作者：張寶明
月圓，總--是hōo人思念故鄉kah親人。Tsit過ê中秋連假是難得thang規家團圓ê機會，趁早落南好bī是。天iáu未bâ霧仔光，車就駛tsiūnn高速公路--ah。窗外ê景緻phú-phú，tài黃ê車燈光染出兩條黃金彩帶，hiánn目kah，tī頭前tshuā路，kài成知影我leh思念親人。
「叔--à，阿娘beh煮烏甜仔糜做中晝，好--無？」半路阿嫂--à khà手機仔來問。「好好好！真好！我tsiok久tsiok久無食著阿娘煮ê烏甜仔糜--ah。」心內歡喜kah想beh khoo-si仔，陳芬蘭ê hit條〈快樂的出帆〉隨tī頭殼--裡響起，正手連leh踮大腿拍phik。車沿路駛、心沿路想，阿娘ê烏甜仔糜kā我siânn kah sâi食ê喙瀾tsuh規喙，連阿娘leh煮ê影像mā浮tī面頭前。
紅蔥頭用豬油khiàn芳，lām香菇kah菜脯炒出芳味，落三層khiàn kah ta水，suê水kûn hōo出味，粒飯khat落去lā hōo散，一下滾隨kā烏甜仔囥--入-去，等湯大滾就kā火切hua，thìng好來享受--looh！
食烏甜仔糜決定ài用大碗公，koh tio̍h té kah tīnn滿滿，ài三份一是湯，食著tsiah有夠khuì。「Tio̍h趁燒食，千萬m̄-thang hōo頓ám--去！」阿母leh催。傳統鹹糜ê滋味，配一喙烏甜仔，苦甘苦甘奇巧ê滋味，講bē出喙ê口味特殊無比。脆脆ê菜脯ná tī喙--裡跳舞，精彩kah，是有錢無tè買--ê，阿娘tsit項手路ê祕訣，m̄ bat tī別人兜食--著。
阿娘煮烏甜仔ê撇步，m̄-nā煮烏甜仔糜niâ。伊ē khiàn薑絲炒麻油，iah是khiàn薑絲炒王梨豆醬仔，tsiah-nī仔濟阿娘hōo我懷念過去生活ê滋味，一項仔一項影過眼前。
Tī思念中，it著食阿娘ê烏甜仔糜，四點外鐘久，車駛ê時間過著特別緊。Kah阿娘坐踮飯桌，規家伙仔做伙享受阿娘ê烏甜仔糜，是偌nī仔迷人、是偌nī仔ê幸福！Lín kám知？
