作者：陳育萱
總統你好：
我是兩个囡仔ê老母，阮是基督徒，本來按算hōo囡仔去教會學台語、去學校學華語，真正執行tsiah發現，tsit-má教會ê主日學罕得有用台語教，自án-ne阮家己開始學台文，kah囡仔鬥陣一步一跤印，學台語、寫台文，開始認bat台灣ê過去，愈學愈了解台灣ê過去，愈來愈疼台灣，拍開對台灣認同ê新眼光。
舊年大漢囝去國小讀書，tsiah發現lán國民學校ê教育是設定你ē-hiáu華語聽kah講，tī學校學讀kah寫，寫--ê kah背--ê考試真濟，學中文ê進度koh緊，囡仔感覺án-ne ê學習方式真痛苦，唐詩是放中國YouTube 影片解sueh，當做囡仔看完就lóng ē-hiáu--ah！Ài背詩，漢字真歹學，老師講讀書本來就是án-ne，tsit-má若無法度接受，以後ē愈來愈深，愈來愈痛苦！
華語、客語、英語課lóng是照老師指示講hit節課ê語言，平常時tī學校，大漢囝tiānn-tiānn講台語，tsiūnn台分享歇睏做啥mi̍h，若用台語講，老師請伊koh用華語講一擺，請伊後擺mài koh講台語，講伊siunn細聲，逐家聽無；囡仔解sueh講是普通講話ê音量，而且若siunn細聲，ē-tàng請伊講khah大聲--leh，m̄是叫伊mài講台語，若是囡仔無機會講mā無機會聽，根本無可能聽有，而且老師哪ē知影逐家聽無？老師講：「你蹛tī台灣，哪ē-tàng無愛學中文？Bē-hiáu ê mi̍h件，哪ē-tàng無愛學？」我mā想beh問，本土語言bē-hiáu，哪ē無愛學？而且tsit層代誌竟然發生tī 世界母語日前後，hōo人感覺加倍心酸，本土語言m̄是kan-na ē-tàng踮厝--裡講，伊m̄是寫tī課本內底，m̄是kan-na ē-tàng tī本土語言課程講ê語言，應該是lán生活中，真重要ê一部份tsiah tio̍h。
真無簡單升二年仔，拄好換一个老師，開學頭一工，囡仔問老師：「Tsu-pau ài khǹg tī tó-uī？」伊問囡仔講：『國語怎麼講？你要講台語回去跟你媽媽講。』囡仔想--一-下，伊認為為著保護本土語言，日常就應該tsia̍p講，m̄-koh老師án-ne講，伊有驚--一-下，想講到底ē-tàng koh講台語--無？無奈只好照老師ê要求，koh用華語講一擺，án-ne tshiân--一-下，老師認為伊無法度直接翻譯，判定伊ê母語是台語，做一个華語老師，應該替伊加強伊ê華語語言程度，無，後擺ē真慘，到國中、高中，題目逐字lóng看有，鬥--起-來suah無了解意思。老師家己mā是做人爸母，是真有經驗ê老師，伊講伊看過真濟讀全英語學校--出-來ê囡仔，排斥學華語，考無好成績，影響自信kah人際關係，尾--à自殺--ê lóng有，實在太恐怖--ah！伊看siunn濟悲劇--ah！認為一定ài tī拍基礎ê時tsūn好好仔加強，後擺m̄-nā是華語ê問題，是逐科lóng ē有問題，真正ē輸人tsiok濟。
感謝老師替囡仔煩惱、設想，m̄-koh日常生活想beh講台語，是囡仔本身經過思考ê決定，伊知影按怎講華語，是無想beh講niā-niā；老師講台北無囡仔ē-hiáu講台語！確實！一年拄無一个。老師講伊聽有mā ē-hiáu講台語，m̄免對伊「推廣」台語，希望阮囝華語能力先顧hōo在，tsiah來kā同窗「推廣台語」。伊就算無歹聲嗽，講出：『國語怎麼講？你要講台語回去跟你媽媽講』這種話，本身就是歧視--ah，阮了解老師是好意，m̄-koh lán ài想看māi，lán ê教育系統kám有尊重非華語母語使用者？你若華語無通，無愛學中文就ē造成悲劇。老師講除了唸故事，m̄ bat聽過大漢囝講過華語，伊認為無願意講華語是非常嚴重ê代誌，一定ài tiānn-tiānn用華語思考，tsiah有法度造句、寫文章。Tse是開學頭一工，上課四點鐘，就發生 ê代誌。
阮kah囡仔講台語、學客語，是為著hōo囡仔對tsit phiàn土地有認同，對本土語言有使用經驗、有感情，後擺大漢ē-tàng自由選擇想beh講啥mih語言，m̄是beh害伊tī 學校hōo老師點名做記號，老師強調ài提升華語能力，無，後擺ē真辛苦。逐家lóng講，tsit-má已經解嚴--ah，無人ē禁止你講台語，m̄-koh實際上是用規个國家ê力量、學校ê力量，禁止任何本土語言發展；若是lán無法度改變以華語做主體ê教學環境，本土語言一禮拜kan-na一節，koh tio̍h-ài kah其他外國語sio爭上課時間，án-ne有上課kah無上課lóng差不多。阮拄著ê兩位老師，lóng koh兼「閩南語」老師，一直對囡仔講，ài講逐家聽有ê話、台語文是tsit十幾冬tsiah hōo人創造--出-來--ê——tsit款錯誤觀念，in對台語ê發展、台文ê概念完全無了解，無本土語言復育ê意識，教--出-來ê學生對本土語言哪ē有可能偌尊重？就親像買菜kah ê蔥仔仝款，無mā無要緊。老師iáu有一種講法，講智商kuân ê人tsiah有法度liàn-tńg使用無仝語言，自由切換，若真正是án-ne，一百年前ê台灣人，kah一寡歐洲人可能智商lóng真kuân--looh？
我hē性命苦勸阮囝可能ài加強華語，mā考慮對伊khah tsia̍p講台語ê時tsūn，雄雄感覺真悲哀，lán有美國學校、日本學校等等外國語學校，是按怎無台語學校？聽講高雄一个tsiok遠tsiok遠ê所在有beh試辦，等待全島普及lóng m̄知tang時--ah！若準阮是用台灣話教學，學萬項代誌，án-ne阮囝ê行為是m̄是就完全正常--ah？無人ē勸你mài講台語。講台語本身就是一種社會運動，一个二年仔ê囡仔，連去外口學mih件，堅持講台語，是需要偌大ê勇氣tsiah有法度kah人無仝款？阮tī台北危機感真正tsiok重，阮囝認為只有tsia̍p用，語言、文化tsiah bē無--去，tse是真重要ê代誌。
事實上，beh tshiânn養一个以本土語言做母語ê囡仔，比栽培華語、英語囡仔成本ke tsiok濟，m̄-nā資源相對少，阮mā非常煩惱無夠額ê學習內容ē-tàng提供hōo囡仔；規个社會意識無提升，學生ê時間kah氣力有限，kan-na靠逐禮拜40分鐘本土語言課，根本無才調kah強勢ê華語、英語sio比，kan-na靠學校以外kah厝內講台語根本無效，阮m̄是想beh「推廣」台語，是連自由使用台語ê權利to無，beh講台語，ài先證明你ê智商有夠kuân，證明你mā ē-hiáu華語kah英語，華語能力無問題，án-ne語言根本無平權。
Mài koh講台語--ah，同窗聽無！Mài寫台文，客人看無！學校m̄是鼓勵逐家tsia̍p用族語，促進各族群互相了解，老師是教囡仔bē-tàng講別人聽無ê話，老師煩惱講台語ê囡仔華語能力有問題，tse就是lán ê教學現場，語言根本無平權！若照「性別平等委員會」來處理，若有「語言平等委員會」，tsia-ê代誌早就hōo人提出來檢討--ah，國家語言發展法通過以後，上kài重要ê「意識培養」，一直lóng做了無夠好，真正需要加強！當然mā m̄是所有ê老師lóng án-ne，mā有認真拍拚ê老師，m̄-koh阮lóng無拄--著。
總統--ah！台灣生育率世界第一少，已經是國安問題，本土語言滅亡是國防問題，本土語言無--去，文化mā消失--去，án-ne ē建立啥mih款ê台灣主體性？阮囝拄--著ê tsia-ê代誌，tī其他囡仔ê眼內，koh傳達啥mih款ê價值觀--leh？
Lán tang時tsiah有法度好好仔做一个正常ê台灣人？
