《重溪kap雙溪》/Bí-hûn
Tī屏東車城鄉（Chhâ-siâⁿ-hiong）有庄頭kap溪水本底lóng號做「四重溪」（Sì-têng-khe），後--來chit搭溫泉siuⁿ有名，庄頭改號做「溫泉村」，m̄-koh chit條溪猶原號做「四重溪」。車城鄉公所網站有記--著，éng過按平地beh入來到chia，lóng tio̍h liâu溪，又koh tio̍h se̍h過四改彎溪，m̄-chiah號做「四重溪」。
Éng過bat駛車tùi車城ê 26號公路oat入去199號縣路，駛ǹg四重溪庄頭。看著四重溪ê溪水一重koh一重流--落-來，有tang時仔koh彎出去到遠遠無看--見，án-ne看溪水彎來彎去，khah-ke古早ê台語人kā號做chiah-nī有台語味ê「四重溪」。
Bat看過四重溪社區網站，社區阿公、阿媽lóng ē-hiáu講弓蕉白仔話。一改去四重溪ê潘--氏農場買鹹鴨卵，正經聽著潘阿媽leh làu弓蕉白仔話。又koh chia-ê弓蕉白仔話kap高雄甲仙ê大武壠族人仝款。弓蕉白仔話是平埔族人chiah有--ê，m̄-koh平埔族ê語言lóng無--去--ah，m̄-chiah講是「台語ê弓蕉白仔話」。
弓蕉白仔話是kā一句話ê逐字koh加一字，加chit字是「s ê音+韻母」。像講一對tng-leh熱戀ê 查埔kā查某講：「Lán sān暗sām頓sn̄g食siah飽sā來sāi去sī溪sē墘sīⁿ公sōng園sn̄g散sān步sō͘」。Án-ne m̄-niā in ê話ē-tàng「加密」，in ê感情mā ē-tàng「加蜜」。
Koh有訪談蹛花蓮富里鄉明里村90歲ê潘期田先生講起，祖先是平埔族人按車城四重溪搬--來--ê，伊是第四代。
Iáu有tī Google地圖有記著beh去四重溪庄頭ê半路，mā有號做「二重溪」（Jī-têng-khe）ê地名，káⁿ是仝款都合ài se̍h過兩改彎溪。
Koh來，tī台南大內區mā有號做「二重溪」ê所在。Tī在地二溪國小ê網站記錄，éng過按西爿ê善化beh行路到chia，沿路曾文溪有tńg兩个大彎溪，án-ne決定ē拄著曾文溪兩遍，tio̍h起起落落liâu兩擺過溪，m̄-chiah號做「二重溪」。Tī戰後改號做「二溪」。
維基百科記錄台灣有幾若个「二重溪」ê地名，像：tī台南東山區有一个「二重溪」，he是ài se̍h過龜重溪，chiah ē án-ne號名。Tī南投中寮鄉mā有「二重溪」ê地名，he是ài se̍h過平林溪。Tī桃園楊梅區有地名kap溪水lóng號做「二重溪」。
Koh有，台南白河區beh倚關仔嶺有庄頭kap溪水lóng號做「六重溪」。Hia有一个「六重溪平埔文化園區」，hia-ê平埔族古早號做「Tevorang」，尾手叫做大武壠（Tāi-bú-long）ê Kuva（台語號做「公廨」），便若到農曆9月14暗暝，就是族人夜祭ê日子。文史學者講chia-ê族人kap高雄甲仙ê平埔仝款是大武壠族，m̄-koh六重溪ê大武壠族人是ùi台南玉井區遷徙來--ê。Lán若是去到玉井ê舊街，ē-sái斟酌揣看有一間漢藥店ê匾仔寫「大武壠濟生堂」，邊--a koh有一間「大武壠北極殿」，廟內有兩塊清國年代ê石碑mā有記著「大武壠祖廟」。
Sòa--來，講一个地圖揣無ê「十八重溪」。台南東山區（Tong-san-khu）有一項「國家指定重要民俗文化」，tī農曆2月初2到2月初9，東山碧軒寺佛祖媽出巡十八重溪內。Che十八重溪內是leh講，tī東山東爿淺山ê白水溪、六重溪kap龜重溪ê範圍合做伙號做「十八重溪內」。佛祖媽出巡就是tī che十八重溪內ê庄頭。
Koh kā徙到東山khah南爿ê柳營，有庄頭號做「小腳腿」（Sió-kha-thúi）。Hia有一間「重溪國小」，tī日本時代號做「查畝營公學校小腳腿分校」，本底地名就是「小腳腿」。Tī國立台南藝術大學大崎通訊有記錄三个小腳腿ê由來，我khah信講he是按Siraya平埔族語「Nounog」來--ê。意思是講ùi東爿淺山流--來ê龜重溪tī chia流入去急水溪，彎溪像人ê跤腿án-ne開--開，m̄-niā有小腳腿，隔壁庄頭koh號做「大腳腿」。戰後kā小腳腿分校改名做重溪國小。
看--起-來溪水彎入去別个溪水mā號做「重溪」，khah-ke屏東里港鄉有隘寮溪tī chia流入去荖濃溪ê hit段溪水ē號做「二重溪」。
「彎溪」kap「雙溪」是真súi ê地名，tī當地定著有兩條彎溪會齊。
Tī台灣東北角新北市ê山區有雙溪區，éng過叫「頂雙溪」，chia有平林溪kap牡丹溪會齊做伙chiâⁿ做「雙溪」，雙溪ǹg東爿流去貢仔寮（Khōng-á-liâu）、福隆入去太平洋。Chia lóng是山區，生活步步tio̍h借水路，m̄-chiah有舊街ia̍h有清國時代ê渡船頭遺跡，又koh古早北部淡水廳beh到宜蘭頭城鎮ê「淡蘭古道彎潭段」tio̍h-ài經過chia。Che頂雙溪定著有chhiaⁿ-iāⁿ--一-站-仔。
台北市士林ê草山（陽明山），有一條內雙溪kap菁礐溪（Chhiⁿ-ha̍k-khe）會齊做伙，chiâⁿ做外雙溪，尾手流入去基隆河。新竹縣寶山鄉上大ê庄頭號做「雙溪村」，káⁿ是有客雅溪kap雙溪會齊chiah ē號做「雙溪」。嘉義縣梅山鄉mā有「雙溪村」，he是九芎坑溪kap南靖溪會齊。
Tī嘉義縣朴子市有「雙溪口社區」，he是按嘉義縣竹崎鄉來ê牛稠溪（Gû-tiâu-khe）流到嘉義縣民雄鄉分做大細兩條溪，來到chia大細兩條溪koh會齊做伙chiâⁿ做朴子溪，án-ne m̄-chiah號做 「雙溪口」。
溪水有彎溪chiah ē-tàng養飼萬物mā chiah ē súi，人tī chia生活，就有故事、就有文化。
像一條台語老歌〈母子鳥〉許森淵作曲、陳達儒大師作詞，「楊柳溪邊夜半月娘súi……」唱出未婚少女生一个囝兒，無疑誤ài來到溪邊kā囝兒抱hō͘無緣ê翁婿in兜養飼，ǹg望長大成人chiah來揣阿娘。M̄-niā歌詞寫出感動人ê母愛，曲調真有台語味mā chiâⁿ做有名歌仔戲ê〈母子鳥〉調。
Koh有新北市三峽區ê畫家李梅樹，有幾若幅畫tī溪邊洗衫ê婦jîn人。Chit-má ê溪水m̄是做koân-koân ê駁岸thang防大水，就是做水庫thang農業用、民生用iah是工業用，人真oh得親近溪水。Lán若有行過阿母、阿姊、阿嬸tī溪邊洗衫ê年代，看著hia-ê圖正經ē感動，che就是藝術。
#台文通訊BONG報 377期，2025年8月出刊。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
