30冬前，有一陣要意台語ê未來ê前輩，決定同齊來創辦台語文雜誌，tsiah有《台文通訊》tī洛杉磯puh-ínn。30年來，伊講文化、sueh歷史、記心情、論科學......，啥mi̍h to有，有濟濟值得收藏ê作品。Uì《台文通訊》到tsit-má ê《台文通訊BONG報》，伊ê多元、自由kap包容，一直lóng無改變。
台語文雜誌創刊30週年tsit款大代誌，本底應當是ài招逐家做伙來鬧熱--一-下，m̄-koh，受著疫情影響，實體活動bē辦--得，變做線頂ê慶祝會。透過tsit个方式，顛倒kā海內外濟濟台文有志，做一擺lóng箍做伙，仝款鬧熱滾滾！除了看著bē少台語文運動ê sia̋n-pái以外，mā有tsiok濟少年人來參加。有專門講台語議題ê網tshìng、有tī海外開辦台文班ê會長、有成立台語共學團、台語親子友善課程ê爸母，有人搬戲、寫歌、編尪仔冊等等。Mā有立委來關心母語政策ê進展。逐家tī世界各地，用in上gâu ê方式，鬥陣來tshui-sak台語。
慶祝會講煞，tńg來看tsit期雜誌有啥mih好料？刊冬外ê【台文通訊30週年經典回顧】專欄，討論台語文書寫、文字標準化、對台語文未來發展ê ǹg望，tsit期kā重點lóng整理做一篇。〈Kā阮兜ê夢想，捏做囡仔畫本〉記錄莊佳穎教授出版囡仔古ê過程，母語beh生湠，培養koh-khah濟台語囡仔，是現此時kài重要ê代誌。〈Kah Tâi-bûn ê Iok-hōe〉hōo lán看著少年爸母拍拚學台語ê用心。6--月是畢業ê季節，雖bóng kan-na ē-tàng tī線頂舉辦，台大歷史系ê周婉窈教授用台語致詞，mā借tsit个機會提醒逐家，ài ē-hiáu看世界ê變化，好好仔了解、寶惜台灣ê民主自由。
以上tsia--ê，hōo lán相信，行過30冬，台語thn̂g湠ê火種m̄-nā iáu未hua--去，koh ē有濟濟人繼續kā點--落-去！Mā ǹg望逐家繼續支持《台文通訊BONG報》kap李江却台語文教基金會，hōo lán做伙kā 寶貴ê語言文化一直傳--落-去。
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
