主講／楊士慧
記錄／黃悅綺
編按：本文是2020/8/20棲地復育台語講座「歹命ê 台灣白海豬」講座摘要記錄，講者楊士慧是台灣媽祖魚保育聯盟ê常務理事。台灣蠻野心足生態協會舉辦ê「蠻野講堂」tuì 2019年3月份起kap李江却台語文教基金會合辦規劃有關生態環境議題ê台語講座，歡迎逐家tī逐個月第三禮拜五暗時7點到9點，同齊來「呷米共食廚房」（台北市中正區衡陽路9號3樓）擴展家己ê台語棲地（tshe-tē）！詳細資料ē-tàng看「台灣蠻野心足生態協會」FB專頁。
東北季風khah弱，海面khah平靜ê時tsūn，看ē著古錐ê白海豬泅過西海岸ê海邊。白海豬拄出世ê時，身長100公分，規身軀lóng是phú色--ê，一直到成年，身軀tsiah ē沓沓仔變白，身長ē大到280公分。有時tsūn ē因為運動血液循環所致，規隻變做粉紅仔粉紅，所以伊mā叫做「粉紅仔海豬」。農曆3--月海上khah恬靜，khah tsia̍p看著伊浮--出-來，漁民叫是伊beh來祝福媽祖生日，kap lán做陣痟媽祖，就kā號做「台灣媽祖魚」。
白海豬是在種ê台灣特有亞種，因為海洋環境變bái，白海豬ná來ná oh生存，數量直直減少。目前白海豬ê數量估計65隻左右，數量mā有可能有變動。逐擺出海去做調查，tuì白海豬ê kha-tsiah-niā兩爿hip相，透過「photo ID」比對，來認每一隻海豬仔，而且用編號來計算目前ê數量。若是beh做海翁、海豬ê調查，就tiānn用著tsit款技術，因為每一隻ê記號lóng無仝，若是某一隻tsit幾冬lóng無出現，就推測伊可能是無--去--ah。白海豬ê棲地大約仔tī台灣海峽沿岸，桃園一直到台南hit跤兜，m̄-koh mā真有可能koh-khah往北到淡水河，或者是往南到台南、高雄ê交界，差不多是200公里長。In活動ê範圍長koh狹，離海岸kan-na三～五公里闊，深大概是15～20公尺niā-niā。
因為海洋、空氣受著汙染，hōo用肺部喘khuì ê白海豬生活無以早sù-sī。人類水力發電、民生用水ê需求kā河流ê tsiánn水用水壩tsa̍h-tiâu--leh，流入台灣海峽河口ê tsiánn水ná少，本底tī河口ê魚、蟳仔、蝦仔、浮游生物因為溪水變少，自án-ne失去營養源，數量mā tuè leh變少，白海豬就揣無食mi̍h。經濟發展、thiām海做地，hōo海洋空間受著壓迫，商業船、遊輪、貨櫃輪、風力發電ê運行，ē tī沿海造成tsiok大ê噪音；白海豬是透過sonar（『聲納』）揣路，對聲音真敏感，噪音ê干擾ē hōo in迷失方向，kánn-ná目睭去hōo人am--起-來，按怎就摸無路。
調查--落-來，發現白海豬三成以上有大大細細ê傷痕。除了無注意去hōo船sut--著，koh有真濟是hōo一款有倒刺ê漁具「lîng仔」勾tio̍h傷。白海豬愛食「石首科魚」，譬如黃魚、鮸魚，kap漁民beh掠ê魚重疊，漁民若無注意，可能就ē去網著白海豬。Tsit款無夠永續ê漁法mā對白海豬造成傷害，逐位ê漁具lóng無啥仝，iáu未有管制，揣食ê白海豬kap討生活ê漁民suah變做「弱弱相殘」ê局面。
Beh做物種ê保育，上重要ê khang-khuè是保護in ê棲地。親像若beh保護石虎，保留伊完整ê棲地就真要緊，若是tī棲地ê中ng開路，ē致使in生活ê所在散--去，lán tsiah ē tiānn-tiānn聽著石虎經過車路，無細膩hōo車挵--死ê代誌。因為野生動物kap lán人無仝款，lán人有固定ê空間生活就ē-sái，m̄-koh野生動物生存範圍khah闊，in需要走tsông、sì-kè揣食tsiah有法度生存。Lán無法度hōo天公伯飼--ê白海豬「tńg彎」，閃開生存ê危險。
白海豬tī lán tsit个海洋國家釘根生活，是lán可貴ê海洋寶藏，白海豬ê生存也是海洋健康ê重要指標。目前ê政策hōo lán ê土地、海洋無充足ê時間恢復元氣，lán tio̍h-ài去思考按怎tī經濟發展ê時tsūn，mā寶惜大自然hōo--lán ê禮物；若是lán對土地ê利用有改變，koh無顧慮就kā in leh行ê路斬斷，in tio̍h ē無tè thang去，甚至自án-ne就無--去。
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
