生湠母語傳後代

作者：Tân Têng-iông

Lia̍t-ūi chu-kun góa chóng chhiáⁿ,

sèⁿ Tân Têng-iông góa ê miâ,

gún lâi siá koa hō͘ lín thiaⁿ,

bó-gí chhòng-chok chin chhia-iāⁿ.

Ji̍t-pún si̍t-si Hông-bîn-hòa,

Kok-bîn-chèng-hú m̄ goān soah,

jîn-bîn ná bah chāi-lâng koah,

kìm-chí bó-gí siū thoa-bôa.

Siăn-pái piàⁿ-sè hō͘ bó-gí,

tháu-pàng le̍k-sú thó chèng-gī,

bó-gí ì-sek chiām kak-chhíⁿ,

chhui-sak bó-gí tng tio̍h-sî.

Bó-gí chu-sán chin pó-kùi,

sio̍k-gí kù kù chhàng tì-hūi,

sì-kù-liân-á tián chhùi-súi,

lâm-lú po-koa sim-hoe-khui.

Thoân-sêng bûn-hòa iōng bó-gí,

tah-óa seng-oa̍h siōng tio̍h-bī,

jīn-bat ka-tī ê té-tì,

kiōng-tông chhòng-chō sin sè-kí.

Kóa-á kàu chia beh chhé-pái,

tâng-chê chò-hóe kho͘-óa--lâi,

hun-phài khang-khòe tàu an-pâi,

seⁿ-thòaⁿ bó-gí thoân āu-tāi.

#七字仔專欄，本文使用傳統白話字。

#台文通訊BONG報 363期，2024年6月出刊。

#李江却台語文教基金會需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。

台文通訊BONG報