主講／辛拉拉
記錄／柯育佳
逐家好，我是辛拉拉，是「對囡仔講台語社團」ê管理員。今仔日來chia，lóng是lán家己人，hō͘我感覺仝溫層chiok燒熱，有hiah-nī濟少年家徛--出-來，我感覺台灣iáu chiok有希望。九年前，因為我m̄甘願囡仔kah我仝款用中國話思考，我希望囡仔ē-hiáu講我ê族語，我就開始揣做伙用台灣話chhiâⁿ養囡仔ê人。阮chit个社團tih-beh十年--ah，台中chit-má有幾十个家庭來參加「台中台語囡仔伴」ê活動，chiok感謝chiah濟家庭支持！
因為我無希望我ê囡仔kah我仝款，到六歲就ài去hō͘中華民國強迫去學校讀中國冊，做堂堂正正ê中國人，所以我就kā伊申請自學。Tī台中有差不多十个家庭kah阮做伙，辦一个台灣人學校，阮台灣人學校就是beh用100% ê台灣話來教囡仔，hō͘囡仔浸tī台灣話ê環境，hō͘ in用台灣話來吸收智識，hō͘ in用台灣話來冤家sio拍、來交朋友。Che tī chit-má可能kan-na lán chia有，有閒ē-tàng來阮ê迷眾頁看。
Lán講語言就是天然ê國防，逐个人lóng ài講家己ê族語，chiah是正港多元ê社會，m̄是講「Eh，我是客人，我聽無台語--neh，你kám是ài講 “國語”？」Án-ne m̄-tio̍h，是每一个人講家己ê族語，chiah是多元ê社會，因為語言就是lán文化ê載體。M̄是kan-na講語言、m̄是kan-na講文化，啊無，he謝龍介mā chiok gâu講--ê--啊，tio̍h--無？Lán講文化，就是ài有各族ê意識，來處理chit个語言ê問題，chiah有意義。因為你講啥mih話、你用啥mih語言來表達頭殼內底思考ê代誌，就是你家己認同家己是啥mih族群、你想beh做啥mih款ê人。
我tiāⁿ-tiāⁿ講，我是蹛tī台灣、蹛tī家己故鄉ê外國人，因為lán台灣iáu未建國。Tī外口，我lóng ē hông問講「你kám是台灣人？你為啥mi̍h bē-hiáu講 “國語”？」Iah是講「你是m̄是外國tńg--來--ê？」Iah是講「你kám是越南iah是廈門嫁--來--ê？」Tī lán台灣，講實在--ê，beh用台灣話來chhiâⁿ養囡仔ê成本非常非常koân--ŏ͘。若是講立法院he兩兆ê金額，ē-tàng做lán台灣人學校ê教育基金，m̄知有偌好。
我lóng kā我ê囡仔講，lán就是二二八ê時chūn，中國黨刣無死ê hia-ê台灣人。頂個月，tī立法院發生hia-ê代誌，lán民進黨ê立委，去hō͘中國黨ê人拍，去hō͘ in蹧躂，我lóng感覺是拍tī我ê身軀。是按怎中國黨hia-ê人lóng無愛kah人參詳？是按怎in lóng beh用強--ê？In就是beh做hit種無正經ê代誌，害lán chit-má lóng ài踮chia徛--出-來。中國黨án-ne kā立法院變做法院，chiok m̄-thang--ê。你看chit-má lán徛tī chia講台灣話，in是m̄是就ē講「你講台灣話，你藐視國會」「你ê囡仔無去學校、無去做堂堂正正ê中國人，你藐視國會」？Lán kā囡仔教育、kā in講政治ê代誌，來講人權，去爭取lán ê權利，去chhui-sak語言ê平權，結果，lán拄著中國黨án-ne壓霸，是beh叫我按怎教囡仔？
Lán台中chiok濟中國黨ê黨產，台中chia-ê運動中心lóng是救國團包--去--ê，koh有hit个中國黨ê黨部，in chit-má想beh收--tńg-去、beh討--tńg-去。Iáu-m̄-koh，lán台中chit兩擺ê選舉，是m̄是表示台中人lóng chiok kah意中國黨、lóng chiok滿意？Lóng無chiok滿意？Tio̍h--啊！你看，lán chit幾年，是m̄是厝價一直起，m̄-koh交通、空氣、市容，koh有上基本ê安全，無一項好？最近，lán台中市區差不多十个人莫名其妙死--去，害我m̄敢chhōa囡仔去公園，我chiok驚--ê！我感覺lán chit-má就ài趁chit改罷免ê氣勢，lán lóng徛--出-來，hō͘逐家知影，lán是有法度來爭取權利--ê。Lán逐家lóng徛--出-來，爭取lán ê權利，lán ê社會chiah ē-tàng進步。
我知影我踮chia講台灣話，可能有chiok濟人聽無，m̄-koh lín逐家lóng是台灣囡仔，所以我就ài一直對lín、對囡仔講台語，án-ne lín逐家chiah有機會聽著台語。我徛tī chia，mā是beh hō͘囡仔、hō͘逐家知影，有人是用全台語leh過生活、過日子，hō͘阮ê囡仔知影，台語是ē-tàng tī任何場所自由使用ê語言。
我lóng講「lán講台語就是leh做社會運動」 ，lín逐家tńg--去ē-sái試看māi，看三工iah是一禮拜，全部lóng講台語，強迫家己講台語——iah是講你家己ê族語——m̄管去7-11、去McDonald iah是去hō͘醫生看，lóng用全台語對話，lóng講台語，lín kám有法度？你就ē-tàng完全感受著中華霸權有偌恐怖。
而且--leh，tī lán台灣有法度用台灣話思考、講台語過日子ê囡仔，phēng石虎koh-khah少。Lán chit-má ē想beh保護原生動物，m̄-koh lán台灣ê語言族群生態，mā是chiok危險、chiok恐怖--ê。
若是ē-hiáu講族語，m̄管是lán在地佗一族，族語囡仔愈來愈少，án-ne lán台灣島在來ê族群，就ē完全變做中華民族——che是chiok恐怖ê代誌。Lán若是kah囡仔講台灣話，iah是講lín ê族群語言，lán chiah有法度教in用族語來思考，chiah bē去hō͘中國人牽--去。Lán就m̄免煩惱講，囡仔去看TikTok，頭殼去hō͘影響--著。
Lán逐家lóng來講家己ê族群語言，hō͘中國人知影，你若是beh kah我參詳代誌，m̄是kan-na ē-tàng用lín hit套，m̄是一定ài我講你ê話，我chiah有法度kah你講話。Lán ài hō͘ in知影，lán台灣島ê多元是啥mih款--ê，lán ài有平權ê基礎，對方伊chiah ē驚，伊chiah ē知影尊重是啥mi̍h，án-ne lán chiah真正ē-tàng實踐民主kah正義。
Lán台灣人ê未來，lán家己決定，lán做伙來對囡仔講台語。
