主講／周婉窈
記錄／鍾育紋、蔡天享、賴昭男
各位在座ê前輩、先進kah少年朋友，逐家好。我tī台大教冊，我叫做Tsiu Uán-biáu〔1〕，華語叫做『周婉窈』。
今仔日我特別用台語來講，選擇台語有兩个原因，一个原因就是講--起-來其實我就是khah慣勢講台語。考慮著lán ê前輩，in若ē-tàng聽著台語，我感覺khah親切。因為我認為講lán beh救台灣，一定ài跨世代，lán tsia-ê無仝沿ê人一定ài做伙合作、做伙拍拚，tsiah有希望。逐家聽hiah濟華語--ah，我講台語無定lán ê前輩ē感覺khah親切--lah。
另外一个原因tsiok嚴肅。就是講lán台灣人tī日本時代ê反殖民運動，台語是抵抗ê語言（gí-gân）。Án-ne講lín可能無啥清楚，我舉一个例，就是講tsit个非武裝ê反殖民運動主要是文化——文化tsit方面是「台灣文化協會」，政治方面就是「台灣議會請願運動」，政治hit部份我就mài講。台灣文化協會lán一般簡稱做文協，in leh辦演講一年m̄知辦偌濟場。Hit時一年估計11萬人去聽〔2〕，in辦演講一定是用台語，in tī霧峰辦夏季學校，講師lóng用台語講，所以我認為lán一定ài知影語言ê問題，台灣話、台語是抵抗ê語言，但是tsit-má kiōng-kiōng-beh無--去--ah。
你若照UNESCO ê標準來講，lán tsit个語言無定koh 20冬就無--去，所以lán一定ài積極來kā伊救。Lán若無積極來救ê時，我想tsia-ê在座ê少年人可能到lín 40至50歲ê時，tī台灣就聽無台語--ah。當然你去廈門，in ē講「閩南語」iáu tī--leh--啊，但是我tsit-má所講--ê是lán台灣ê台語。
我koh舉一个例。Lín知影林茂生--無？知--honnh！知--honnh！（觀眾起huā，因為有立委行來逐家看ē著ê天橋來致意）林茂生伊是東京帝國大學畢業--ê，伊日語tsiok好--ê；伊尾--à koh去美國Columbia（『哥倫比亞』）大學提著博士學位，英語mā tsiok好--ê；伊koh tī lán台南工業專門學校教德語，伊德語mā tsiok好--ê。但是伊tī厝--裡規定囡仔ài講台語，伊去演講mā一定講台語，逐遍去夏季學校伊lóng是用台語講課。
另外我beh講--ê就是5/21，就是tsit个禮拜二，我真感動，有兩項代誌hōo我tsiok感動--ê。第一項，就是我beh去上課ê時，其實uì 18--lah，就是5/17 hit暗tsit个集會開始，就有學生來kā我請假。因為我拜二有課，到我beh上課進前有五个學生來請假。In講——意思lóng差不多——做一个國民，in一定ài來tsia，所以請老師原諒。我實在tsiok愛kā回批講「老師mā想beh請假--neh」，但是老師bē-tàng kā學生請假，所以我中晝來，koh tńg去準備課，尾--à去教冊，了就koh來。
第二項感動--ê，就是講我中晝來ê時，hit時台頂有孫友聯先生、賴中強律師kah lán徐偉群老師，伊拄好tī後壁（舞台頂徛tī周婉窈後壁），koh有lán ê人權工作者Echo，lóng拄好tī台頂。我tsiok感動，三一八in就參與，我特別紮tsit張我hip ê相片。Lán看歷史ê事件，m̄是講突然就出現，比如5/21 kah今仔日5/24是uì 5/17來--ê ，5/17 lán beh按怎去分析，tse無時間我就mài講，主要是beh講2014年ê三一八運動，m̄是hit年tsiah起--來--ê，是前一年2013年差不多uì 6月底開始，逐家已經拚八、九個月。Hit時賴中強律師、徐老師kah阮幾个仔，lóng tī「台灣守護民主平台」內面，逐家拚kah，開幾若場記者會lóng無人來--neh。你kā看tse相片，tsiok孤單--ê，阮lóng tī人行道開記者會。
最近lán今仔日有tsit个集會，你若去看「經濟民主連合」（經民連）〔3〕，in其實也開tsiok濟記者會，但是記者、報紙lóng無啥人報--ooh！維持到tsit-má，是按怎ē án-ne？我想講5/17 ē hiah濟人，其實是tsiok臨時、突然ê代誌，逐家lóng拚--出-來，主要是逐家lóng tsiok氣--ê、tsiok憤慨--ê，心tsiok慒--ê、tsiok鬱卒--ê。Eh！竟然有人講lán擋立法院頭前來抗議，所以逐家就拚--來。
我賰一分鐘，我來講兩个lán ài來反省--ê。Lán tsit-má自由民主是lán台灣逐家tsiok重視ê價值，mā是普世ê價值，但是lán是m̄是有一个盲點、死角——就是講自由民主ē-tàng保護--lán--無？Kan-tann自由kah民主ē-tàng保護--lán--無？自由kah民主家己to無才調保護家己！你看lán tsiah濟人tī tsia，in iáu是強beh通過tsia-ê法案。所以自由民主，lán tsiok肯定ê生活方式，是m̄是ē-tàng保存，是lán tsiok需要考慮--ê--őo。因為in tsit-má是用自由ê方式消滅lán ê自由、用民主ê方式沒收lán ê民主。所以lán ài去考慮是m̄是應該有一个lán家己ê政治厝頂，因為lán tsit-má ê憲法，「一中憲法」，lán iáu是hām中國是仝一个大厝頂--őo！Tse詳細我就mài講--ah，逐家今仔日若tńg--去，ē-tàng考慮--一-下。
另外一个就是講，我做代誌khah重視是m̄是有效果。因為香港ê代誌，hōo我逐遍想--著lóng tsiok傷心--ê，香港hiah濟人出--來，你若看hit个過程，tsiok感動--ê。Hit條準國歌〈願榮光歸香港〉hōo人tsiok感動--ê，tsit-má mā hōo人禁掉--ah。所以lán ài去想，是m̄是ài有一个真正屬於lán台灣ê政治厝頂，上尾--à根本ê解決方法——m̄是我beh提出啥mih方法，是beh hōo逐家tńg--去ê時，ē-tàng來想。因為lán tsit个聚會應該是長期化，但是lán是m̄是ē-tàng揣出愈有效ê方式，避免lán變成香港——香港化ê問題。
我tsiok肯定三一八運動，但是伊有伊ê局限。Tsit八冬來，lán逐家lóng認為政黨輪替是民主體制上重要--ê，但是lán ê政黨輪替是「中國黨」kah「台灣黨」輪替--neh！Tī台灣，我感覺做一个台灣人tsiok困難、tsiok辛苦--ê，m̄知逐家是m̄是beh做台灣人。Lán ê前輩奮鬥beh到80冬，結果lán每四年——其實ài講每兩年，地方選舉是連動--ê——連帶大選，所以lán每兩年、每四年，lán就ài生死存亡一遍。Tse kám是lán ê命運？是m̄是應該去考慮另外lán ài行ê路？Lán ê前輩、lán ê歷史kā lán指示ê路，lán一定ài思考體制外有啥mih ē-tàng做--ê。一直lóng絞tī tsit个體制內面，lán是m̄是已經盡磅--ah？
我koh講一句--lah--honnh，我tsiok關心轉型正義，我差不多十幾冬來，為著轉型正義南北走tsông，但是lán tsit-má已經到盡磅--ah，我感覺tse就是lán koh拄著一个政治厝頂ê問題。Tsit个落實轉型正義ê單位是國家，lán台灣kám是真正一个國家？真正一个正常的國家？好，我就講到tsia，多謝！
