編按：原文tī 1993年2--月，《台文通訊》第17期，第7頁刊出；漢羅用字有koh調整--過，羅馬字部份保留原本使用ê傳統白話字。
我是一个基督徒，細漢ê時參加教會舉辦ê夏季學校，學過真濟kái ê白話字（Hō-ló話羅馬字），m̄-kú因為學了無用，所以lóng chiok緊koh bē記--得，實在對不起以前教過我白話字ê老師。Tùi國中到大學畢業了tī社會工作chit段時間，mā lóng無想到koh來練習寫家己ê母語，無拍算是來到美國讀冊以後，chiah行出真正ê一步。
舊年7--月李勤岸先生坐bá-suh奔波去十幾間學校演講，對台灣留學生講用母語做主體ê台灣文學運動ê重要性。我聽了真有同感，開始teh想應該tùi佗位開始比較khah好？語言ê問題，講複雜非常複雜，因為che是整個國家長期ê代誌；m̄-kú lán mā ē-tàng kā伊看做是一項單純ê問題，因為每一个人tī任何時chūn lóng ē-tàng開始做自我ê母語練習。我ê方法是用我ê母語（Hō-ló話）寫批hō͘爸母kap幾位上kài好ê朋友，因為chiah開始起步，所以我用漢羅併用ê方式（就是chit篇文章ê寫作方式）。我感覺對一个「新手」來講，漢羅可能是上kài方便ê方法。雖然是án-ne，開始beh用母語來寫一張批ê時，mā是真無簡單，ài用真濟時間，我想che一方面是字kap拼音ê問題；但是khah主要--ê可能是過去無用母語思考寫作ê習慣。但是我感覺若hām用英文寫報告比--起-來，用家己ê母語寫作iáu-koh是輕鬆chiok濟，我想lán若ē-tàng用學英文ê時間ê十分之一來學寫母語，一定有法度寫出、講出一流ê母語。
我建議有心想beh用母語寫作ê朋友，千萬m̄-thang等到有一套標準通用ê書寫系統chiah來開始，應該tùi chit-má開始練習，用一套家己感覺上kài簡單ê方法寫，先m̄免注意用字ê適當kap正確，khah要緊--ê是胡民祥先生所講--ê，練習用母語做思考（註一）。若準lán有能力正確用母語思考，文字只是一種表達思考內容ê記號niā-niā。以後等漸漸發展出一套khah hō͘逐家接受ê文字系統ê時，che並m̄是大問題。
對現此時ê Hō-ló話運動kap文字創造ê過程，我有兩點建議。我感覺語言hām民族性實在有真深ê關係。舉例來講，英文內底有比漢文khah濟用來招呼、感謝、呵咾別人ê字句，所以tī美國我感覺人kap人之間ê關係khah和諧，khah有法度做伙合作，mā khah ē替別人設想。所以我teh想，是m̄是可能tī Hō-ló話運動kap文字化ê過程將khah濟hām感謝、招呼、呵咾chit款有幫助人際關係ê字詞創造--出-來，添入去Hō-ló話內底？
另外，對一寡無ha̍h時代意義ê字詞，kám是有辦法kā伊改造，hō͘伊khah ha̍h時代ê意思。比如Hō-ló話ê「pùn-sò」是指beh tàn-thó-ka̍k ê mi̍h件；但是chit-má已經有愈來愈濟人將pùn-sò當做是一款寶貴ê資源來處理、收回、再生，m̄是應該隨便tàn掉ê無路用mi̍h。其他iáu-koh有真濟類似ê例thang討論。Chit項工作無應該kan-na是語言學家ê代誌，mā應該有各个行業、學科ê專家做伙投入來思考。我希望tī lán從事語文運動ê同時，有將新ê眼光、好ê氣質添入台灣，引導lán台灣百姓來面對21世紀。
註一：請參考胡民祥寫ê〈台語文學化的第一步〉，收集tī林宗源等著《鹹酸甜的世界》，台笠出版社，1991年8--月出版，第11頁到20頁。
#台文通訊30週年經典回顧 專欄。
台文通訊BONG報315期，2020年6月出刊。
歡迎捐款贊助 #李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
有固定的長期捐款， 讓更多的台語文相關計畫可以穩定的推行，感謝逐家。
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
