《〈保正伯〉kap〈放屎百姓〉:
蔡秋桐ê台語小說》
主講／陳淑容 記錄／蔡玉薰
本文是2025/6/11講座ê摘要記錄，主講人陳淑容是敏實科技大學通識教育中心專案助理教授。
踏話頭
黃石輝先生tī 1930年所寫ê〈怎樣無提倡鄉土文學〉1講著台灣人tio̍h-ài有台語文化ê意識，hit時tī報紙kap雜誌lóng有論戰，譬論講「反對鄉土文學」、「ài使用 “逐家lóng看有ê文字” tsiah好交流」、「台灣kan-na有台語，án-ne siunn “狹”--ah」，kap一百冬後ê tsit-má leh討論台語文化koh不止仔sio-siāng，tsit回講者陳淑容beh tshuā lán熟sāi台語文學ê sia̋n-pái蔡秋桐先生kap日本時代ê台語文學。
蔡秋桐ê紹介
蔡秋桐是雲林元長人，1900年出世tī五地寮ê地主家庭，hit个年代ê台灣是受日本統治，m̄-koh有家庭ê支持，伊細漢就接受漢文教育，tī公學校（tsit-má國校ê學歷）出業了後就做當地ê保正，lóng總做25冬。因為蔡秋桐是地方菁英，落尾koh有擔任大日本製糖株式會社（tsit-má虎尾糖廠）ê委員kap嘉南大圳ê議員。
陳淑容分享，tse是伊個人對蔡秋桐tsiânn欽佩ê所在，生tī好額人兜、厝--裡土地hiah濟，收田租就好，就ē-sái過kah kài快活，thài tio̍h去做保正、tshap俗事來寫文章？蔡秋桐選擇做一个文化tshui-sak者，tī 1930年代ê雲林地方組織文化劇團2、參加議會運動kap文化講演兼創辦雜誌，tse是tsiok特別--ê。
蔡秋桐上kài主要ê文化參與就是寫作，雖bóng做一个「地方仕紳」、「頭人」，又koh是保正，伊所寫--ê suah是農村、小人物ê故事，tsia-ê官方無人記錄ê「歷史」，在蔡秋桐對鄉土ê疼thàng、對小人物ê關心、對文化ê要意，留下記錄。Lán ē-sái tuì tsia了解，蔡秋桐tī日本時代算是tsiânn活潑ê人，不而過án-ne生suah hōo尾後來台灣ê國民政府kā點名做記號，tī白色恐怖時期hōo人掠去關兩冬，出獄了後就khah無bak俗事，規心作穡，tī 1984年過身，食到85歲。
1 黃石輝〈怎樣不提倡鄉土文學〉《伍人報》1930年8--月：『你是臺灣人，你頭戴臺灣天，腳踏臺灣地，眼睛所看見的是臺灣的狀況，耳孔所聽見的是臺灣的消息，時間所歷的亦是臺灣的經驗，嘴裡所說的亦是臺灣的語言；所以你的那枝如椽的健筆，生花的彩筆，亦應該去寫臺灣的文學了。』
2醒民社：『訓練話劇演員，演話劇以娛村民』。
趣味ê筆名
生tī日本時代ê蔡秋桐，知影家己寫ê故事可能ē hōo政府無歡喜，koh再講伊leh做保正，mā是一个ē hōo人感覺kap殖民政府關係khah好ê人，人mā ē有猜疑伊寫文章ê目的，為著mài惹禍tsiūnn身，伊所有ê文章lóng是用筆名來發表。
蔡秋桐ê筆名tsiânn心適，上頭篇ê〈帝君庄ê「祕史」〉是寫故鄉ê故事，用kap伊本名寫--起-來beh仝ê「愁洞」做筆名，〈癡〉ê筆名是「元寮」，就是「元長五地寮」ê意思，tuì tsit兩个筆名ē-sái了解蔡秋桐對家己出身kap地方ê認同。另外，〈王爺豬〉用「匡人也」做筆名，講家己是khong人，leh tènn痟、tènn-khong、tènn-gōng。伊koh有一个筆名是「蔡落葉」，對應著〈四兩仔土〉ê主角，寫一个出身低ê小人物ê故事。
媒體發展史
蔡秋桐文章發表ê所在，ē-sái看著日本時代台灣媒體發展ê歷史，蔡秋桐ê文章是tuì週刊起步，到1935年轉做tī文化雜誌發表，ē-sái發覺講台灣tī tsit个時代就有法度支持純文學雜誌ê出現。1934年tī台中，有「台灣文藝聯盟」創立，內底m̄-nā有文學家，mā有音樂家、美術家等等，kā台灣ê文化工作者lóng箍做伙，m̄-koh逐个藝術家lóng tsiânn性格。Tsit个聯盟發行《台灣文藝》雜誌，後--來tī 1935年到1936年左右來分家，主要是楊逵ê《台灣新文學》，因為蔡秋桐參楊逵khah má-tsih，落尾伊ê作品就lóng tī《台灣新文學》發表。
蔡秋桐ê台語小說
以農村人、事、物來做主題，故事背景tī日本時代，小說ê語言有日文，對話ê部份以台文（語）為主，描寫背景ê時透lām中國白話文，故事寫出伊對人ê慈悲kap關懷、khau洗政府、農村ê笑詼、民俗kap批評殖民主義。
〈帝君庄ê「祕史」〉
se是蔡秋桐ê第一篇小說，lóng總有十回，寫--ê是伊故鄉五塊寮ê故事，tsit个所在iáu未出名ê時，甘蔗是種上濟--ê，落尾稻仔種ê量顛倒是khah濟，其中ê緣故就是嘉南大圳ê起造。現此時lán讀ê歷史lóng呵咾講「嘉南大圳是重大ê建設」，有tsit項建設tsiah thang hōo嘉南平洋有法度大量種稻仔，m̄-koh tsit篇小說有寫出kap歷史、政府lóng無仝款ê觀點。
蔡秋桐看著作穡人因為土地hōo政府徵收，suah無穡thang作ê無奈3，心肝內是tsiânn矛盾，伊m̄甘hia-ê無穡thang作ê作穡人，m̄-koh因為家己保正ê身份ài kā政府tàu宣傳嘉南大圳ê好--處kap重要性，kan-na ē-sái透過筆名，用khau洗ê方式來批評當時政府ê政策。
〈保正伯〉
因為蔡秋桐本身就是做保正，對tsit个職務ê認bat tsiânn深，mā熟sāi tsiânn濟仝款leh做保正ê人。Lán普通人對保正ê印象就是替日本人做代誌、對日本人phôo-phôo-thánn-thánn，tsit个故事寫--ê就是一位號做「李サン 」ê保正，李サン為著beh升官發財，對日本人是tsiânn好禮，mā三不五時送「 “オセイボ” hōo大人做烏紗帽」。
「オセイボ」原底是講日本年節ê送禮文化，tī tsia ē-sái看著蔡秋桐取日語kap台語ê倚音，來講「oo-se」tsit件代誌，規篇小說用著tsiânn濟像tsit款台語kap日本話、中國話ê倚音來hōo故事koh-khah趣味。因為李サン其實是鱸鰻出身，tī小說內底mā ē-sái看著tsiânn濟khau洗ê筆路來講李サン做ê「好」代誌。
〈放屎百姓〉
Hit當時beh公開發表ê文章ài通過日本政府ê審查tsiah ē-sái出版，因為下篇ê內容無過關，tsit篇小說kan-na有「頂篇」niā-niā，雖bóng無直接看著下篇ê內容，lán tuì頂篇mā ē-sái臆著下篇寫啥mi̍h，譬論講故事ê主角是一位半農半商ê勞動者，號做「發--哥」，in老爸有放田地hōo--伊，m̄-koh伊逐項作suah無三頓飽，原來是in hit跤兜ê田有開大圳，拄好挖踮發--哥ê田，兼koh踮he內底開十字、設水門，致使發--哥有田有地，m̄-koh無所在thang掘。
Án-ne kā看--起-來就是leh講嘉南大圳，tī tsia lán koh ē-sái看著蔡秋桐tī生活當中對鄉親ê關心，tī〈放屎百姓〉講--著ê田地號做「K」，tsit字是 tuì白話字來--ê，ē-sái看著蔡秋桐小說內底各種語言ê透lām。
其他親像〈有求必應〉kap〈王爺豬〉是leh寫地方ê信仰kap現代化之間ê矛盾，〈連座〉、〈新興ê悲哀〉kap〈奪錦鏢〉是批評殖民政府ê政策對地方ê影響，〈無錢拍和尚〉描寫農業社會ê趣味故事，〈四兩仔土〉寫著散凶人ê悲哀，lóng是值得研究日本時代歷史kap文化ê教材。
戰後ê創作
蔡秋桐tī日本時代有做保正兼參加皇民化運動，tī戰後就減少消遣政府ê創作，koh寫文章自清，想bē到iáu是hōo國民政府sa一个理由就掠去櫳仔內，變做白色恐怖ê受害者之一。出獄了ê蔡秋桐uân-á tsiânn骨力tshui-sak教育kap文化活動，認為少年人有正當ê娛樂就bē做歹，tsit-má元長五塊寮ê社區發展協會mā kā伊ê作品khioh來改編，tsiânn做地方文化發展ê重要角色。
講師ê感恩kap心得
陳淑容tī 2018年參與「臺灣農村社會文化調查計畫」tsiah有機會拜訪蔡秋桐先生ê家屬，tsiânn感恩in厝內人ê幫贊，hōo研究團隊踮in兜揣著蔡秋桐先生ê新婦所整理ê資料，目前已經kā整理做《蔡秋桐影像集》kap《蔡秋桐詩文集》。《蔡秋桐影像集》ê內容包括伊ê出業證書、獎狀kap履歷，mā有伊做保正tshuā農民sì-kè遊覽、文化參與ê相片、tī監獄kap家屬ê通信4等等。《蔡秋桐詩文集》收集蔡秋桐ê文學作品，ē-sái hōo無仝專業ê人去探討日本時代ê政策、歷史、農業發展，koh有地方人物ê故事，ǹg望蔡秋桐ê精神ē-tàng tuì tsia-ê作品繼續生湠。
4《蔡秋桐文書》（T1099），中研院臺史所檔案館數位典藏。
#台文通訊BONG報 377期，2025年8月出刊。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
