作者：編輯部
2025年6月27，tuì遙遠ê加拿大傳來消息講陳雷先--ê脫離病疼，離開世間--ah。
Tse是lán台灣文學，特別是台語文學重大ê損失。
陳雷先--ê是lán雜誌ê前身《台文通訊》上重要ê主筆，tuì 1992年4月份發行ê第10期起tiānn-tiānn寫社論，koh kiōng-beh逐期lóng另外發表文學作品，類型包含小說、散文、詩kah劇本，尾後tsit幾年tī本刊開專欄，特別表達想beh hōo少年朋友知ê代誌，thang講是作品上濟、堅持做台灣人ê意志、注重文化傳承ê國寶作家。
回想1990年代，真感謝有陳雷先--ê ê濟濟作品，hōo台文通訊社〔1〕 有濟濟材料thang tī當時ê地下電台製作台語文學節目，包含：《春風歌聲》、《走找流浪的台灣》、《台語QK站》、《早起的心情》、《三線路》等等，iáu有出版「台語文學有聲叢刊」有聲書〔2〕，陳雷先ê作品是定著ài揀而且tsiânn受歡迎--ê。眾讀者kah聽友lóng料想bē到陳雷先--ê久年蹛加拿大，哪ē作品hiah-nī真實，口白hiah-nī活跳，故事hiah-nī多元！
除了真有紀律ê寫作生涯，陳雷先--ê mā是加拿大ê多倫多讀者聯誼會ê靈魂人物，tī多倫多讀者組成ê編輯部負擔編140外期《台文通訊》ê過程中，陳雷先--ê是上要緊ê精神導師。
2025年3--月，陳雷先--ê聽講tī台灣有作家楊双子等等發起「台灣文學作家連署大罷免」行動，隨聯絡講希望ē-tàng替伊加入。Lán知影陳雷先--ê雖bóng身體欠安，iáu是直直掛念〈永遠ê故鄉〉〔3〕——台灣。
陳雷先--ê順行，你ê心願，阮ē拚勢來完成。
編註：陳雷ê介紹kah作品表，ē-sái參考《台文戰線雜誌社》ê整理，網址：https://reurl.cc/nYn93e。
