作者：高錦壹
自國民政府1946年推行「國語政策」，到解嚴ê 80年代尾聲，消除台灣人母語ê運動連suà 40年久。講著「國語政策」，國民政府其實是延續日本人tī殖民統治時代，為著khah方便kā台灣人洗腦來為大日本帝國效力，tsiah有tsit款政策；m̄-koh tsit項政策，tī國民黨黨國機器ê運轉下，koh-khah有效率將台灣ê語言恬恬刣了了。台語、客語kap其他十外種原住民族語照聯合國教科文組織ê瀕危語言認定，大多數已經倒tī「安寧病房」內底。Tsit-má台語、客語以前因為使用人口khah濟，「百足之蟲，死而不僵」，m̄-koh mā算是入去「加護病房」。
語言發展當然是天然--ê上好，m̄免特別鼓勵iah是禁止，但是問題就是過去國民黨用「國家機器」beh刣死tsit寡語言，in用學校老師教學生「講台語」是粗俗--ê、in用媒體傳播kā大眾講「講台語」是可笑--ê、in用政策限制「講台語」ê人發展。Tsit-má台灣tsiânn無簡單脫離威權統治ê時代，當然有權力要求用仝款ê資源、仝款ê機器來振興家己ê母語，hit寡認為「學台語浪費資源」、「台語應該tī厝內學ê人」，一定無了解到底是為啥mi̍h台語變做有危機ê語言。
M̄-koh有一寡人認為「學台語」，就是Hō-ló沙文主義，tse一定是無sense ê人tī-leh練痟話，台語族群kám有規定bē-sái講其他語言？台語族群kám有去恥笑其他語言？竟然ē講是Hō-ló沙文主義？將台語文運動用狹細ê政治眼光審視，當然按怎看按怎有問題。看著問題tio̍h bē-sái看經濟價值niâ，疏忽語言ē-sái tsiânn做國家ê文化資本，是文明ê寶。若是講kan-na有經濟，suah無文化，án-ne就算是koh起100棟101 mā無法度kā文化ê空phànn thūn hōo平。
其實，我認為台語運動是一款和解，台語族群ìng過hōo國民黨奪走ê權利，tsit-má拄好是還倒tńg--來ê時tsūn，實現公平正義，tsiah ē-tàng達成族群和解；mā是一種希望，hōo所有瀕危ê語言一个機會，ē-sái tī生活中保存，m̄是囥入博物館；koh是一種展望，台語是台灣社會kài普遍使用ê語言，顧守台灣文化ê根底，ē-sái講in兩个已經tsiânn做命運共同體，台語運動正正是為著保留台灣語言內底ê一塊淨土。
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
