主講／紀惠容
記錄／黃悅綺
本文是2020/9/2 ê講座摘要記錄，主講者紀惠容是國家人權委員會委員、勵馨社會福利事業基金會執行顧問。
若是beh問講「kám有啥mih代誌因為性別有無仝ê對待？」一定有真濟例thang好討論，因為tse是lán tī生活中tiānn拄--著--ê。有人tī家庭中因為性別ê緣故，ài擔ê責任、家事分工並無公平；求學ê時tsūn發現無仝性別選擇科系ê時，社會ê期待有包含偏見；iah是性別ê刻板印象，hōo in求職、升學ê時無受著鼓勵，甚至hōo人看輕。
有歧視性ê社會制度，法律、社會規範iah是風俗，真有可能限制女性ê機會。Tī資源kap資產ê層次，家產ê分配tī以早有「大漢囝應該ài繼承，查某囝無份」ê想法，tsit-má iáu是有干礙。若是tuì放棄繼承ê比率來看，女性放棄繼承確實是濟過男性。M̄-koh tsit幾年ê觀察，性別差距有愈來愈少，平等觀念慢慢仔leh落實，tshiânn養kap繼承ê義務lóng bē因為性別就無仝。
聯合國開發計畫署認為性別無平等是其中一項阻礙人類發展ê重要原因，所以創編「性別無平等指數」（Gender Inequality Index, GII）評量性別發展kap賦權平等，性別無平等指數主要關注--ê有「生殖健康」、「賦權」、「勞動市場」tsit三个方向。「生殖健康」統計就ē參考產婦死亡率、iáu未成年ê生育率；「賦權」包含國會性別比率、兩性教育程度；「勞動市場」ē用勞動力參與率做指標。GII數值tī 0～1之間，愈倚近0表示愈平等，tsit个評量方法ē-sái幫助lán理解性別kap社會發展ê狀況。
「勞動市場」內底，未婚女性是參與ê重要力量，若是觀察女性tī「育齡階段」（15歲～49歲）婚姻、生囝、就業ê變化，ē-tàng看出其中ê牽連。Tsit-má tī育齡階段ê婦女，因為經濟ê考量，可能ē khah uànn生囝iah是生了少，而且生囝了後ê女性tī「婚育階段」，因為家庭照顧ê分工kap期待--ê無仝，tiānn-tiānn tio̍h-ài辭頭路來tshuā囡仔；若beh koh揣頭路，因為ài考慮著家庭照顧ê khang-khuè，ē khah oh揣，造成女性人力資源流失。進入婚姻ê女性，tī育齡階段ē拄--著ê議題需要政策ê推動，除了經濟上，mā應該ài推動家庭成員共同擔照顧責任ê觀念，hōo家庭照顧有khah友善ê環境。
雖bóng tshui-sak性別平等ê khang
-khuè，iáu有真長ê一段路ài行，m̄-koh lán ê社會ûn仔有leh進步。親像早前因為「傳宗接代」ê觀念，結婚了後某tio̍h-ài疊姓，若有後代，囡仔ê姓mā是ài tuè老爸，無，ē hōo人講閒仔話。Tsit-má有法律ê保障，囡仔ê姓已經ē-sái共同約定，社會mā有轉變做khah ē-tàng接受。女性角色kap地位ê轉變ná來ná重要，因為透過無仝層次議題ê調查，分析統計資料kap無仝領域性別分工ê變動，hōo lán對性別處境有基本ê了解。性別平等若beh落實，ài逐家長期做伙拍拚，tsiah有法度沓沓仔改變。M̄-nā是查某人niā-niā，多元ê性別也是，lán ài kā性別隔離ê情境解除，hōo lán koh-khah倚近注重人權ê社會。
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
