作者：張廷鋐
日月潭是lán台灣上出名ê風景區。Tī日月潭，遊客ē-sái坐船看風景，ē-sái騎跤踏車tshit-thô，也ē-tàng tī暗時去山頂看火金蛄。所致日月潭是台灣中部地區上鬧熱ê風景區。
日月潭ê開發ài tuì日本時代講起。斯當時，日本人beh建立「大東亞共榮圈」，開始tī台灣開發水力發電ê設備。Hit-tang-tsūn，總督府為著日月潭ê開發，甚至tī車埕kap二水之間鋪設鐵枝路，運送工程所需要ê物資。第二次世界大戰了後，日本戰敗，日月潭由台灣電力公司接收。Suà--落-來，台灣ê經濟沓沓仔好--起-來，台灣錢淹跤目是hit時ê代名詞，來去日月潭遊覽也變做上時行ê活動。
Ē記得阮細漢ê時，阮阿姆bat tshuā阮叔伯兄哥kap我去日月潭tshit-thô，阮先tuì永靖坐火車去水里盤車，盤南投客運先到埔里，到位ê時拄好倚晝。阮阿姆tshuā阮kap阮叔伯阿兄先去埔里圓環仔邊，ná食豆菜麵ná等車。好佳哉，阮三个人有坐著下晡ê頭幫車，量其約仔2點就到日月潭--looh。
落車了後，阮阿姆先買一寡仔涼水koh有淡薄仔四秀仔beh hōo阮bóng tām-sám。Suà--落-來，阮有去玄奘寺參拜佛祖，iáu有坐船去看風景，koh有去文武廟求智慧。上尾，阮三个人行入一phiàn竹林仔內底，想bē到內底有一間餐廳，總鋪ê手路koh bē-bái。食飽了後，阮三个人就坐tī竹林內底ê涼亭仔拍lā涼。Hōo人料想bē到--ê是，火金蛄開始出現tī阮三个人ê身軀邊，規大陣ê火金蛄kánn-ná leh拍電影--leh。
熱天ê暗時是觀察火金蛄上好ê時間點，m̄知tuì啥mih時tsūn開始，觀光客上時行去日月潭看火金蛄。火金蛄kan-na生活tī無汙染ê所在，所致無汙染ê日月潭就是看火金蛄ê好所在，tī日月潭iáu-koh看ē著水雞、杜定、暗光鳥，日月潭ē-sái講是做環境教育課程上好ê所在。
現此時ê日月潭是台灣上出名ê風景區，每一年lóng有幾若萬人來日月潭tshit-thô。遊客若來日月潭，m̄-nā ē-sái去廟寺參拜、祈福，mā ē-sái去餐廳食現掠ê魚仔，koh ē-sái坐船去遊覽，iah是去樹林、竹林、田園內底走揣火金蛄。
