作者：台大學生組織
Uì 2024/2/1新國會就職以來，國民黨kah民眾黨立委tī立法院內底沒收程序委員會、程序阻擋質詢等等ê行為，hông對兩黨所謂ê「國會改革」失望透底。Tī 5/17 ê立法院會議當中，國民黨kah民眾黨無等議會充分討論，就硬beh kā充滿爭議ê法案通過，hōo阮看著國民黨猶原kah十年前三一八事件發生ê時仝款，並無尊重憲政體制kah民意，破壞民主機制。阮強烈譴責5/17立法院內底，國民黨kah民眾黨違背程序正義kah硬beh kā爭議法案過關ê行為。針對程序正義、國會hùn權案koh有國會暴力事件，阮有三點討論：
一、藍白看無程序正義，法案應當退tńg去審理
Hit工立法院審理ê重點案件包括藍白提出ê《國會改革法案》，5/17討論ê法案是藍白現日提出ê修正動議版本（黃、傅新版）〔1〕。藍白上頭仔提出ê提案bē輸是空殼，刁故意利用修正案kah再修正案tsinn入藍白ê真實意圖，扭曲調整用ê臨時動議，hōo委員kah大眾無時間thang了解法案ê內容。針對無公告草案ê質疑，黃國昌koh講話m̄驚làu-ē-hâi，kā法案內容稱做是「上kuân機密」。Tī會議中，立法院院長韓國瑜甚至取消宣讀法條ê程序，倚pn̄g藍白ê多數優勢表決「停止討論」，直接表決。以上種種ê事件無論有符合議事程序ê規範iah無，lóng kah人民對程序正義、公開透明ê想像無ha̍h，m̄-nā破壞國會ê慣例，mā kah過去十年公民社會對公開透明ê追求完全無tuì-tâng。
二、虛改革實hùn權，國會改革需要權責明確kah公開透明
Tī tsit个事件當中，國民黨kah民眾黨借「國會改革」ê名義，實際上是beh kā國會hùn權。藍白硬beh通過ê法案內容包括：人事同意權、立法院聽證調查權、總統國情報告常態化、藐視國會罪，iáu有正副院長記名投票。目前公開tī立法院官網ê法案已經tsiânn hōo人操心peh腹。
「藐視國會罪」無清無楚，無詳細列出定罪ê要件kah按怎定罪，恐驚有立委利用個人ê主觀意願kā別人創空、定罪；目前部份版本ê草案甚至beh用《刑法》處罰，tse mā有可能違背大法官釋字585號所講ê『違反協助調查義務者，於科處罰鍰之範圍內，施以合理之強制手段。』
Koh來，立法院ê調查權kah聽證權kā法人、人民團體列做規範對象，可能限制人民ê權利。仝時，無設置自律或者是制衡ê方式，有立委妄用調查權ê可能。總講--一-句，立法院調查權相關ê法案，需要koh-khah濟權力限制kah幼項ê討論，無應該青磅白磅就通過現此時ê hùn權法案。
三、譴責國會暴力，回歸理性實際討論
Tī tsit个事件當中，阮看著三黨ê委員lóng對有無仝意見ê人採取肢體暴力。Tī國會殿堂內底放sak理性討論、暴力sio拍是所有公民lóng m̄願看--著ê行為。針對tsiah-nī重要ê議案，阮嚴正要求立委落實法案內容ê實際討論，m̄是kā討論當做是sio拍惹事ê痟戲。
藍白鬥陣破壞程序正義，朝野協商suah變做是弄喙花，利用人數優勢閃開逐條審查，剝奪別黨委員對爭議法案ê討論權。Kah十年前ê服貿爭議sio比，tsit擺藍白兩黨對程序正義ê破壞是仝款厲害。Tī時lán立法院tsiânn做國民黨kah民眾黨ê一言堂--ah？M̄免公開透明，m̄免協商討論，m̄免宣讀程序，就ē-tàng通過藍白兩黨beh愛ê議案？
無討論就m̄是民主，欠缺透明資訊kah充分討論ê議會m̄是lán所愛ê立法院。阮強烈呼籲藍白兩黨即時kā國會hùn權法案撤回。逐黨lóng應該尊重議事程序，特別是「聽證調查權」kah「藐視國會罪」有侵害全民權利ê可能，需要公開透明、ha̍h憲ha̍h程序ê討論。立委應該實際討論法案，m̄-móo重搬烏箱，為反對來反對，甚至利用避重就輕ê言論kah暴力行為，kā改革變做是利益鬥爭。
連署表單：https://forms.gle/XazZiw9JaW1YCyuU9
