作者：張玉琴
自古以來，人類文明ê開端、lán人ê聚集，總是ē倚tī有水ê所在，tuì hia開始生湠，因為生活中對溪水有tsiânn濟ê經驗，致使ē產生深深ê文化kap記持。
牛稠溪（Gû-tiâu-khe），m̄-nā是一條溪水ê名字，也是我ê故鄉，自細漢到大漢，聽著序大人講古早ê代誌，iah是生活中親身感受ê經驗，有真濟lóng kap tsit條溪水有關係，hōo我感覺著牛稠溪是一个拍拚活骨ê所在，也是一條充滿傳說kap浪漫ê有情河。
牛稠溪ê溪水，tuì竹崎ê山頂，順觀音水冲流--落-來，觀音菩薩徛kuân-kuân，有時是雲ang，有時是水影，伊親像lán ê母親仝款，hōo lán溫柔ê疼thàng；tsông落來平地ê溪水，拄開始koh有阿里山ê鐵枝路陪伴--伊，清清清ê水流tn̄g著ta̋nn beh行--過ê阿里山火車，溪水、鐵橋、菅芒仔kap做伙，tsit个畫面實在有夠suí，莫怪tsiânn濟人ē提hip相機，來tsia走揣台灣ê美麗。溪水khuann-khuann仔流，行到嘉南平原，來到嘉義縣市ê kap界，北爿是舊名打貓ê民雄，南爿ê諸羅山是嘉義市，作家詩人林央敏，想beh tshui-sak ê諸羅文學河，tuì tsia來開始……。
聽講，tuì唐山迎過來台灣ê上帝爺公hām祖先，是順tsit條溪水ǹg東，來到lán牛稠溪崁跤tsit箍圍仔，看著一欉大榕仔樹，tsiah停--落-來，tī tsia釘根、開枝、散葉。聽講，以早，有一對蹛tī牛稠溪ê有情男女，因為門風無sio對，感情路hōo序大人來阻止，暗時，有情人伊孤單行到溪邊，leh唱hit條〈河邊春夢〉，心稀微。聽講，有才情ê女子，是牛稠溪tsit个庄頭作穡人ê子弟，讀冊、寫字人呵咾，先生m̄甘前途來拍損，說服爸母栽培--伊，飄洋過海蹛海外，爸母過往，suah bē赴tńg--來，終生遺憾囥tī伊心--裡。Tsit-tsūn，行到牛稠溪ê poh岸邊，想起囡仔時，目屎珠滴，唱hit條〈媽媽請你也保重〉，四lâm垂。
我是牛稠溪ê查某囝，tsia有我ê青春kap夢想，照顧鄉親序大hām序細，走揣祖先鄉土味，保存文化kap記持，就親像牛稠溪ê溪水，m̄管四季ê變化，beh kā伊久久長長傳--落-去。
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
