車站落車--ê kan-na阮tsit陣人，tsia無月台，ài直接行長長ê鐵枝路。
倒手爿有一兩欉櫻花拄leh開，徛tī樹跤ē-tàng看著對面ê玉山；正手爿有一排日式木造ê枋仔厝，鐵路邊有一枝彎形鐵管水鶴，是古早蒸汽火車加水用--ê。Koh看ē著日本時代ê門牌「哆囉嘕106號」，tuì厝邊ê坎仔行--起-去，有一欉百年ê松柏，樹跤有一phō觀音竹kap青翠ê茶花。樹縫光影隨風tín動，鼻著tsūn-tsūn樹芳，ná佛光普照無聲無sueh，阮一陣人行入去tsit个無到十戶ê庄頭。
過--一-下-仔，看著一對翁仔某踮厝前賣ò-giô，阮逐家喙ta，一人買一杯，落喉心涼脾土開。Tsit對翁仔某看阮正中晝來到tsia，驚阮腹肚iau無mi̍h件食，講beh去sa̍h麵hōo阮食，hōo阮真感動！阮tsiah kā講阮已經有去奮起湖買便當來tsia食--ah。Tse就是大部份ê人kah意自助旅行ê原因，m̄-nā目睭看著美麗ê景色，心也感受著土地人情ê溫暖 。
鐵枝路山邊有庄頭服sāi ê土地公廟，koh有一粒傳奇ê石頭公。阮tī鐵枝路邊一爿杉林下，坐落來食便當配話。Tsit个所在有出產台灣原生種轎篙筍，是大自然ê賞賜，天然--ê上好。逐年4到6--月時間若到，山跤ê人就ē提家私、用流籠tsiūnn山剉竹仔挖竹筍，踮空地炕竹筍。竹仔ài剉tsiah ē發了suí，bē死--去，tse是上天ê賞賜，是善ê循環也是萬物養民。
阿里山iáu有真濟特別ê mi̍h件，親像「十大功勞」ē-sái做藥劑，ua-sá-bih氣味無tè比，koh有茶米kap真濟m̄知名ê山菜，也ē飼野蜂。Tsou族koh有一項神奇神祕ê民間傳說「青符」，用一葉青葉催符唸咒ē-tàng隱身。
中晝食飽坐--一-下-仔，逐家揹仔揹--起-來，準備行去山跤ê部落『得恩亞納』。『得恩亞納』是台灣ê合掌村，經過2019年『莫拉克』風颱造成八八風災了後，政府有重建。Hia海拔1,400公尺，是台灣ê『小瑞士』，有42間厝，是Tsou族ê部落。沿路竹林、杉林、櫻花起起落落，peh崎落山tńg彎uat角，ná拭汗慢慢仔行。行一兩點鐘，kan-na看著一台「米奶--ê」（BMW）駛--過-去。同學講笑話拍lā涼唱歌，有路沿路唱歌，無路liâu溪過嶺。
下晡阮行到『得恩亞納』，tsia-ê徛家有黃、紅、青、白、烏ê色緻，起tī山谷，是經過重建規劃，照山勢地基thènn-kuân起造ê徛家，清幽sù序。每一戶人家lóng家己親手用石頭彩畫，有貓頭鳥、山豬、熊、bā-hio̍h等等ê圖像，代表in家己ê家族標誌，看--起-來真心適。阮接受社區發展委員會ê安排，蹛入去食暗。暗暝ê深山林內，天星溪河特別suí，m̄是一粒一粒，是規tshok--ê。
隔tńg工透早，一隻雞公ko̍k-ko̍k叫，叫kah sau聲，窗仔邊樹木花草iáu ē-sái看著露水。逐家起床行行看看--leh，tsit个所在無過度開墾，無偌大ê菜股，有種刺蔥蔬果，有幾若欉櫻花leh開，上hiánn目--ê是一phō大紅ê虎頭蘭hām粉紫色ê麝香木。Tsia koh有飼雞飼狗，in做ê手工pháng也真有名。
早頓用完，繼續來到十字路火車站，目前阿里山ê森林鐵路thàng到tsia，算是上尾站，有tńg來故鄉ê青年經營文創商店。鐵枝路邊ê「十字路12號」，排一塊一塊圓形ê咖啡桌，有tsiok古錐ê尪仔。火車nǹg磅空駛過來十字路站ê時tsūn，入站ê火車hām倒手爿kuân頂tng-leh開ê櫻花，hip--起-來一定真讚。M̄-koh阮beh去石棹櫻之道，時間無允准，所以古早味ê草仔粿買買--leh，就準備坐車到石棹欣賞櫻花hām茶園。
阮踮阿里山ê醫療站落車，用橫行直tn̄g ê方式行過霧之道。茫茫霧霧ê茶園，今仔日無日頭也無落雨罩bông，親像是行tī雲內底，溼溼涼涼--ā。茶園se̍h一輾又一輾，揣無路一直tī hia se̍h-lin-long，三不五時ē看著桃紅色ê櫻花。山中天氣變化多端，踮tī山頂beh落山，下晡2點進前tio̍h-ài準備，若無，一時仔就起霧；m̄-koh mā因為án-ne，阿里山ê茶米，露水清甘芬芳，世界有名。
落山ê時，阮tn̄g著真濟tsiūnn山賞花ê遊客，無熟sāi也ē sio借問「gâu早、加油、行hōo好、tih-beh到--ah」，tī台灣就是án-ne。阮下晡行到阿里山公路ê石棹站坐車，beh來去故宮南院。參觀煞了後，一陣人tsiah-koh坐高鐵tsiūnn北，結束tsit擺ê旅行。
故鄉ê月上圓
故鄉ê水上甜
故鄉ê人上親
故鄉ê山上suí
阿里山再會～
