作者：台大台語文社 短講
各位關心台灣ê朋友，逐家暗安、逐家好！今仔日我是代表台大台語文社來發表阮ê意見kah想法。相信徛tī tsia ê每一位朋友，對最近立法院發生ê代誌，可能ē感覺真失望、真m̄甘，甚至認為講lán人民無才調去影響政府áu蠻ê決定。M̄-koh，阮想beh kā逐家講，lán絕對m̄是無力抵抗ê人，逐家講tio̍h--無？親像今仔日，逐家願意徛--出-來、願意去網路頂連署、願意來關注tsit件代誌。Tsia-ê行為，lóng ē-tàng hōo國會感受著壓力，hōo in koh-khah重視lán人民ê聲音。
Suà--落-來，我想beh唸一首詩，是林亨泰先生ê〈力量〉。台大台語文社想beh鼓勵逐家，透過文學ê力量，提醒身邊ê朋友——關心家己ê社會、關心家己ê政治、關心家己ê國家，對無ha̍h民主精神ê國會講一句：「無愛！」
等--一-下我kā mài-kù án-ne攑--起-來ê時tsūn，希望逐家ē-tàng鬥陣來huah一聲：「無愛！」Lán先來練習--一-下。
欠缺實際討論ê法案，lán beh愛iah是無愛？（攑mài-kù）
無愛！
無合理hōo立委hùn權ê法條，lán beh愛iah是無愛？（攑mài-kù）
無愛！
三黨委員ê暴力行為，lán beh愛iah是無愛？（攑mài-kù）
無愛！
聽--起-來逐家lóng準備好勢--ah。若án-ne，希望我liam-mi beh唸ê tsit首詩，ē-tàng hōo koh-khah濟人知影，lán逐家現此時leh做ê代誌，lóng是有意義--ê。
〈力量〉〔1〕林亨泰
力量uì tueh來？
M̄是咬齒根 m̄是捶胸坎
M̄是去怨嘆 m̄是流目屎
力量uì tueh來？
M̄免去咒誓 m̄免家己死
M̄免去刣人 m̄免見著血
力量uì tueh來？
啥mi̍h lóng m̄免
Kan-na輕輕仔
M̄-koh ài堅定 講一句：（攑mài-kù）「無愛！」
三五个人講 無定著無啥mi̍h
M̄-koh 假使幾萬人
幾十萬人 幾百萬人
同齊講一句：（攑mài-kù）「無愛！」
啊！
Kan-na請你輕輕仔
M̄-koh ài堅定
請你講一句：（攑mài-kù）「無愛！」
啊！
請你好好仔保重你ê性命
愛惜你ê性命
等到hit个時tsūn若到
請你講一句：（攑mài-kù）「無愛！」
多謝逐家，ǹg望台灣趕緊拍phú光，lóo-la̍t！
