神祕ê『貓頭鷹』

作者:邱宴藜



若是講著『貓頭鷹』,你ê印象是啥?是Harry Potter內底出現ê動物伴「Hedwig」、iah是tī廣告面頂掛一副目鏡、kánn-ná真巧ê尪仔?除了對『貓頭鷹』ê印象以外,你kám知影『貓頭鷹』ê台語按怎講?

5月21,台灣蠻野心足協會邀請李平篤老師來kā聽眾介紹『貓頭鷹』tsit款生物,tī無仝社會,『貓頭鷹』代表無仝意思,普遍來講,『貓頭鷹』因為出現tī古早ê希臘神話當中,是智慧女神ê使者(sù-tsiá),所以有「智慧」ê象徵。另外,因為『貓頭鷹』ê日本話發音「ふくろう」(Fukurou)kap「不苦労(bē辛苦)」、「福郎」倚音,致使『貓頭鷹』tī日本tsiânn做福氣ê代表,真濟建築(親像日本時代起好ê台大文學院)iah是伴手包裝,頂面lóng有『貓頭鷹』ê圖iah像。

翻頭tńg來台灣。華語講ê『貓頭鷹』,是因為『貓頭鷹』ê面看--起-來親像貓仔面,án-ne台語--leh?『貓頭鷹』ê台語號做「鴣黃(koo-n̂g)」(編按:mā有人叫in暗光鳥、貓頭鳥),原因是tsit款生物身軀頂kuân ê色水枯黃枯黃,mā方便in bih tī樹頂歇睏。無仝語言呈現無仝看待ê角度,tse是tsiânn趣味ê代誌。

Lán人創作故事,將鴣黃當做智慧、幸福ê代表,m̄是凊彩講講,事實上,鴣黃生存tī地球有in ê本領。為著beh tī暗時活動,鴣黃ê烏仁是暗色--ê,目睭koh是管仔形--ê,hōo鴣黃ê目睭固定tī目空,bē tín動tsiah thang好掠食mi̍h,tsit-má hip相機ê跤架就是án-ne ê設計原理;另外,鴣黃ê面盤mā真特別,筋肉ē-tàng伸勼,koh有滑滑ê特化羽毛,方便收音kap助眠。老師koh展一張相片hōo gún看,hit張相片是攝影師tuì一隻鴣黃ê kha-tsiah-phiann hip--過-去,m̄-koh鴣黃ê頭suah完全轉--過-來,原來是鴣黃為著掠獵物,in ê頭演化做14塊頷頸骨,每一塊大約ē-tàng se̍h 20度。Iáu有tsiok濟趣味ê鴣黃智識,親像in ê耳空倒爿khah kuân、正爿khah低,就是beh tī聽著聲、越頭ê時tsūn,hōo身體去計算兩爿耳空ê時間差,換算做距離,án-ne ê構造後--來mā hōo人類提去參考,tsiânn做定位功能ê設計原理。是m̄是tsiok趣味--leh?

目前全世界鴣黃超過130種,台灣ē-tàng看著13種。其中bā-hio̍h屬--ê有12種,就是面盤親像貓仔;另外一種就是華語講ê『草鴞、猴面鷹』,面盤親像猴,tī台灣數量無濟,已經列入保育動物ê範圍。

就親像台灣蠻野心足協會一直leh強調、tshui-sak ê代誌——用台語來講環境。Lán ê本土語言kap環境長期受著破壞,需要好好仔復育,復育ê頭一步就是ài去接觸、了解歷史、內涵,講座聽煞,對貓頭鳥、鴣黃有koh-khah濟ê了解,ē記得後擺去野外看著tsia-ê生物,用尊重ê態度欣賞--in、好好仔kā in保護。




編按:本文是2020/5/21棲地復育台語講座「神秘ê貓頭鷹」講座摘要記錄,講者李平篤是台灣大學生化科技學系ê名譽教授。台灣蠻野心足生態協會舉辦ê「蠻野講堂」tuì 2019年3月份起kap李江却台語文教基金會合辦規劃十場有關生態環境議題ê台語講座,歡迎逐家tī逐個月第三禮拜五暗時七點到九點,同齊來「呷米共食廚房」(台北市中正區衡陽路9號3樓)擴展家己ê台語棲地(tshe-tē)!詳細資料ē-tàng看「台灣蠻野心足生態協會」FB專頁。






#棲地復育台語講座專欄,本文使用教育部推薦漢字kap臺灣閩南語羅馬字拼音方案
台文通訊BONG報316期,2020年7月出刊。

--------------------------------------------
歡迎捐款贊助 李江却台語文教基金會 (捐款thang抵稅,匯款了後請通知02-23112199)
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox


郵政劃撥:19021486
戶名:財團法人李江却台語文教基金會
電匯:123-20-050514-2
華南銀行士林分行活儲
戶名:財團法人李江却台語文教基金會

李江却台語文教基金會需要你ê定期捐款,逐個月捐助NT$200以上,lán做伙來推動復振台灣語文ê事工,歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。

◎逐個月贊助本會(台文通訊BONG報發行單位)NT$200(iah是逐冬NT$2,400)以上,做伙支持基金會事工kap雜誌編印發行費用。歡迎利用郵局劃撥、信用卡(寫捐款單)、線頂捐款、現金贊助、銀行/ATM轉帳(轉帳了後請通知)、支票、郵局戶頭自動轉帳扣繳(寫授權書),捐款收據ē-tàng做『列舉扣除額』抵稅ê用途。