《自然風愛地球》/林榮淑
角色介紹
創作理念
△ 王爸、王媽tī客廳看電視。
王爸：（受氣）電風愈吹愈熱，若koh m̄開 冷氣ē熱死人（徛--起-來，kā電風tshi̍h到「強」tshi̍h-jí〈『按鈕』〉，風勢轉強。）
王媽：強風吹久tsiânn做燒風，規身軀就親像火leh燒，顛倒愈熱。（大聲huah）Lín bat iah m̄ bat？（王媽徛--起-來，kā電風tshi̍h倒tńg去「弱」，風勢轉弱。）
△ 王爸拄仔坐好又koh徛--起-來，kā電風扇tshi̍h到「強」。
△ 王媽徛--起-來，kā電風tshi̍h tńg去「弱」。
△ 兩个人sńg tshi̍h「強」、「弱」遊戲。
△ 菝仔行--出-來。
菝仔：阿爸、阿母iáu-koh leh sńg開kah關遊戲？開關tsiânn緊就ē歹--去--őo！Íng過lín m̄是tiānn-tiānn罵我kah桃仔bē-tàng án-ne sńg？
△ 桃仔行出來pìnn虎貓。
桃仔：有人leh叫--我，是啥mih代誌？Ooh！Sńg開關是危險ê動作，阿爸阿母tse是m̄是叫做「歹鬼tshuā頭」？
菝仔：桃仔，m̄知影你ê俗諺語tang時變做tsiah-nī好，m̄-koh參阿爸阿母講話ài有禮貌。
王媽：囡仔人有耳無喙，有kha-tshng bē放屁。緊入去寫功課。
△ 菝仔、桃仔落--去。
王爸：你講話ê khuì口對囡仔khah輕--一-點-仔，kám m̄好？啊！無，是按怎？哪ē一直kā我gîn？
王媽：問你家己。Hngh！做賊--ê huah掠賊。心若靜自然涼爽。
王爸：講--ê比唱--ê khah好聽。
王媽：看電視娛樂ê人leh huah熱，囡仔tī冊房寫功課，無吹冷氣lóng無leh huah熱。
王爸：囡仔是（khuì口重）m̄～敢～講，你講ē-tàng開冷氣，in馬上歡喜kah大細聲叫。
王媽：Tsit-má tsiah 8點，就開冷氣，電費我m̄敢看。
王爸：錢khah好？Iah是熱--死khah好？錢死，人免死好。兩項sio比phīng，佗一項khah好？先享受先贏。
王媽：我規工無閒顧厝內三頓燒，暝日操心peh腹，竟然hōo你講kah tsiah歹聽，規口灶kan-na我上愛錢，無顧lín爸仔囝ê死活。好！就開冷氣。
王爸：（關窗仔、開冷氣，大聲huah）開冷氣--looh！
△ 冊房歡喜聲，冷氣機運轉聲。
王媽：家家戶戶同齊做伙開冷氣，電壓若是tsih載bē tiâu就ē跳電，逐家就鬥陣墜落烏暗地。
△ Pōng！
菝仔、桃仔：（大聲叫）失電--ah！
菝仔：害--ah，電腦宿題bē赴存檔，lóng去了了--ah。救命--ooh！
王爸：破格喙，講鬼，鬼到；烏鴉喙，講曹操，曹操到；大妗喙，說跳電，就跳電。Hainnh！皇帝喙iah是烏鴉喙？（家己搧喙phué）。
王媽：Hngh！叫逐家節約能源，lín m̄聽，有tsit款結局，應該--lah！無愛聽我ê話，食虧tī目睭前。
王爸：天公伯--à--ueh！桃仔，免tio̍h驚！菝仔，免tio̍h驚！
△ 王爸開窗仔，王媽leh揣蠟燭。
菝仔：（驚喜）外面馬路有一條燈流，tsiok suí！Tsiok suí！
桃仔：我看著天頂ê月娘kah天星。In有夠suí！以早我lóng無注意--著。
△ 王媽點蠟燭。
王爸：讚！停電hōo囡仔看著in以前無看--著ê suí風景。
王媽：Hainnh！失電kài恐怖、tsiok無聊！洗衣機bē-tàng用，電視bē-tàng看，電腦bē tín動，無電啥mih代誌lóng bē-tàng做。Hainnh！
王爸：失電就失電--ah，你就mài koh tī hia吐大khuì。燭光暗會mā bē-bái，「無魚，蝦mā好」！
王媽：燭光暗會是因為失電，三聲無奈，lán先來sńg節約能源「答喙鼓」。
菝仔、桃仔：（大聲）OK！
王媽：提議ê人先講。你我一份心，能源免操心。
王爸：能源E世代，節約上實在。
菝仔：能源是寶貝，分秒ài寶惜。
桃仔：省一點能源，ke一寡資源。
△ Pho̍k仔聲、樂暢聲。
王媽：你我gâu節約，能源tsiah bē khueh。
王爸：能源用了了，囝孫苦bē了。
拔仔：能源有節約，beh用bē欠khueh。
王媽：節約能源有兩好，ē富koh環保。
△ Pho̍k仔聲、樂暢聲、khoo-si仔聲、khà門聲。王爸去開門。
李爸：釋迦、蓮霧kah in阿母吵beh來參觀燭光暗會。Tshuā規家伙仔來lín兜tsak-tsō，實在真歹勢。Ke減取經--lah！
王爸：好厝邊講啥mih tsak-tsō，歡迎！歡迎！
王媽：歡迎加入。
△ 王媽tshuā一家伙仔ná拍pho̍k仔ná唱〈歡迎歌〉。
真正歡喜ē看著lín
滿心歡喜來歡迎--lín
歡迎 歡迎 阮tsiok歡迎--lín
王爸：節約能源答喙鼓，愈濟人做伙sńg，愈趣味。
李爸：真lóo-la̍t！真多謝！我講。時時節約能源，sì-kè ē-tàng省錢。
李媽：儉電減碳好，生活無煩惱。
釋迦：節約能源做伙來，好山好水好將來。
蓮霧：時時節約能源，四方創造資源。
王爸：節能愈到位，未來愈kah喙。
王媽：節能多用心，逐家心花開。
菝仔：節約能源做伙來，創作美好ê未來。
△ 電火光--ah。
逐家：電來--ah。爽！電來--ah。讚！
王媽：燭光暗會煞戲。
王爸：光榮謝幕。
△ 逐家用喙奏頒獎樂。
李爸：無電ê暗暝有另外一款滋味。啊！我想--起-來--ah。Íng過有一个世界性ê活動，全球保育組織「世界自然基金會（WWF）」，tī澳洲雪梨提頭「地球一點鐘（Earth Hour）」活動。
李媽：Tsit款愛地球ê方式，2007年澳洲雪梨頭一擺舉辦。落尾全世界總共有幾若百萬人響應，lóng總有7,000外个城市，150外个國家參加。
釋迦：老師bat對阮講--過，有Sydney（『雪梨』）歌劇院kah Sydney海港大橋、新加坡濱海灣金沙飯店、日本橫濱世界商品大樓等地標性ê建築物，lóng關電火響應。
蓮霧：台灣101大樓、中正紀念堂、小巨蛋、W飯店、中油大樓、彩虹橋、君悅飯店mā做伙參加。
釋迦：Iáu有大直橋、中山橋、市府大樓、高雄市ê大飯店等將近30个所在，lóng準時關外面壁堵kah無影響安全、m̄是主要ê燈火。
王媽：料想bē到逐家lóng tsiah-nī厲害，濁水溪後湧sak前湧。
王爸：（笑kah beh倒--落-去）前湧死tī海沙埔。
李爸：（歡喜）「地球一點鐘」活動是逐年3月29，暗時8點半到9點半舉辦，全地球同齊關電火一點鐘。
李媽：台灣關電火一點鐘ē-sái省大約六到七萬度ê電，減少量其約四萬公斤ê二氧化碳排放。
李爸：差不多是台北市大安森林公園樹木1.2個月吸收ê量。
△ 笑聲、pho̍k仔聲、khoo-si仔聲、ki-ki叫聲。
王爸：活到老學到老，今仔日我學著節約能源（加重khuì口）kah世界sio連 。Hah hah hah！
李爸：免歹勢！老兄弟！我mā是上一課。做人認真，做事頂真。Hah hah hah！
王媽：大人bē-sái輸囡仔，節約能源人人有責任，講ē到做ē到。
王爸：（V手勢）Yeah！Lán兩家做伙響應「地球一點鐘」活動，逐年3月29暗時8點半到9點半，關電火，m̄-nā愛地球mā趁著一點鐘thang歇睏。
李爸、李媽：歇睏是為著行koh-khah遠ê路。
李媽：且慢！慢且是！Tuè ē著世界潮流，kah世界sio連，iáu有一个koh-khah suí--ê——
全部ê囡仔：（同齊大叫）是啥mi̍h？（Ànn耳聽）。
李媽：節約能源，uì我做起。
釋迦、蓮霧、拔仔、桃仔：節能減碳，Yes, I do!
王媽、李媽：Tsit-má逐家kā〈自然風愛地球〉大大聲唱--出-來。
Lán kan-na有一粒地球
儉電減碳ài頂真
Lán徛ê美麗島嶼
永遠清氣好生湠
幸福是 弓開雙手sio攬suí景緻
幸福是 hōo lán食穿ê土地永續
幸福是 儉電減碳到位
幸福是 lán做伙行鬥陣
△ 全體演員唱三改。
