作者：鄭文琦
今年7月20、21連suà兩工下晡，由台南在地ê雞屎藤舞蹈劇場所製作ê《再會啦！黃昏發的尾班車》2.0，前後tī uì斗六開到新營kah uì新營開到斗六ê區間車頂演出。我beh看--ê是禮拜ê hit場——uì新營到斗六ê車頂。
Tī開演進前，tsia-ê觀眾先tī新營車站大廳集合，列車長陳慧勻mā是tsit齣表演ê編導（伊ê阿母就是雞屎藤ê創團人）特別kā觀眾解sueh，火車小等ē經過三个車站，分別號名「晚霞」、「夏至」、「平行時空」，對照表演所在ê「日本時代」、「戰後初年」、「九〇年代」tsit三節車廂。講--起-來kánn-ná tsiânn簡單，m̄-koh每一段跳舞ê時間tio̍h-ài完全仝款。時間若到，觀眾就ài tuè工作人員ê指示，去到後一節車廂去欣賞後一个故事。Án-ne來，無論是對舞者iah是觀眾來講，lóng需要完全配合，表演tsiah ē-tàng順利換場。
講著tsit款普通車，我就ē想起khah早iáu tī新竹讀高中ê時tsūn，有tsiânn濟同窗蹛tī竹北、竹東、湖口、新豐，甚至是苗栗南庄——hia-ê人主要是客人。In逐工透早tio̍h-ài去坐車，因為火車準時koh俗。凡勢火車是民國九〇年代進前，本省ê散赤人kap勞動者家庭，上慣勢ê交通工具，mā連繫無仝族群ê生活空間。
其實，tī百年以前，彰化上出名ê新文學作家賴和bat寫過一篇文章〈赴會〉，tsit篇文章ê內容是講伊beh坐火車去霧峰開會，刁故意揀一節無人熟sāi ê三等車廂，無疑suah hōo伊聽著一寡農民teh批評林--家：
「In kám m̄是講beh替台灣人謀幸福？」〔1〕
「講hiah好聽？」
「今仔日聽講tī霧峰開理事會。」
「阿罩霧？若m̄是霸--lán搶--lán，in ê家伙哪ē tsiah大。」
「Mài講全台灣ê幸福，若kan-na對in ê佃戶，mài koh hiah橫逆，也就好--looh。」
Lán uì賴和ê tsit篇文章就ē-sái了解，1908年日本政府完成ê南北縱貫鐵路，hōo lán台灣人上大ê改變，就是ē-tàng連繫頂港kap下港ê群體、拍破無仝階層之間ê區別。Tse kám講m̄是一个值得探討ê問題？
繼續講著我去看ê hit場。頭先我hōo人分到第三節車廂，也就是ài uì「九〇年代」看到「日本時代」kap「戰後初年」。Tī tsit个「台灣錢淹跤目」ê年代，兩个舞者穿kah pha-lí-phá-lih——一个查埔武雄掛金鍊仔kap金錶仔，m̄-nā穿一領花衫，iáu有一跤té滿紙票ê皮箱kuānn tī手內；另外一个跳舞ê查某（當年武雄ê青梅竹馬）淑芬，穿kah妖嬌美麗，雄雄出現。伊假意倚去武雄hia，想bē著伊竟然是「烏食烏」，提出手銃ài武雄交出皮箱。原本tī車頂hōo人台語電影《台北發的早車》hit款悲情ê印象，suah變做笑詼koh刺激ê表演，mā是真趣味。
但是老實講，我iáu是感覺有淡薄仔失望，因為tsit款ê劇情設計，並無解sueh著日本時代流傳--落-來ê鐵路「現代性」，到底是按怎影響著lán人對幸福未來ê ǹg望，hōo無仝時代ê台灣人踏出去外地冒險ê第一步，去追求家己ê幸福——親像tī第一節車廂（日本時代）演出ê兩名戲班查某月雲kap碧霞，無法度替家己ê婚姻做主，suah來假做一對愛人仔sio-tshuā走。Tsit段南管〈一年四季〉kap仝車廂ná彈月琴ê唸歌，實在真好聽，m̄-koh每節車廂ê時間tsiah短短--à半點鐘，觀眾iáu-koh沉醉tī情緒內底ê時，穿柴屐ê阿勇（月雲ê阿兄）就beh來掠月雲tńg--去，有影是真無彩。
若m̄是火車，武雄kap淑芬kám講就無可能狹路相逢？Koh-khah歹講ê問題是，月雲kap碧霞kám講有勇氣追求家己ê幸福（就算是ē失敗）？車站tī過去是充滿期待ê所在，hōo lán看見美好ê未來。我m̄知影tī「夏至藝術節」結束了後，雞屎藤舞團kám ē繼續探討tsit个問題？至少對我來講，後擺車頂ê表演我一定ē koh再來，因為，lán lóng需要地方ê舞蹈kap藝術來記錄lán ê心情。
