主講／蔡春美
記錄／吳宛霖
本文是2020年8月12 ê講座摘要記錄，主講者是國立臺灣師範大學衛生教育研究所博士、輔仁大學心理學系助理教授蔡春美。
若是有一間員工lóng是愛滋感染者ê餐廳，你kám敢踏--入-去？為beh挑戰社會ê偏見，世界頭一間「愛滋病餐廳」已經tī加拿大開幕。M̄知聽著愛滋，你ē想著啥mi̍h？對愛滋ê了解有偌濟？你是按怎看待愛滋感染者？就親像因為武漢肺炎停課ê頭一間高中，若有人穿hit間學校ê制服，記者就kā圍起來採訪，致使社會有歧視，tse就是無知ê驚惶。
1984年ê愛滋，hit時ná像烏死病，愛滋感染者是高危險族群，m̄-nā無疫苗、無藥醫，又koh死了真緊。到kah 2020年ê愛滋，tsit時是「U=U」1 ê時代——愛滋已經tsiânn做一種慢性病，若是照起工食藥仔超過半冬，體內就無愛滋病毒，就bē傳染hōo別人。一日食一粒，80% ê患者ē-tàng活超過20冬；伴侶若是uè著愛滋，雙人做伙食藥仔，ná像leh食『避孕藥』ê意思，做伙預防、做伙治療。另外，若是有性行為，mā ài用「套仔」來保護，無用「套仔」是kài危險ê行為。
愛滋病毒本身其實bē致使感染者死亡，是因為愛滋病毒造成人ê免疫細胞減少，tsiah致使感染者無免疫力來死亡--ê。因為無免疫力，上驚去食著ia̍h是摸著細菌，『生魚片』、『生菜沙拉』當然是bē-tàng食，mā bē-sái飼動物伴（尤其是粉鳥仔）。
Tī社會內底，愛滋感染者受--著ê歧視ē-sái講是包山包海，親像買厝、讀冊、畢業了後做兵、食頭路、看醫生、買保險、捐器官、交通、婚姻各方面等等，hōo感染者真有心理壓力。雖然愛滋條例2第12條第3項有規定醫事機構、人員bē-sái拒絕服務愛滋感染者，m̄-koh現實上有超過四成ê醫生無願意診療；有ê pián講掛號人數已經盡磅、有ê pián講器材無夠來拒絕，願意診療ê醫生，mā因為壓力m̄願hiàn光。尤其是齒科，願意替愛滋感染者診療ê醫生kan-ta有18.1%，目前除了台北市立聯合病院昆明院區kap台大病院ê齒科部有安排看診以外，台灣並無專門替愛滋感染者服務ê齒科資源。
另外，tī法律條文方面mā是有爭議，當時愛滋條例立法是為著beh避免病毒傳染tsiah有「第21條」3，tann愛滋已經是thìng好控制、thìng好預防ê慢性病，「第21條」ê規定已經tuè bē著目前社會、醫學ê跤步，致使tī一寡社會案例內底顛倒有「反效果」。濟濟來到法院sio告ê雙方當事人對「是m̄是有隱瞞？」lóng無法度提出實際ê證據，「第21條」suah反tńg tsiânn做長期感情恐hat ê工具。所以lán是m̄是ài來kā「第21條」修改掉？Án-ne m̄-nā符合社會ê需要，mā ē-tàng符合目前ê醫學實證。
2019年10月底ê同志大遊行，其中「愛滋遊行陣線」大隊手攑紅雨傘，訴求『知識戰勝恐懼』，希望推動社會來認bat「U=U」4、洗清汙名、爭取權益，tsiah thang hōo被「歧視、無知、偏見ê雨傘」khàm-tiâu--leh ê愛滋感染者ē-tàng看著藍天。逐家若有興趣，ē-tàng上網去『帕三小事務所』ê『帕思客相談室』，mā ē-sái預約來進一步了解愛滋ia̍h是用類似『真人圖書館』（The Human Library）ê方式hām愛滋感染者會談。另外，『帕三小事務所』有hip一支影片「愛滋感染者上討厭ê一句話」，對一般人來講笑詼笑詼ê一句話，íng-íng是傷害愛滋感染者ê一句話。
講座中，蔡教授放一支社會實驗影片，內面有安排演員，一个扮演目睭kheh-kheh ê愛滋感染者，邊--a tshāi一塊徛枋，頂面寫『我是愛滋感染者，你願意給我一個擁抱嗎？』；另外兩个扮演對愛滋有意見ê擾亂者。Tng當有人行倚--來beh sio攬，擾亂者感覺意外，kā in問：「Lín kám m̄驚傳染？」Suah有人kā應：「血無接觸5，免驚--lah！」；擾亂者leh罵感染者ê時，mā有人徛出來用sio攬來hōo伊恬--去。濟濟人m̄驚擾亂者kap看鬧熱民眾ê眼光，用in ê雙手來kā愛滋感染者鼓勵，koh有一个媽媽抱伊ê細漢囝來hām感染者sio攬。
Tī西門町34分鐘、華山文創園區20分鐘ê實驗中，lóng總有115人次ê sio攬、42張鼓勵ê留話，歹意留話無半張。一个人ê行動ē-sái影響真濟人，『馬丁路德』bat講--過：「Beh做tio̍h ê代誌，不管時lóng是好時機。」傳播正確ê愛滋資訊，破除無必要ê驚惶，做伙kā勇氣kap關懷分享到世界每一个所在，ke一寡同理心，hōo社會koh-khah溫暖。
- 有穩定leh接受「抗病毒療法」（antiretroviral therapy，ART）ê愛滋感染者，若是血內底ê病毒數量連suà六個月以上有控制好勢，機器量bē著（undetectable），án-ne就ē-sái準做伊無kâng傳播愛滋病毒ê風險（untransmittable），也就是「undetectable=untransmittable（U=U）」。
- 編按：正式名稱是《人類免疫缺乏病毒傳染防治及感染者權益保障條例》。
- 第21條ê內容是『明知自己為感染者，隱瞞而與他人進行危險性行為或有共用針具、稀釋液或容器等之施打行為，致傳染於人者，處五年以上十二年以下有期徒刑。』
- 除了「undetectable=untransmittable」，tsia koh有另外一層意思是「under umbrella」（tī傘下底ê人），詳細看張宇ê〈傘下〉ê歌詞。傘ē得kâng保護、遮風tsa̍h雨，m̄-koh傘mā是一款阻擋，hông無法度倚近ê防衛，tī傘ê下底看著外口青ling-ling ê世界，就ká-ná是感染者ê心情，講iah是m̄講lóng是兩難（tuì『2019愛滋遊行陣線——「知識戰勝恐懼」紅傘運動聯合聲明稿』tiah--出-來--ê）。
- HIV是透過感染者ê體液入來身軀來傳染--ê，體液包含血、性器官ê分泌物、空喙ê分泌物kap人ê乳等等，無包含喙瀾、汗、目屎kap屎尿等。Ē入來身軀主要是透過無安全ê性行為、共用射筒、bak著空喙、生囝kap飼乳等行為。其他親像食飯、游泳、sio攬ia̍h是摸著患者摸--過ê mi̍h件，lóng bē傳染。HIV mā bē因為蠓仔叮--著來傳染。
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
