主講／林大米（Podcast「米米之音」主持人）
巫姿瑩（全國農會推廣部主任）
戴錦鑾（新竹市農會參賽代表）
記錄／顏郁珊
「米米之音」是一个農村廣播節目，自2015年開播。主持人林大米當初辭頭路、搬去宜蘭，決定家己製作網路廣播，beh做「農民生活聲音記錄者」。大米行踏全台灣，分享農業議題，記錄作穡人ê生活kap種作理念；ǹg望透過節目，走揣農村hām農業ê價值。Tsit篇是2020/10/26節目ê文字記錄，雜誌設「農民食堂」專欄kā刊出。
全國農會逐年lóng ē辦一个真特別ê比賽，號做「舌尖ê記憶——阿公阿媽傳家食譜競賽」1，tī 2020年ê時tsūn已經辦到第二屆--ah。Tsit个比賽是替農村ê阿公阿媽舉辦--ê，tī每一个家庭，一定lóng有屬於家己ê特色傳家菜，he是厝內ê氣味，是上熟sāi、上溫暖--ê。透過比賽ê方式，hōo tsit份感動tuè氣味記錄--起-來，也ke添一種傳承意義。
首先全國各地ê農會ē先進行第一kái ê比賽，kan-na上優秀ê食譜tsiah ē-tàng入去到決賽。第二屆ê決賽辦tī宜蘭，tuì全台灣各地來ê冠軍阿公阿媽tī tsia拚輸贏。比賽ê呈現方式考驗阿公阿媽ê創意。Tsia-ê阿公阿媽ài tī十分鐘以內kā食譜用ná講ná演ê方式表現--出-來，koh ài有兩位演員搬一齣劇。農會家政班ê學員mā準備料理kap道具，koh配合影片、音樂kā in tàu-sann-kāng。最後選出16名，逐項料理ê背後lóng有農村阿公阿媽ê故事tī--leh。
上尾選--出-來ê前16名料理當中，有幾項真值得紹介，頭一个是新竹市農會、戴錦鑾阿媽ê「烏糖水泡白飯」。為啥mi̍h ài食tse白飯--leh？飯對作穡人來講是tsiok有意義--ê，人講「食飯皇帝大」，khah早種田是真需要體力--ê，若beh有khuì力就ài食飯，所以講米是農業社會上珍貴ê mi̍h件。Tsit个「烏糖水泡白飯」ê白飯是清飯，烏糖水ē-tàng溫暖心神koh抵抗寒氣，kánn-ná甘甜ê泉水。戴錦鑾講tse是in阿媽傳hōo--伊ê好滋味，伊一定ài kā傳--落-去。
桃園龜山農會、林英嬌阿媽ê「黃豆頭煎餅」mā得著評審ê注意kap呵咾。阿媽講伊出世tī雲林縣ê庄跤，hit當時交通無方便，生活mā真辛苦，食ê mi̍h件lóng ài靠家己種，其中上值得講--ê就是黃豆。黃豆beh做豆奶、豆腐ê時磨了ē有豆頭，古早人惜福，kā豆頭提來煎餅，甜甜ê豆頭餅是林英嬌細漢ê時tsūn上愛食ê點心。林英嬌講：「食黃豆就ná像食肉仝款營養！」
主辦人全國農會推廣部主任巫姿瑩講，ē舉辦tsit場阿公阿媽ê料理比賽，是希望透過tsit个機會，kā in記憶中ê味留--起-來；tsia-ê農村阿公阿媽leh走揣厝內記憶ê時，mā是leh揣台灣逐所在ê食si̍t故事。Tsit个活動上主要是beh hōo味覺ê記憶有傳承ê意義。Tsit个比賽提供一个舞台hōo阿公阿媽展現in ê料理，也透過交流，kā記憶傳--落-去。每一項料理lóng是in ê生活故事，值得好好仔記錄，用比賽ê形式hām逐家分享古早ê好食mi̍h。
Beh辦hiah-nī大ê活動，背後上大ê功臣是全國農會推廣部。農會推廣部門上主要ê khang-khuè就是leh服務農民規家伙仔，陪伴在地農村tsia-ê阿公阿媽、家政班學員kap少年仔。農民食老了後需要農會ê社會服務，農會mā ē提供農村少年仔koh-khah濟學習ê機會。Ē-tàng講，農會是以農民做中心ê一个社會企業。巫主任講，khah早伊掠準農會kan-na是課本內底ê代誌，m̄-koh後--來tsiah發現農會真有價值，因為農會是kap農民第一線接觸ê單位。Tsit个活動是beh保存kap傳承農村文化資產，每一位阿公阿媽lóng是寶，tī in身軀頂學--著--ê lóng是古早人生活ê智慧。
Tsit擺比賽ê評審之一、mā是台灣師範大學教授ê陳玉箴認為，逐个家庭ê飯桌就是一本家族史，反映lán社會經濟、環境ê變化。若kā tsia-ê家族史lóng總集合--起-來，就變做台灣史--ah。Tsit个比賽hōo逐家分享隨人ê飯桌家族史，lán講ê「公眾ê歷史」就是tsit个概念。做伙分享料理，做伙書寫公眾史，hōo珍貴ê記憶繼續保存--落-來。
1.華文原名是『舌尖上的記憶——阿公阿嬤家傳食譜分享競賽』。
米米之音
Tsit集ê節目內容ē-sái tī tsia收聽：
