作者：張家榮
第九章：招魂旗
火柱--ā離開王仔舍ê厝了後，鐵馬iáu m̄騎，用牽--ê，一个人se̍h神se̍h神行tī暗sàm ê路頂，頭殼lê-lê直直行，m̄知leh想啥貨。忽然間，有人大聲kā huah：「火柱--ā！行路頭m̄攑--起-來，是leh想啥？」
「豆腐嬸--à，是你--ooh！無--lah，我beh tńg去厝kā阿爸講好消息。」火柱--ā án-ne應。
豆腐嬸--à目頭kat--起-來，露出一个giâu疑ê表情講：「Lín阿爸？你是leh講啥，lín阿爸人已經過身--ah，賰骨頭hu té tī金斗甕仔，你mā khah清醒--leh。」
「可憐--ooh！來--lah，豆腐嬸--à切臭豆腐hōo你食，食完緊tńg--去。」豆腐嬸--à ná參伊講話ná無閒切豆腐。
火柱--ā喙翹kuân-kuân，bē輸吊三斤豬肉--leh，講：「我無錢！」
豆腐嬸--à聽一下笑--出-來，講：「M̄免錢--lah！請你食。」
無想--著，火柱--ā將豆腐食落腹肚底了後，suah雄雄kā豆腐嬸--à講：「Lín後生 “紅猴” 今年ē往生。」
Tsit聲不得了！豆腐嬸--à一聽著tsit款gia̍t-siâu話，面腔隨lua̍h--落-來，氣phut-phut kā jiáng：「死囡仔！我好心請你食臭豆腐，你suah咒懺阮後生，án-ne kám tio̍h！」
「豆腐嬸--à，你mài受氣，我講--ê m̄是gia̍t-siâu話，你ài相信--我。」火柱--ā án-ne kā講。
「無，你是ē通靈，iah是手tsíng頭仔ē-hiáu算？痟--ê！阮兜ê代誌免你家婆！」豆腐嬸--à氣kah頷仔頸筋大細條，無愛tshap--伊，豆腐擔lu--leh做伊走。
隔tńg工ing暗8點外，火柱--ā目箍腫腫去揣六tsáinn--ê。
「火柱--ā你是按怎？一个面懊tū-tū，昨暝thài ē無來我tsia？」六tsáinn--ê kā問。
「我昨暝做 “暗光鳥”，參阮阿爸開講到天光（水來--ā ê神主牌仔），睏kah tú仔起床。」火柱--ā忝kah phak tī桌頂，懶屍懶屍kā應。
六tsáinn--ê聽伊án-ne講，感覺代誌有小可khiau-khi，伊心內tī-leh想：火柱--ā ē kap in阿爸ê神主牌仔講話，tsit件代誌伊老早就知，m̄-koh，睏kah tú仔ê意思是……。
「啊你今仔日m̄就無去王仔舍hia做khang-khuè？」六tsáinn--ê kā問。
「M̄免去--ah……。」火柱--ā應。
六tsáinn--ê sa無tsit个囡仔到底是按怎，平常時iáu m̄ bat看伊像今仔日án-ne，激kah beh死beh活，bē輸消風ê雞胿仔仝款，hông看著tsiânn煩惱！
「你是m̄是佗位無爽快？到底發生啥代誌，你kā叔--à講，是m̄是王仔舍kā你欺負？Iah是鴨霸王……？」六tsáinn--ê坐leh火柱--ā身軀邊，肩胛頭kā mua--leh，沓沓仔kā問--一-睏。Thài ē知，火柱--ā kan-na一直搖頭m̄講話，兩蕊目睭掠伊金金siòng，siòng beh tsiânn十分，tsiah開金口講：「M̄是我無愛kā你講，是bē-sái講。時間到--ah，有人來……。」
「六tsáinn--ê！水來--ā in兜hit个囡仔仙有tī你tsia--無？」麵擔仔外忽然間來一、二十个人，其中一个叫做曾通--ê kā問。
六tsáinn--ê聽伊án-ne問，真正是「鴨仔聽雷」sa無意思，應講：「Beh食麵內底坐--lah！啥mih囡仔仙？阮無閒規工身軀全鉎--lah！」
「Mài滾sńg笑，阮有要緊ê代誌beh揣--伊，你知影伊人tī佗--無？」曾通露出一个tsiânn tio̍h急ê面，看--起-來kánn-ná有十萬火急，無親像leh滾sńg笑。
「阿通，你講siáng是囡仔仙？阮大兄厝--裡kan-na一个養子火柱--ā，thài有啥mih囡仔仙？」六tsáinn--ê án-ne講。
「Tio̍h--lah、tio̍h--lah……火柱--ā就是囡仔仙……就是伊--lah！」規群人做一下huah-hiu，吵吵鬧鬧hih-heh叫。
六tsáinn--ê猶原sa無tsit-má是leh搬佗一齣--ê，心內感覺tsit層代誌不止仔khiau-khi，定著是火柱--ā tī外口pìnn啥出頭kā隱瞞，若無，thài ē一暝無看--見niâ，liam-mi變囡仔仙，莫怪tú-tsiah kā問代誌啥to m̄講。
「火柱--ā！」六tsáinn--ê大聲huah。神奇--ê是，火柱--ā老早就算準有人ē來揣--伊，已經離開麵擔仔--looh！
「Mài吵、mài吵，khah安靜--leh！有啥代誌，逐家坐落來講。」六tsáinn--ê大聲講。
六tsáinn--ê招呼眾人入去麵擔仔坐，suà--落-來茶鈷kuānn leh手--裡，隨个仔隨个kā in斟茶，無閒一睏了後，伊tsiah坐--落-來，吐一个大khuì講：「到底阮火柱--ā是發生啥mih代誌，lín有佗一位ē-sái kā我講hōo khah斟酌--leh？」
「我來講--lah！」曾通代先出聲。
「阮聽王仔舍ê管家福壽伯講，hit工鴨霸王hōo狗仔咬kah身軀全傷，是火柱--ā用神奇ê喙瀾kap掃帚kā醫治好--ê，工夫嶄然厲害，所以阮tsiânn好玄，想beh請伊替阮老母看māi，看伊有才調醫治烏跤病--無？」曾通講出代誌ê經過kap揣火柱--ā ê目的。
「烏跤病用喙瀾醫ē好？無啊，阿通你是頭殼有問題iah是按怎，福壽伯烏白pûn雞胿，你suah信kah ē食糕仔！」六tsáinn--ê聽了，感覺siunn hàm古，直透kā thuh。
曾通面仔反紅，小可歹勢歹勢講：「一開始阮mā是認為福壽伯是leh臭tuānn，m̄-koh，伊將火柱--ā按怎展工夫ê代誌話kah有影有跡，當場有tsiânn百粒目睭thìng好做證，koh kap阮sio輸，講火柱--ā絕對m̄是普通人；所以，阮今仔日tsiah ē想講來看māi--leh，無定伊真正有兩步七，ē-tàng kā阮阿母ê病醫好。」
「是--lah、是--lah！阮lóng是來揣囡仔仙醫病--ê，伊人--leh？」一个查某人án-ne講。
（後期繼續）
