作者：《台文通訊》編輯部
編按：原文tī 1991年8--月，《台文通訊》第2期，第1-2頁刊出；漢羅用字有koh調整--過，羅馬字部份保留原本使用ê傳統白話字。
為著beh拯救漸漸面臨滅種危機ê台灣話，真濟語言學家lóng同意，上kài迫切ê工程就是建立標準化ê台灣語文。
「台文標準化」ê口號聽--起-來kánn-ná親像是一个真遙遠ê理想，但是lán若研究世界各國文字發展ê歷史，lán就免hiah-nī悲觀。根據大英百科全書，世界上每七个人就有一个人ē-hiáu講ê英文，tī美國獨立ê時，英文tī英國mā iáu未標準化。Kan-na tī倫敦ê仝一个城市內底，就有四、五種方言。Hit時chūn英國ê讀冊人tio̍h-ài用拉丁文iah是法文寫文章hō͘英國人看。台文tī台灣ê社會地位kap兩百冬前英文tī英國ê社會地位真仝款。Tī台灣講台灣話ê智識份子，tio̍h-ài用中文寫文章hō͘台灣百姓看；台灣ê作家tio̍h-ài用中文來寫台灣文學hō͘台灣人欣賞，連民進黨tī宜蘭縣編ê「本土語言教材」mā百分之95以上是用中文寫--ê。相信真濟人若想著tio̍h-ài用中文來讀台灣文學，用中文來教台語，心內感覺真無奈，但是若想起現代中文mā是tī 70年前chiah標準化，阮對台文ê標準化就無絕望。Tī chia阮beh表示阮對台文標準化粗淺ê看法，希望ē-tàng引起khah濟ê討論。
- 台灣文字標準化ài建立tī台文普及化ê基礎上chiah有意義，也只有台文先普及化、大眾化，台文ê標準化chiah有可能達成。語言kap文字lóng是有社會性ê mi̍h件，所以台文普及化m̄是語言學家單獨ē-tàng完成ê khang-khòe，chit件代誌需要全民ê參與chiah有法度成功。Tī台灣政府iáu無一个台文標準化ê公共政策以前，需要所有關心台語文化ê前途ê各界人士來關心kap參與。特別是ài有khah濟教育界、文學界、大眾傳播界（親像記者、廣播電台、雜誌編輯）、電腦界等專業人士出來成立草根性ê「台文研習會」ê組織。
- 台灣文字標準化ê工作一定ài用台語來思考、來寫作、用台文來討論。台灣文字ê標準化若是用中文來討論，台文是永遠bē-tàng出頭天。中台、英台、日台等翻譯人才ê培養是真迫切koh重要ê工作。若是有用中文寫ê有關台文標準化ê好論文，kài好是ē-tàng翻譯做台文了後chiah發表。
- 無論做啥mih代誌，經驗ê累積真要緊。台文標準化ê工作也是仝款。Lán ài加強過去台文資料ê整理kap介紹。有心台文標準化ê工作者應當收集、再版過去各種ê台語字典、用羅馬字、漢字、漢羅寫ê報紙kap文學作品，chia-ê資料對beh寫台文ê人一定ē有幫贊。教會公報、長榮中學、台南神學院等lóng是日本政府tī台灣推行「國語」政策以前就成立ê文化團體，相信in應當有保存一寡台文資料，chia-ê歷史資料應當ài有人kā in整理--出-來。若無án-ne做，有寡文盲，in不但m̄知影家己是文盲，soah認為台灣話是無文字ê語言。台文ê標準化ài建立tī先民留hō͘--lán ê遺產，了解in ê好處kap bái處，一步一步改良。
- 台灣個人電腦已經真普遍，台語電腦文書處理系統ē-tàng用來寫台文、處理台文ê資料庫，是有心台文標準化ê工作者bē-sái欠缺ê工具。
#台文通訊30週年經典回顧 專欄。
台文通訊BONG報318期，2020年9月出刊。
歡迎捐款贊助 #李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
有固定的長期捐款， 讓更多的台語文相關計畫可以穩定的推行，感謝逐家。
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
三十而立．台文通訊30週年徵稿啟事
古早人講「三十而立」（sam-si̍p jî li̍p），意思lán人tio̍h-ài食kah 30歲，tsiah徛ē在、讀有冊，m̄知kám有影？《台文通訊BONG報》ê前身是1991年7--月創刊ê《台文通訊》kap 1996年10--月創刊ê《台文BONG報》，落尾tī 2012年2--月合刊，也就是講，到kah明年ê熱--人，就是guán 30歲ê坎站--looh！創刊hit當時，眾人對台灣母語ê發展有gua̋大ê ǹg望，tsit條台語路行過30冬，m̄知guán kám有ha̍h人意，hōo本土語言出頭天--ah？
翻頭tńg去看beh 30年前hit跤兜，台灣人知見著民主改革大變化ê流擺，規kuānn sio連suà ê運動，爭取母語人權ê議題也無欠席。30年來，tuè政治勢面起起落落，語言政策ê論戰無時停，路途就算講坎坎坷坷，語言運動ê成果suah也沓沓仔粒積——2018年尾，立法院三讀通過《國家語言發展法》，到tsia，所有本土語言ê發展tsiah平等得著法律上ê保障。
現此時，國校kap大學、研究所lóng已經有本土語言ê課程，koh，《國家語言發展法》明訂，自2022開始，國高中mā ài有本土語言課。國家級ê語言認證考試tsîng 2010辦到tann，愈來愈成熟。公視台語台tī舊年7--月開播，多元ê台語節目一个一个出--來；《小王子》台語版今年3--月一下出版，即時tī冊店ê排行榜tshìng-tsiūnn頭名，包括阿却賞囡仔故事繪本系列在內ê各種台語文創作ná來ná受注目。本土語言ê復振，tsiânn做規个社會共同思考ê議題。
30冬ê tsit條路--裡，逐家手頭ê tsit本雜誌m̄ bat斷站，uì美國到台灣，uì 1991年到tann，kā濟濟sia̋n-pái、前輩ê心血khioh做伙，kap tńg半沿甲子ê台語運動做伴、kap各位關心母語ê有志做伴。Guán 30歲--ah，雖然是通世界iáu leh發行ê台語文雜誌內底歷史上kài久長--ê，也不過是一个「文青」——台文ê青年——nā-tiānn。人講，少年--ê khah táng-hiánn，30冬ê青春台語路guán行了按怎，guán家己歹講話，就交hōo讀者來回答。
Uì tsit-tsūn開始，guán誠懇徵求「台文通訊30週年」稿件，歡迎逐家來鬥鬧熱，或者分享你kap《台文通訊BONG報》ê故事，或者提供對guán ê建議。一本台語文雜誌beh行過30冬無簡單，若無各位讀者sio-thīn kap oo-ián，guán無可能堅持到tann。Tī tsia，編輯部koh再一擺表示上大ê感謝，期待有志ê來稿。
