作者：陳育萱
飼母奶是人類本能，是自古以來上天然飼囡仔ê方式；配方牛奶粉是母奶ê代替品，是100年前左右tsiah hōo人發明--出-來--ê，原本是為著幫贊一寡真正無法度飼奶ê人。有一段時間，牛奶粉suah廣告kah比飼母奶高級ê款，媽媽m̄免hōo飼奶tsit層代誌縛tiâu--leh、病院等機構照顧嬰仔mā khah方便。配方牛奶ê成份是參考母奶來做--ê，母奶是針對囡仔當時ê需要來變化，逐工lóng有無仝款ê氣味、抗體。無論用佗一種飼奶ê方式lóng有好有bái，tio̍h-ài尊重媽媽ê選擇，tse是媽媽ê自由。
公共場所飼母奶ê權利
有一位媽媽tī等青紅燈ê時tsūn，嬰仔leh哭，伊tī in兜ê汽車內底飼奶，kā嬰仔安搭--一-下，拄好hōo tī馬路頂kuân賣玉蘭花--ê看--著，雖然是真短ê時間，m̄-koh hōo人看著胸坎，明明kan-na幾秒鐘，親像過一點鐘hiah-nī久，hit位媽媽感覺真歹勢，趕緊kā囡仔抱起來tsa̍h--一-下。Tsit个時tsūn，賣玉蘭花--ê竟然koh khau倒tńg來kā罵。哪ē án-ne？Hit个媽媽感覺tsiok委屈--ê。
論法，根據《公共場所母乳哺育條例》，婦lîn人tī公共場所飼母奶ê時，buē-sái kā擋、kā趕，無，ài罰6,000到30,000箍。Koh再講，tī路--裡賣玉蘭花本身就無合法--ah，照講mā是ài罰錢。論理，人tī家己車頂根本無算公共場所，án-ne是妨礙著啥人？Hit位媽媽胸坎hōo人看--著，是啥mih人損失khah大？嬰仔食奶有啥mih好看？罵--人ê人可能無了解飼奶是別人ê權利，若無，tsit類ê代誌哪ē一直發生？
大漢後生出世ê經過
阮大漢後生出世，已經是八年前ê代誌，有身ê時tsūn bat入院安胎，大漢--ê早產一個月，本來就hōo人tsiok煩惱，囡仔一下生--出--來，醫生講有淡薄仔喘，ài先蹛保溫箱，無法度好好仔飼--伊。護理師講，上無，四點鐘一定ài擠一擺奶，擠--出-來了後，用空ê射筒té--起--來，送去新生兒病房hōo囡仔食。破腹動手術，腹肚有空喙需要歇睏，koh ài煩惱擠奶。
暗時10點外，真無簡單擠--一-屑-屑-仔，請阮翁送去病房，想buē到囡仔出世，阮翁kan-na想beh ke趁一寡錢，khang-khè做kah tsiok忝--ê，面àu面臭真受氣應講：「你kám tio̍h一定ài tsit-má擠奶？Kám buē-tàng明仔載tsiah擠？」聽著隔壁床翁仔某半暝mā leh合作擠奶、互相照顧，hit-tang-tsūn心內實在感覺有夠委屈，囡仔腹肚iau kám有分日--時暗時？我就是家己無法度送--去m̄-tsiah拜託--伊！
真好運，囡仔三工就m̄免繼續蹛保溫箱，尾--à kah我鬥陣出院，因為月內做了我按算家己顧囡仔，洗身軀、飼奶等等各種照顧ê方法，一定ài趁tsit個月學ē-hiáu tsiah ē-sái。衫褪--落-來，就beh kah囡仔拚--ah！照病院kah護理之家教ê方式，阮真拍拚學飼奶，m̄-koh真正tsiok無簡單，囡仔哪ē直直háu？
實踐飼母奶ê困難kah挑戰
護理師講囡仔腹肚iau、母奶食無夠，建議koh補飼一寡牛奶粉。Uì紅嬰仔室tńg去病房ê路--裡，拄著別个媽媽凊凊彩彩就ē-tàng擠兩罐母奶，我ê是按怎tsiah少？囡仔哪ē食食--leh一直睏--去，kám講是無食--著？早產本來體重就khah輕--ah，兩點鐘飼一擺，koh ài擠奶、消毒牛奶矸仔，是beh按怎放輕鬆、好好仔歇睏？飼囡仔對阮tsit種凡事想beh家己做主ê人來講，實在是真大ê挑戰。
出月內tńg來到厝，一个人面對kan-na ē-tàng用哭聲來表達ê紅嬰仔，想beh知影囡仔到底食有夠--無？到底有正常--無？Koh去看專科「泌奶門診」，醫生講細漢囡仔睏眠短真正常，沓沓仔就ē kah大人仝款--ah。Mài烏白「補」牛奶粉，to無欠哪需要「補」。後--來，阮將奶喙仔kah牛奶矸仔收收--起-來，請「泌奶顧問」來厝內指導飼奶ê姿勢，指導員一下走，koh啥mi̍h lóng m̄-tio̍h--ah！
媽媽飼母奶，半暝ài維持兩點鐘起來一擺，坦白講爸爸ē-tàng tàu-sann-kāng--ê真有限，久--來mā ē感覺無公平，是按怎lóng是媽媽leh處理？飼奶ē-tàng解決ê問題iáu m̄是問題，囡仔淺腹koh淺眠，實在真歹tshuā。一个人面對囡仔，伊哭我mā哭。雖然頭前hiah-nī仔艱苦，經過幾個月就順--ah，真正無洗著幾个牛奶矸仔，人tī外口隨時ē-tàng飼奶，一直食母乳到兩歲，kah囡仔ê關係tsiok好--ê。尾--à發現囡仔對牛奶過敏，佳哉飼母奶食兩年，堅持飼奶實在有價值。
生第二胎ê無仝經驗
雖然知影飼母奶有真濟好處，是上天然、自然ê方式，m̄-koh確實有真濟知識、概念需要學習kah練習。生第二胎ê時已經有經驗，我相信家己是一个tsiok讚ê媽媽，tsit擺一定ē順利！Tsit-má koh ài照顧大漢--ê，無耐性kah時間tī萬事萬項tio̍h-ài照排隊ê大病院生，自產檢開始，就改去附近朋友推薦ê診所。
想buē到講，tsit間診所是主張囡仔kah老母無一定ài一直鬥陣，老母先歇睏，歇睏了有夠，奶tsiah ē濟。雖然概念是án-ne無m̄-tio̍h，m̄-koh囡仔生--出-來ê時若無開喙要求，就直接抱走--ah，老母kah紅嬰仔無啥mih接觸ê機會，感覺無算真正「母嬰友善」。診所有提供一爿奶「疏通」ê服務，m̄-koh若另外一爿奶mā beh ài，tio̍h-ài收費，koh無俗。落尾，我tsiah知影母奶是盡量飼就好，無一定需要「疏通」。
出院了後，到護理之家做月內，我kā護理師說明，因為阮兜iáu有大漢後生ài照顧，希望ē-tàng儘量tī做月內ê時tsūn，就hōo嬰仔慣勢老母家己飼，無論日--時、半暝lóng ē-tàng叫我飼奶。Tàu照顧ê護理師講真罕得有人án-ne，幾若个護理師lóng用「你真偉大」ê眼神看--我。飼母奶是媽媽kah嬰仔互相配合，起頭雖然艱苦，m̄-koh我相信飼母奶是一種信念，尾--à一定ē順利！
飼母奶tsit條路歹行
想beh相信一定ē順利，iáu是ē有真濟自我懷疑——Án-ne kám tio̍h？囡仔án-ne算是有平安成長--無？嬰仔出世自然ē脫水，了後護理人員一直觀察囡仔體重，講囡仔生了siunn慢--ah，出世兩禮拜應該ài恢復出世時ê體重tsiah tio̍h，驚囡仔有啥問題，真濟護理師建議飼一寡牛奶粉。牛奶粉m̄是歹mih仔，m̄-koh若beh行完全老母直接飼tsit條路，飼牛奶是ē拍歹老媽kah嬰仔ê節奏，kan-na用母奶飼囡仔，kám講飼buē大漢？是佗位做了無夠好？
我生tsit兩胎ê時，lóng bat拄著驚母奶無夠，ná哭ná大喙食飯，看kám ē-tàng khah有奶--ê--無ê情形。母奶ê量m̄是愈濟愈好，拄拄仔好就好。有真濟舊ê觀念真正ē害人tsiok忝，譬如逐工磅體重，buē輸leh參加比賽；一定愛照時間飼奶、睏前hit頓飼khah飽--leh等等。食母奶ê囡仔是家己決定食偌濟，是beh按怎叫in食khah飽--leh？有ê媽媽為著beh控制囡仔食奶ê量，tsua̋nn放棄飼母奶，改飼牛奶粉。
起頭實在有夠辛苦，有真濟無確定kah不安，m̄-koh我相信就算飼牛奶粉仝款ē有hia-ê問題——囡仔睏buē落眠--lah！M̄知到底是leh哭按怎--lah！囡仔發展án-ne到底有正常--無--lah？七年後回想大漢--ê hit-tsūn是啥mih情形，我to無啥ē記--得，免講已經生m̄知幾若年ê人，一人一句buē輸逐家lóng是專家。媽媽若無聽，囡仔出啥mih代誌，變做lóng是媽媽ê責任ê款。照án-ne看--起-來，m̄是飼啥mi̍h、按怎飼ê問題，是規个環境kám有支持媽媽飼母奶、kám有尊重媽媽做ê決定。
社會環境有leh進步
小兒科醫生到護理之家巡診ê時，專工khà電話kā我講，「全親飼」ê嬰仔大khah慢真正常，koh講我做了真好，ài繼續保持信心，我目屎就án-ne流--落-來，囡仔平安健康就好--ah。頭一胎上頭前koh有飼一寡牛奶粉，出月內tsiah改完全飼母奶。Tsit擺「全親飼」ê經驗實在hōo人感受著性命ê奇妙！Kan-na hōo老母直接飼是真正ē-sái--neh！是按怎明明上原始、上天然ê方式，有tsiah-nī濟挑戰？
生兩个囡仔差幾若年，發覺規个環境有淡薄仔進步，譬如講：生產ê方式、做月內ê選擇、飼母奶ê觀念、無論環境好iah bái，上無，tī公共空間khah有飼奶ê空間，甚至用牛奶矸仔飼嬰仔ê方法mā有進展。傳統衛教ê觀念是講，飼奶ê時牛奶矸仔ài提直直，嬰仔食奶ê時，tsiah buē suh著空氣；tsit-má有「嬰仔主導式飼奶法」，牛奶矸仔ài提平平，án-ne koh-khah倚老母飼奶ê形式，mā hōo嬰仔家己決定食偌濟。
其實，飼母奶就是hōo嬰仔家己決定食偌濟，尊重逐个囡仔lóng無仝，逐个嬰仔lóng有伊ê氣質，有人重食、有人重睏。
對飼母奶--者ê建議
上尾，不管是已經leh飼母奶、ta̋nn開始，iah是iáu leh考慮ê人，我想beh kā lín鼓勵，mā提供一寡建議：
1.冗早決定飼奶方向
飼母奶需要真濟時間，mā是媽媽kah嬰仔建立關係、情感連結上好ê機會，m̄-koh其他厝內ê代誌就需要人tàu-sann-kāng，環境支持真重要。先kā厝內人說明家己想beh飼母奶ê意願，爭取厝內人ê支持，評估出月內了後，kám有法度家己tshuā囡仔。是beh直接飼母奶，iah是用牛奶矸仔、杯仔〔1〕飼？冗早決定飼奶方向，看情形ná做ná調整。
2.了解飼母奶kah飼牛奶粉ê理路完全無仝
媽媽親身飼母奶ê方式kah飼牛奶粉ê理路完全無仝，除了非常少數ê人真正無法度飼奶，對大部份ê人來講，用母奶飼一、兩个囡仔是無問題--ê--ōo！M̄免煩惱「奶無夠」，飼母奶是囡仔家己決定beh食偌濟，伊若家己無愛suh，kā奶tu--過-去mā無效--啊！起頭囡仔真需要睏眠，母奶好消化，tiānn-tiānn飼飼--leh睏--去，或者是tiānn-tiānn放屎，tse lóng是真正常ê代誌，無過幾個月，囡仔沓沓仔大漢，就ē愈來愈穩定。Ta̋nn開始囡仔iáu細漢，mā無需要siunn濟奶。
3.Mài hōo數字縛tiâu--leh
對飼奶tsit層代誌來講，病院、機構lóng是來tàu-sann-kāng--ê；相關器具lóng是工具，媽媽若揣理念sio仝ê病院iah是機構，以囡仔kah老母做主體，合作--起-來ē khah輕鬆，真濟代誌是媽媽ē-tàng做主--ê。幾點鐘飼一擺？飼偌久？飼偌濟？Ài注意就好，m̄免過頭煩惱，tse是信心ê挑戰，囡仔食、睏ê時間，一定ē愈來愈穩定。
4.飼奶姿勢ài按怎tshiâu
你kah嬰仔lóng感覺sù-sī ê姿勢，就是上「正確」ê姿勢，無啥mih絕對正確ê姿勢。囡仔有需要，lán就放心飼、放心抱，總有一工in ē大漢，lán ài學習按怎保護家己，hōo lán ē-tàng飼khah久--leh，避免抱kah手láu--著、腰閃--著；枕頭、貼布等等工具lóng是beh用來kā媽媽tàu-sann-kāng--ê，m̄-thang顛倒hōo hia-ê mi̍h件限制。
5.別人ê意見參考就好
Tī資訊爆炸ê時代，m̄是無資訊，是訊息siunn濟，顛倒m̄知按怎做，m̄知beh相信啥mih人；序大人、朋友ê關心kah建議聽聽--leh就好，人ê記持真有限，像阮大漢後生一歲ê成長狀況，我tsit-má真濟lóng放buē記--得--ah，免講有ê人可能lóng生3、40冬--ah。上kài重要--ê是每一个囡仔lóng無仝款，個性、情形差tsiok濟，無法度lóng用仝一套。
6.揣支持團體，朋友鬥陣行
飼母奶免khai siunn濟錢，lán ē-sái tsiūnn網揣飼母奶ê支持團體，大部份諮詢是免收費用--ê。自從開始做媽媽，自由時間就hōo囡仔切kah幼幼幼，照顧囡仔確實是無簡單ê代誌，需要逐家鬥陣向前行，ài相信家己kah囡仔。我頭一胎koh ē sì-kè去揣所在飼奶，第二胎愈來愈熟手，加上社會對飼母奶ê接受度愈來愈大，有飼奶室真好，無mā無要緊，tī逐所在lóng ē-sái直接飼奶。
鼓勵逐家用家己自在ê方式飼奶，愈來愈濟人有意識án-ne做ê時tsūn，tsit个社會tsiah ē愈來愈進步。飼奶雖然真了時間，m̄-koh一切lóng真有價值，若是ē-tàng koh選一擺，我iáu是ē選擇飼母奶！
1.編註：牛奶矸仔奶喙仔ê設計雖然是模仿奶頭，m̄-koh因為用牛奶矸仔飼奶kah實際上食母奶ê情形無仝，嬰仔m̄免大力suh就食ē著，致使有ê嬰仔ē產生「奶頭錯亂」ê問題，tsiah ē有人建議改用杯仔來飼奶。
